ەكى كۇنگە جالعاسقان فەستيۆالدە ايتي, كونتەنت پەن مەديا, كينو جانە ۆيدەو, كاسىپكەرلىك تاقىرىبىندا سەكتسيالار ۇيىمداستىرىلىپ, سپيكەرلەر ارنايى ترەنينگ وتكىزدى.
«U:hack» يننوۆاتسيالىق يدەيالار فەستيۆالىندە ءار سەكتسيادا وتە وزەكتى ماسەلەلەر قوزعالىپ, جاستار تالىمگەرلەردى تاپجىلماي تىڭدادى. اسىرەسە, كونتەنت جانە مەديا, كاسىپكەرلىك بولىمدەرىنە قىزىعۋشىلىق تانىتقان جاستاردىڭ قاراسى قالىڭ بولدى. ءدارىس بارىسىندا كاسىپ باستاۋ مەن مەديا سالالارىن دامىتۋ بويىنشا ەلىمىزگە بەلگىلى مەديا-مامان, بلوگەر اليشەر ەلىكباەۆ WOWtayotacamry70 جوباسىن مىسالىعا الا وتىرىپ, جاستارعا قالاي قىزىقتى ءماتىن جازۋعا بولاتىنىن ايتتى. زاۋرە روزمات «The steppe» جاستار پورتالىنىڭ جەتەكشىسى رەتىندە بۇگىنگى ونلاين جۋرنالدار تۋرالى كەڭىنەن اڭگىمەلەدى. ال, «داۆاي سحوديم» سايتىنىڭ مامانى جانەركە باۋبەكقىزى smm جانە كوپيرايتەرتينگ جايىندا تولىققاندى ماعلۇمات بەردى. جاس بيزنەسمەن فارحات ابدىقادىر بولاشاق كاسىپكەرلەرگە قالاي بيزنەس جۇرگىزۋ كەرەك ەكەنىنە توقتالىپ ءوتتى. سۇراق جاۋاپقا جالعاسقان كەزدەسۋ سوڭىندا تىڭداۋشىلار سپيكەرلەرمەن ءوزارا پىكىر الماستى.
سونداي-اق, شىمكەنتتە وتكەن «U:hack» يننوۆاتسيالىق يدەيالار فەستيۆالىندە قالالىق N65 مەكتەپتىڭ وقۋشىلارىنان قۇرالعان INO كومانداسى قازاقشا سويلەيتىن روبوت تانىستىردى. ءموبيلدى قوسىمشامەن باسقارىلاتىن سەرۆيستىك روبوت وزدىگىنەن قوزعالىپ, قازاقشا قويىلعان سۇراقتارعا جاۋاپ بەرە الادى. جوبا اۆتورى ەلدوس تۇراننىڭ ايتۋىنشا, بۇل روبوت قۇراستىرۋعا 1 اپتا ۋاقىت جۇمساعان. ونى Ino.Lab يننوۆاتسيالىق زەرتحاناسىندا جاساپ شىققان. جاس ونەرتاپقىشتار بۇگىندە اتالعان زەرتحانادا اقپاراتتىق تەحنولوگيالاردى مەڭگەرىپ ءجۇر. ولار بولاشاقتا جاساندى ينتەللەكتپەن جۇمىس ىستەيتىن وسىنداي روبوتتاردى كوپتەپ جاساماق.
وسىلايشا ءبىر جەتىدە قۇلتەمىردى قازاقشا «سايراتقان» جاسوسپىرىمدەردىڭ ەڭبەگىن ەلگە كتانىستىرعان فەستيۆال مارەسىنە جەتتى. 48 ساعاتتىق باسەكەدە ۇزدىك شىققان جوبا اۆتورلارى انىقتالىپ, جاس جەڭىمپازداردى شىمكەنت قالاسىنىڭ اكىمى عابيدوللا ءابدىراحىموۆ ماراپاتتادى.
ءىس-شاراعا قاتىسقان شاھار باسشىسى العاش رەت ۇيىمداستىرىلىپ وتىرعان بايقاۋعا وڭ باعاسىن بەرىپ, قالانىڭ جالىندى جاستارىنا ساتتىلىك تىلەدى.
