اقتوبە وبلىسىنىڭ اكىمى بەردىبەك ساپارباەۆ ۇكىمەتتىڭ 30 قاڭتار, سارسەنبى كۇنى وتكەن كەڭەيتىلگەن وتىرىسىندا مەملەكەت باسشىسى بەرگەن تاپسىرمالاردى جۇزەگە اسىرۋعا بايلانىستى جيىن وتكىزدى. وعان مەملەكەتتىك ورگانداردىڭ, كوممۋنالدى كاسىپورىنداردىڭ, قوعامدىق ۇيىمداردىڭ باسشىلارى جانە ت.ب. قاتىستى.
بەردىبەك ساپارباەۆ: ء«بىزدىڭ باستى مىندەتىمىز – پرەزيدەنت تاپسىرماسىن ساپالى ءارى بەلگىلەنگەن مەرزىمدە ورىنداۋ. ەلباسى قويعان مىندەتتەردىڭ بارلىعى دا حالىقتىڭ ءال-اۋقاتىن جاقسارتۋعا باعىتتالعان. ەڭ الدىمەن, بەس الەۋمەتتىك باستامانى ساپالى جۇزەگە اسىرۋ كەرەك. ءبىز قازىرگى تاڭدا «7-20-25» باعدارلاماسى بويىنشا بارلىق رەزەرۆتەردى پايدالانىپ وتىرعان جوقپىز. وبلىس وتكەن جىلعى ەكونوميكا ءوسىمىن 5%-بەن اياقتادى, وسى جىلى ودان كەم بولماۋى ءتيىس. جۇمىسقا جىل باسىنان-اق بەلسەندى ارالاسىپ, مەملەكەتتىك باعدارلامالاردىڭ ءتيىمدى جۇزەگە اسىرىلۋىن قامتاماسىز ەتۋ قاجەت», - دەپ اتاپ ءوتتى.
وبلىس اكىمى جاستار جىلىنىڭ ءتيىمدى جۇزەگە اسىرىلۋىنا, سونىڭ ىشىندە جاستار كاسىپكەرلىگىن دامىتۋعا نازار اۋداردى. ايتا كەتەيىك, جالپى, شاعىن جانە ورتا بيزنەستى نەسيەلەۋگە بيىل 5 ملرد تەڭگە اۋدارىلماق. قارىزدى ۋاقىتىندا جانە 100% بەرۋ, قاراجاتتى يگەرۋ تاپسىرىلدى.
ونەركاسىپ سالاسىندا يمپورتتى الماستىرۋ جانە ەكسپورت ءونىمىن ارتتىرۋ جوباسىن جۇزەگە اسىرۋعا باسىمدىق بەرىلەتىن بولادى. «بيىل ۇكىمەت يمپورتتى الماستىرۋ مەن ەكسپورتتاۋعا باعىتتالعان جوبالاردى قولداۋ ءۇشىن 600 ملرد تەڭگە بولەدى. ءوندىرىستىڭ ازىرلەنگەن تەڭگەرىمى مەن وبلىستىڭ تۇتىنۋى نەگىزىندە باسىم جوبالاردى انىقتاپ, ولاردىڭ اتالعان باعدارلاماعا ەنگىزىلۋىنە جۇمىستانۋدى تاپسىرامىن. وتاندىق اۆتوونەركاسىپتى قولداۋدىڭ جاڭا باعدارلاماسى ىسكە قوسىلادى. وبلىستىڭ وعان قاتىسۋ الەۋەتىن, سونىمەن قاتار, اۆتووموبيل, قۇرامداس بولشەكتەر, اۋىل شارۋاشىلىعى تەحنيكاسى ءوندىرىسىنىڭ مۇمكىندىگىن قاراستىرۋ كەرەك», - دەدى بەردىبەك ساپارباەۆ.
