قازاقتىڭ ۇلاعاتىن كوپ كوردىم
بەيسەنبى, 18 قازان 2012 7:45
مەن ءوزىم كەڭەس ارمياسىنداعى اسكەري مىندەتىمدى وتەپ ورالعان سوڭ وسى اقتوبەگە كەلدىم. مارتوك اۋدانىندا ۇلكەن اعام ەيۆاز پروراب بولىپ جۇمىس ىستەيتىن, سونى ساعالاپ كەلدىم شىندىعى. ءسويتىپ, وسىندا قالدىم, حالىق شارۋاشىلىعى ينستيتۋتىندا بولاشاق زايىبىم, قازاق قىزى سۆەتامەن بىرگە وقىپ ءجۇرىپ, كوڭىل جاراستىردىق. قازىر نەمەرە-جيەن ءسۇيىپ وتىرعان باقىتتى اتا-اجەمىز.
بەيسەنبى, 18 قازان 2012 7:45
مەن ءوزىم كەڭەس ارمياسىنداعى اسكەري مىندەتىمدى وتەپ ورالعان سوڭ وسى اقتوبەگە كەلدىم. مارتوك اۋدانىندا ۇلكەن اعام ەيۆاز پروراب بولىپ جۇمىس ىستەيتىن, سونى ساعالاپ كەلدىم شىندىعى. ءسويتىپ, وسىندا قالدىم, حالىق شارۋاشىلىعى ينستيتۋتىندا بولاشاق زايىبىم, قازاق قىزى سۆەتامەن بىرگە وقىپ ءجۇرىپ, كوڭىل جاراستىردىق. قازىر نەمەرە-جيەن ءسۇيىپ وتىرعان باقىتتى اتا-اجەمىز.
ەكەۋمىز دە قوعامدىق تاماقتاندىرۋ جۇيەسىندە جۇمىس ىستەدىك, باسشى قىزمەتتەردە بولدىق. كەيىن بارلىعى جەكەشەلەنىپ كەتتى عوي. زەينەتكە جەتكەنشە وزىمىزشە تالپىنىپ, تىرلىك جاسادىق. كەيىن فيليال كەڭەسىنىڭ توراعالىعى ماعان ۇسىنىلدى, بۇل دا ءبىر يماندى ءىس قوي, ساۋابى تيەر دەپ باس تارتپادىم. قازىر وسى شارۋانىڭ باسى-قاسىندا ءجۇرمىن, جاستاردى انا تىلىنە, دىلىنە, سالت-داستۇرىنە, ءمادەنيەتى مەن ادەبيەتىنە ءتاربيەلەسەك دەپ تالپىنىپ جاتىرمىز.
ستاتيستيكالىق دەرەكتەر بويىنشا, وبلىستا 1 مىڭنان استام ازەربايجان تۇرادى. ارينە, بۇعان كەشەگى كەڭەستىك جۇيەنىڭ شىرىگەن جىپتەي ىدىراۋى دا سەبەپ بولدى. سوعىستان كەيىنگى حالىق شارۋاشىلىعىن قالپىنا كەلتىرۋ, تىڭ يگەرۋ جىلدارىندا جانە وقۋ ءبىتىرىپ جولدامامەن كەلگەن ازەربايجانداردىڭ كوبى تاۋەلسىزدىك العاننان كەيىن تاريحي وتاندارىنا قونىس اۋداردى. سولاردىڭ وزدەرى دە قوناقجاي قازاق حالقىن قيماي-قيماي قوشتاسقانىن ازەربايجان باۋىرلار ەستەن شىعارمايدى. قازىر وبلىستا تۇرىپ جاتقان ازەربايجانداردىڭ جاس ۇرپاعى تاۋەلسىز قازاقستاننىڭ ەكونوميكالىق دامۋى, ساياسي تۇراقتىلىعى جولىندا ەڭبەك ەتىپ, وقىپ ءوز ۇلەستەرىن قوسۋدا.
بىرلەستىكتە ءوزارا ىنتىماقتاستىق پەن بىرلىكتى قالىپتاستىرۋ باعىتىندا, ازەربايجان ءمادەنيەتىن, سالت-ءداستۇرىن, ءتىلىن ساقتاۋعا بايلانىستى بىرقاتار شارۋالار اتقارىلۋدا. ورتالىق جانىندا بي توبى جۇمىس ىستەيدى. كوركەمونەرپازدار وبلىستا وتكىزىلەتىن بارلىق مادەني شارالارعا اتسالىسادى. ازەربايجان, قازاق, ورىس ءجانە باسقا تىلدەردە تامىلجىتا ءان سالىپ, بي بيلەيتىن جاستار قاتارى جىل سايىن مولايىپ كەلەدى. قىرىقتان استام بالالار مەن جاستار كوركەمونەرپازدار ءۇيىرمەلەرىنىڭ بەلسەندى مۇشەلەرى بولىپ تابىلادى.