«رەسپۋبليكالىق ماڭىزى بار قالادا بارلىق جاعىنان باسەكەگە ساي بولۋى كەرەك. بۇگىنگى بايقاۋعا ەلىمىزدىڭ ۇزدىك جاستارى قاتىسىپ وتىرعانىنا سەنىمدىمىن. ءبىز جاستارعا قولداۋ كورسەتۋگە ارقاشان دايىنبىز. بيىل جاستار جىلى اياسىندا اۋقىمدى جوبالار جۇزەگە اسىرىلادى», - دەدى عابيدوللا راحماتوللا ۇلى.
سونىمەن IT بولىمىنە ۇسىنىلعان 50 جۇمىستان ۇزدىك ءۇش جوبا ىرىكتەلدى. ناتيجەسىندە ءبىرىنشى ورىندى اقىلدى اربا ويلاپ تاپقان «Jastar-INOLAB» كومانداسى, ەكىنشى ورىندى «Solvet team» توبى, ال, اقىلدى جىلىجاي جوباسىن ۇسىنعان «Creat IT» ءۇشىنشى ورىندى يەلەندى.
كونتەنت جانە مەديا سەكتسياسىندا 30 جوبا ىشىنەن ء بىلىم بەرۋ سالاسىن دامىتۋعا باعىتتالعان «Doge komek» كومانداسىنىڭ جۇمىسى ۇزدىك دەپ تانىلدى. ەكىنشى ورىن «Speak Up» توبىنا, ال ءۇشىنشى ورىن زاماناۋي گراففيت بەينەلەۋ ونەرىن قولعا العان «Steet art» قىزدار كومانداسىنا بۇيىردى.
كاسىپكەرلىك بولىمىندە 74 جوبا ءادىل قازىلاردىڭ نازارىنا ۇسىنىلدى. سابىن ءوندىرۋ بيزنەسىن قورعاعان «Tean dream» توبى ءبىرىنشى ورىندى جەڭىپ السا, ۇلتتىق ناقىشتاعى زەرگەرلىك بۇيىمدار ورتالىقتارىن جانداندىرۋعا نيەتتى «شاشباۋ» كومانداسى ەكىنشى ورىنعا يە بولدى. ال, جاستار اراسىنداعى اجىراسۋ ىندەتىن ەمدەۋدىڭ وڭتايلى جولىن ۇسىنعان تارازدىق «Kelin Master» كومانداسى ۇشتىكتى قورتىندىلادى.
كينو جانە ۆيدەو سەكتسياسىنا 50 الەۋمەتتىك روليك كەلىپ تۇسكەن. العاشقى ورنىنان «Cross crew» كومانداسى كورىنسە, «Hucking perfect» توبى ەكىنشى, ەلوردالىق كوماندا ءۇشىنشى ورىندى ەنشىلەدى.
بۇل رەتكى وزىق يدەيالار بايقاۋىنىڭ ەرەكشەلىگى وتە قىسقا ۋاقىت ىشىندە ويدا جۇرگەن دۇنيەلەردى جوباعا اينالدىرىپ, ونى دامىتۋعا قارجىلاي قولداۋ الۋعا مۇمكىندىك بەرىپ وتىر. وسى رەتتە جوبا جەڭىمپازدارى مەن ۇزدىك يننوۆاتسيالىق جۇمىستار ۇسىنعان 3 كومانداعا جۇلدە قورى 2 ميلليون تەڭگەنى قۇرايتىن اقشالاي سىيلىق تابىستالدى.
ۇيىمداستىرۋشىلاردىڭ ايتۋىنشا, جىلىنا ەكى رەت وتكىزۋ جوسپارلانعان فەستيۆال كەز كەلگەن جاستىڭ كرەاتيۆتى يدەياسىن جوبا پروتوتيپىنە اينالدىراتىن جاستار الاڭىنا اينالماق. اتالعان الاڭدا ەڭ ۇزدىك الەۋمەتتىك جوبالارعا باسا نازار اۋدارىلىپ, باستاماشىل جاستاردىڭ تىڭ ۇسىنىستارىنا قولداۋ كورسەتىلەتىن بولادى.
نۇرشات توكەن,
«Egemen Qazaqstan»
شىمكەنت