مەملەكەت باسشىسىنىڭ ازاماتتاردى باسپانامەن قامتاماسىز ەتۋ تاپسىرماسىن ورىنداۋ ماقساتىندا بيىل اقتوبە وبلىسىندا كەم دەگەندە 1 ملن شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. سونداي-اق, قۇرىلىستاعى جەرگىلىكتى قۇرىلىس ماتەريالدارىنىڭ مازمۇنىن قازىرگى 85 پايىزدان 90 پايىزعا دەيىن ارتتىرۋ مىندەتى تۇر.
وبلىس اكىمى: «جاڭا كوپپاتەرلى ۇيلەردىڭ ءبىرىنشى قاباتتارىندا الەۋمەتتىك نىساندار سالۋ كەرەك, ماسەلەن, بالاباقشا, مەديتسينالىق نەمەسە پوليتسيا بەكەتتەرىن, مەكتەپتەن تىس بالالار مەكەمەسىن. بۇگىندە ءبىرىنشى قاباتتاردى نەگىزىندە كوممەرتسيالىق الاڭدار رەتىندە سالادى, بىراق بۇل الەۋمەتتىك نىساندار تۇرعىندارعا اناعۇرلىم ماڭىزدىراق ءارى قاجەت», - دەگەن سەنىمدە.
اۋىل شارۋاشىلىعىنىڭ ءوسۋ رەزەرۆى كوبىرەك. پرەزيدەنت تاپسىرماسىنا سايكەس, اۋىل شارۋاشىلىعىندا وسى جىلى جاڭا تەحنولوگيالاردى ەنگىزۋ, مال جانە وسىمدىك شارۋاشىلىقتارىنىڭ ونىمدىلىگىن كوتەرۋ, مەملەكەتتىك-جەكە سەرىكتەستىكتى, سونىڭ ىشىندە سۋارمالى ەگىنشىلىكتى, اۋىل شارۋاشىلىعى ونىمدەرى باعاسىنىڭ نەگىزسىز وسۋىنە جول بەرمەۋ ءۇشىن كوتەرمە-تاراتۋ ورتالىقتارىنىڭ جەلىلەرىن دامىتۋ جۇمىستارى باسىم. تاعى ءبىر مىندەت – اۋىل شارۋاشىلىعى ونىمدەرىن قايتا وڭدەيتىن جانە ازىق-ت ۇلىك قاۋىپسىزدىگىن قامتاماسىز ەتەتىن كاسىپورىنداردى بارىنشا ىسكە قوسۋ.
«2018 جىلى سۋارمالى جەرلەر الاڭى 30,2 مىڭ گەكتارعا دەيىن ءوستى, وسى جىلى 40 مىڭ گەكتارعا جەتكىزۋ كەرەك. اۋىل شارۋاشىلىعىنداعى قايتا وڭدەۋ جىل سايىن 5-7 پايىزعا ءوسىپ كەلەدى, بىراق ەت, ءسۇت كومبيناتتارىنىڭ قۋاتتىلىعى ءبارىبىر 50% عانا ىسكە قوسىلعان. ولاي بولمايدى. بىزدە سول ءسۇت پەن ءسۇت ونىمدەرىنە دەگەن قاجەتتىلىكتى تولىقتاي قامتاماسىز ەتەتىن الەۋەت بار. مەملەكەت قولداۋى بار. تەك ءسۇت جينايتىن كاسىپورىنداردى بىرىكتىرۋ جانە ءسۇت تاۋارلى فەرمالاردى قۇرۋ جۇمىستارىن كۇشەيتىپ, شيكىزاتتى جيناۋ جاعىن جولعا قويۋ قاجەت. اۋىل تۇرعىندارىنا سۇتتەرىن قايتا وڭدەۋ كاسىپورىندارىنا تاپسىرا الاتىندارىن ءتۇسىندىرۋ كەرەك. مىسالى «ايس» جشس ءبىر ليتر ءسۇتتى 100 تەڭگەگە ساتىپ الادى. بۇل اۋىل تۇرعىنى ءۇشىن ۇلكەن كومەك. سونداي-اق, 2019 جىلى ەت ەكسپورتىنىڭ كولەمىن 4 مىڭ تونناعا دەيىن ۇلعايتىپ, ەكسپورتقا جىبەرىلەتىن اۋىل شارۋاشىلىعى ونىمدەرىن قايتادان تەرەڭدەي وڭدەيتىن جاڭا ءوندىرىس ورىندارىن قۇرۋعا ەرەكشە كوڭىل بولگەن ءجون», - دەدى ءوڭىر باسشىسى.
