«قازاگرو» حولدينگى جىل ساناپ اگروونەركاسىپتى كەشەندى قارجىلاي قولداۋ كولەمىن ۇلعايتىپ كەلەدى. ماسەلەن, 2018 جىلى اوك-ءدى دامىتۋعا بولگەن قارجى كولەمى الدىڭعى جىلمەن سالىستىرعاندا ءبىر جارىم ەسە اسىپ ءتۇسىپ, 400 ميلليارد تەڭگەنى قۇرادى. 2017 جىلى بۇل كورسەتكىش 267 ميلليارد تەڭگە بولعان ەدى. نەسيەلەۋ كولەمى دە 57 پايىزعا ءوسىپ, 385 ميلليارد تەڭگەگە جەتتى.
حولدينگتىڭ جۇمىس ورىندارىن اشۋ, حالىقتى جۇمىسپەن قامتۋ باعىتىنداعى ناتيجەلەرىنە توقتالار بولسام, 2018 جىلى 67 مىڭ ادام ەڭبەكپەن قامتىلدى. ولاردىڭ 11 مىڭى جاڭادان اشىلعان جۇمىسقا ورنالاستى.
جالپى, «قازاگرو» ۇلتتىق باسقارۋشى حولدينگى مەملەكەت باسشىسى مىندەتتەگەن, ستراتەگيالىق جانە باعدارلامالىق قۇجاتتاردا جوسپارلانعان اگرارلىق باعىتتى بەرىك ۇستانادى. بۇگىنگى تاڭدا حولدينگ ناقتى 4 باعىتتا ايتارلىقتاي جوعارى ناتيجەلەرگە قول جەتكىزىپ كەلەدى. ولاردىڭ ارقايسىسىنا قىسقاشا توقتالا كەتەر بولسام, ءبىرىنشى باعىتىمىز – ينۆەستيتسيالىق جوبالاردى قارجىلاندىرۋ. ءبىزدىڭ ينۆەستيتسيالىق پورتفەلىمىزدە جالپى قۇنى 504,9 ميلليارد تەڭگەگە تەڭ 672 ينۆەستيتسيالىق جوبا بار. بۇل جوبالاردىڭ اياسىندا 22 مىڭعا تارتا جۇمىس ورنى اشىلۋعا ءتيىس.
جالپى قۇنى 482,6 ميلليارد تەڭگەنى قۇرايتىن 647 ينۆەستيتسيالىق جوبا ىسكە قوسىلدى. ونىڭ ىشىندە بىلتىر جۇزەگە اسىرىلعان 115 جوبانىڭ قۇنى – 147,8 ميلليارد تەڭگە.
ەكىنشى باعىت – 2017-2021 جىلدارعا ارنالعان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنىڭ اياسىندا قارجىلاندىرۋ. 2017 جىلى حولدينگتىڭ ەنشىلەس كاسىپورىندارى 28,8 ميلليارد تەڭگەنىڭ ميكرونەسيەسىن بەرگەن بولاتىن. بۇل دا جوسپارلانعان مەجەدەن 6 پايىز جوعارى كورسەتكىش. وسى وڭ ناتيجەلەردەن كەيىن قارجىلاندىرۋ كولەمىن 44,8 ميلليارد تەڭگەگە دەيىن ۇلعايتىپ, 11 مىڭ نەسيەگەردى قامتۋ كەرەك دەگەن شەشىم قابىلداندى. ءسويتىپ, وتكەن جىلدىڭ قورىتىندىسى بويىنشا «قازاگرونىڭ» ەنشىلەس كومپانيالارى 11 مىڭ 155 ادامعا 44,7 ميلليارد تەڭگە نەسيە بەردى.
2018 جىلى ستارت-اپ جوبالارىن جۇزەگە اسىرۋ ءۇشىن 8 872 قاتىسۋشى جالپى كولەمى 31,2 ميلليارد تەڭگە نەسيە الدى. بۇل كورسەتكىش تە جوسپارداعىدان ءۇش جارىم ەسە جوعارى. بۇدان بولەك زاكىرلىك كووپەراتسيالاردى دامىتۋعا – 6,5 ميلليارد تەڭگە نەسيە ۇلەستىرىلدى.
حولدينگ قىزمەتىندەگى ءۇشىنشى باستى باعىت – «سىباعا» ەتتى مال شارۋاشىلىعىن دامىتۋ اياسىندا نەسيەمەن قارجىلاندىرۋ. «سىباعا» ەتتى باعىتتاعى ءمۇيىزدى ءىرى قارانىڭ سانىن ەسەلەپ ارتتىرۋعا سەپتىگىن تيگىزدى. اۋىلشارۋاشىلىق ونىمدەرىن وندىرۋشىلەر ءۇشىن ەڭ قولجەتىمدى نەسيەلەۋ باعدارلاماسى وسى دەۋگە بولادى. مال شارۋاشىلىعى سالاسىندا تاجىريبەسى از, بىراق سوعان قاراماستان وسى سالادا بيزنەس باستاۋعا بەكىنگەن كوپتەگەن ازاماتتار ءۇشىن «سىباعا» ۇلكەن مۇمكىندىك بولدى.
وسى ءۇشىنشى باعىت بويىنشا باستاپقىدا 50 مىڭ باس مال ساتىپ الۋعا قارجى ءبولۋ جوسپارلانعان-دى, كەيىن بۇل كورسەتكىش 55,8 مىڭ باسقا جەتتى. ودان بولەك 164,7 مىڭ ۇساق مال ساتىپ الۋعا قارجى ءبولىندى.
ليزينگ باعدارلامالارى اياسىنداعى قارجىلاندىرۋ دا «قازاگرو» ۇستاناتىن باستى باعىتتاردىڭ ءبىرى سانالادى. بىلتىر اۋىلشارۋاشىلىق تاۋارىن وندىرۋشىلەرگە ليزينگ بويىنشا 63 ميلليارد تەڭگەگە 3426 بىرلىك تەحنيكا ۇسىنىلدى. بۇل باعىتتا دا كورسەتكىش 2017 جىلمەن سالىستىرعاندا 36 پايىزعا اسىرا ورىندالدى.
توبىلبەك وماروۆ,
«قازاگرو» ۇبح» باسقارۋشى ديرەكتورى – اپپارات باسشىسى
