«بۇل مەن ءۇشىن تاماشا ستسەناري, ويتكەنى مەن گولوۆكينمەن ءبىرىنشى جەكپە-جەكتە جەڭىسكە جەتكەنىمە سەنىمدىمىن. سوندىقتان, مەن «كانەلونى» جەڭگەن كەزدە, گولوۆكينمەن ەسەپتى تەڭەستىرۋ ءۇشىن رەۆانش الامىن. ءوز الدىمدا, مەن ونى جەڭدىم», - دەدى دەنيەل دجەيكوبس lvsportsnetwork.com سايتىنا بەرگەن سۇحباتىندا.
بوكسشى ساۋل الۆارەستىڭ وتە مىقتى قارسىلاس ەكەنىن تۇسىنەدى, بىراق ول 4 مامىردا جەڭىسكە جەتۋ ءۇشىن وزىندەگى مىقتى تۇستارىنىڭ بارلىعىن ىسكە قوساتىنىن ايتادى.
«مەن فيزيكالىق تۇرعىدان ودان مىقتىمىن, بويىم دا بيىك, دەنەمدە ءىرى. ول ماعان قاراعاندا الدەقايدا كىشىرەك. سوندىقتان مەن ءوز بويىمدى, اراقاشىقتىقتى جانە قولىمنىڭ ۇزىندىعىن پايدالانا الامىن. مەن ونىڭ سپورتتاعى مانسابىنداعى ەڭ ءىرى قارسىلاسپىن. الۆارەس كوپتەگەن ماڭىزدى فاكتورلاردى ەسكەرۋ كەرەك, بىراق ول دارىندى بوكسشى, سوندىقتان ماعان دا ۇلكەن جۇمىس ىستەۋ كەرەكتىگىن تۇسىنەمىن», - دەدى دجەيكوبس.
«بوكستىڭ ەڭ ءىرى جۇلدىزدارىنىڭ بىرىنە قارسى شىعۋعا مۇمكىندىك الۋ تاماشا. ەگەر مەن وعان جەڭىسكە جەتسەم, ول مەنى ءوز بۋىنىنىڭ ەڭ ۇزدىك ورتا سالماقتارىنا اينالدىرادى. «كانەلو» ماعان بۇل مۇمكىندىك بەرگەنىنە قۋانىشتىمىن. كورەرمەندەردى تاماشا جەكپە - جەك كۇتىپ تۇر», - دەپ اتاپ ءوتتى ول.
ايتا كەتەيىك, گولوۆكين دجەيكوبستى تورەشىلەردىڭ ءبىراۋىزدان شىعارعان شەشىمىمەن جەڭگەن ەدى. سونىمەن قاتار, قازاقستاندىق بوكسشى سپورتتىق مانسابىندا العاش رەت 12 راۋند بويى جۇدىرىقتاستى.
گولوۆكين كەلەسى جەكپە-جەگىندە «كانەلومەن» كەزدەستى. بۇل جەكپە-جەك 2017 جىلدىڭ قىركۇيەك ايىندا لاس-ۆەگاستا ءوتتى. 12 راۋندتىڭ قورىتىندىسى بويىنشا كەزدەسۋ تەڭ اياقتالدى, بىراق بۇل قازاقستاندىق بوكسشىعا ورتا سالماقتاعى WBA Super, WBC, IBF جانە IBO تيتۋلدارىن ساقتاۋعا مۇمكىندىك بەردى.
ءبىر جىلدان كەيىن گولوۆكين مەن «كانەلو» تاعى دا لاس-ۆەگاستا كەزدەستى. بۇل جولى تورەشىلەر مەكسيكالىق بوكسشىعا جەڭىستى بەردى. گولوۆكين WBA Super, WBC جانە IBO تيتۋلدارىن ايىرىلدى. سونداي-اق, الۆارەس The Ring چەمپيونى اتاعىن جەڭىپ الدى.