سونىمەن قاتار, اقتوبە وبلىسىندا بيىل وڭدەۋ ونەركاسىبى سالاسىنداعى جوبالاردى جۇزەگە اسىرۋ, جەكەشەلەندىرۋ, ينۆەستيتسيا تارتۋ, شوب-ءتى دامىتۋ, قارجى جۇيەسىنىڭ تۇراقتىلىعىن قامتاماسىز ەتۋ, كولەڭكەلى ايناملىممەن كۇرەس, جۇمىسشىلاردىڭ قۇقىقتارى مەن ەڭبەك زاڭناماسىنىڭ بۇزىلۋىنىڭ جولىن كەسۋ, مەكتەپتەردى نازارباەۆ زياتكەرلىك مەكتەبىنىڭ ستاندارتتارى بويىنشا جاراقتاندىرۋ جانە ادىستەمەلەرىن تاراتۋ, جوعارى جانە ارنايى ورتا وقۋ ورىندارىنداعى ءبىلىم ساپاسىن ارتتىرۋ جۇمىستارى كۇشەيتىلمەك. بەردىبەك ساپارباەۆ وبلىستىڭ 500 شاقىرىمدىق اۆتوكولىك جولىنىڭ ساپالى جوندەلۋىن قامتاماسىز ەتۋ, كوممۋنالدى قىزمەتتەر ءتاريفىنىڭ, ءبىرىنشى قاجەتتىلىكتەگى ازىق-ت ۇلىكتەر مەن ءدارى-دارمەكتەر باعاسىنىڭ نەگىزسىز وسۋىنە جول بەرمەۋ ماسەلەلەرى قاتاڭ باقىلاۋدا بولۋ كەرەكتىگىن اتاپ ءوتتى.
وبلىس اكىمى: «حالىقتى تولعاندىراتىن سۇراقتاردىڭ ءبىرى – مەديتسينالىق قىزمەتتەردىڭ ساپالىلىعى مەن قول جەتىمدىلىگى. دەنساۋلىق ساقتاۋ باسقارماسى بۇل ىسپەن تىعىز اينالىسۋى كەرەك. بىزدەر, ءوز تاراپىمىزدان بيىل جەدەل جاردەم قىزمەتىن اۆتوموبيلدەرمەن قامتاماسىز ەتۋ سۇراعىن شەشۋ ارقىلى قولداۋ كورسەتەتىن بولامىز»,- دەپ جەتكىزدى.
قوعامدىق قاۋىپسىزدىكتى قامتاماسىز ەتۋ ماقساتىندا قۇقىق قورعاۋ ورگاندارىنا قۇقىقبۇزۋشىلىقتىڭ, اسىرەسە كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ جانە ەسكەرتۋ جۇمىسىن كۇشەيتۋ تاپسىرىلدى. ءدال وسى ماقساتتا اعىمداعى جىلدىڭ ناۋرىز ايىندا ءوزىن وڭ جاعىنان كورسەتكەن "حالىق قاۋىپسىزدىگىن قامتاماسىز ەتۋ" جوباسى جاڭعىرتىلادى.
«ەلباسى قويعان مىندەتتەردىڭ ساپالى جۇزەگە اسىرىلۋى بىزگە الەمنىڭ دامىعان وتىز ەلى قاتارىنا ەنۋگە مۇمكىندىك بەرەدى. مەن سىزدەردىڭ ارقايسىسىڭىزدان سولاردى ورىنداۋدا ەرەكشە جاۋاپكەرشىلىكپەن قاراۋلارىڭىزدى سۇرايمىن», - دەدى جيىندى تۇيىندەگەن بەردىبەك ساپارباەۆ.
تەمىر قۇسايىن,
اقتوبە وبلىسى