مۇندا 2008 جىلدان باستاپ جەكسەنبىلىك مەكتەپ جۇمىس ىستەيدى. جەكسەنبىلىك مەكتەپتەگى ءۇش توپقا 42 ادام بارادى. ولارعا قازاق تىلىنەن گ.بەكەنباەۆا, ازەربايجان تىلىنەن ن.ءازيزوۆا ساباق بەرەدى. قازىر وبلىستىق قازاقستان حالقى اسسامبلەياسى حاتشىلىعىنىڭ جانە وبلىستىق تىلدەردى دامىتۋ باسقارماسىنىڭ كومەگىمەن جاستار انا ءتىلىن جانە مەملەكەتتىك ءتىلدى, سونداي-اق, ازەربايجاننىڭ تاريحى مەن گەوگرافياسىن وقىپ, ۇيرەنۋدە.
ءبىز وسىنداي بەيبىت جانە تاتۋ ەلدە تۇرىپ جاتقانىمىزدى ماقتانىش تۇتامىز. ءوڭىردى مەكەندەيتىن ۇلتتار مەن ۇلىستاردىڭ بارلىعىنا دا ءتىلىن, سالت-ءداستۇرىن دامىتۋعا, مادەنيەتى مەن ءدىنىن ۇستانۋعا جاعداي جاسالىپ وتىر. مۇنىڭ ءبارى ەلباسىنىڭ كورەگەندى ساياساتىنىڭ ارقاسى ەكەنىن تۇسىنەمىز. ءبىز تاۋەلسىزدىك العاننان كەيىنگى جىلدارداعى ەلىمىزدىڭ تابىسىنا ماقتانا وتىرىپ, ورتاق ماقساتقا ءبىر كىسىدەي جۇمىلا بەرەتىن بولامىز. ورتاق وتانىمىزداعى تىنىشتىق پەن تۇراقتىلىق ءبىزدىڭ ارقايسىمىزدان وسىنى تالاپ ەتەدى.
ءبىز وسى جىلداردا ءبىر-ءبىرىمىزدىڭ مادەنيەتىمىزدى, سالت-ءداستۇرىمىزدى, ءدىنىمىز بەن ءدىلىمىزدى قۇرمەتتەۋدىڭ قانشالىقتى قاسيەتتى ەكەنىن ۇعىندىق. تۇركى تەكتەس تۋىسقان حالىق رەتىندە ورتاق ادەپ-عۇرپىمىز, مادەنيەتىمىز, ۇلتتىق ۇستانىمدارىمىز دا جەتەرلىك. ال ءوزىمدى ازامات رەتىندە ءوسىرىپ, ۇرپاعىما جىلى ۇيا بولعان ەلگە مەنىڭ العىس-نيەتىم شەكسىز. ءبىز تۋىسقان ەكى حالىقتىڭ ادەپ-عۇرپىن, سالت-ءداستۇرىن تەڭ ۇستانامىز. كەزىندە اتام مەن ەنەمنىڭ قولىنا سۋ قۇيىپ, قۇرمەت كورسەتتىم. جۇما سايىن جەتى نانىمىزدى ءپىسىرىپ, ارۋاقتارعا قۇران باعىشتاپ وتىرامىز. بارشا قازاقستاندىقتاردى ورتاق ءۇيىمىز – قازاقستانداعى تاتۋلىق پەن بىرلىكتى نىعايتۋعا اتسالىسۋعا شاقىرامىن, الدا كەلە جاتقان قۇربان ايت مەرەكەسىمەن شىن جۇرەكتەن قۇتتىقتايمىن. ىزگى تىلەك, يماندى نيەتىمىز ەلىمىزدىڭ وركەندەۋىنە باعىتتالسىن, ءدايىم.
شاحباز جامالوۆ,
«ازەربايجاندار اسسوتسياتسياسى» رەسپۋبليكالىق قوعامدىق
بىرلەستىگى اقتوبە قالالىق فيليالى كەڭەسىنىڭ توراعاسى.
اقتوبە وبلىسى.
