ماشينا قۇراستىرۋ ءىسى جولعا قويىلىسىمەن بۇرىن شيكىزات باعىتى باسىم ەلىمىزدە وڭدەۋ ونەركاسىبىنىڭ قادامى ىلگەرى باسا باستادى. وسىدان ون-ون بەس جىلداي بۇرىن ماشينا قۇراستىرۋ تۋرالى تۇسىنىك بولماعانى راس. تۇرعىندار ماشينا تەك شەتەلدەن عانا شىعادى دەپ ويلايتىن سەكىلدى ەدى. ەلباسىنىڭ باستاماسى ارقاسىندا شەتەلدەردەگى ۇزدىك برەندتەردى وزىمىزدە قۇراستىرا باستادىق. بىراق قانداي تاۋار بولسا دا, ونىڭ ءوتىمى دۇرىس بولماي, ءوندىرىلۋى دامىپ كەتپەيتىنى, ەكونوميكاعا كەرى اسەر بەرەتىنى ءسوزسىز. سوندىقتان جەڭىلدىكپەن بەرىلەتىن اۆتونەسيە مەن قارجىلىق ليزينگىلەرگە قول جەتكىزەتىن مەملەكەتتىك باعدارلامالار جەڭىل كولىك العىسى كەلەتىن تۇرعىندار مەن مۋنيتسيپالدىق كاسىپورىندارعا مول مۇمكىندىك جاسادى. 2018 جىلدىڭ قورىتىندىسى بويىنشا وسى ماقساتقا بولىنگەن مەملەكەتتىك قارجىنىڭ بارلىعى تۇگەل يگەرىلدى. قازاقستاندىقتارعا جەڭىلدىكپەن بەرىلەتىن كرەديت بويىنشا باعدارلاما باستالىسىمەن 34 ملرد تەڭگە بولىنگەن بولاتىن, سونىڭ ارقاسىندا 13 000 ماشينا ساتىلدى. جەڭىلدىكپەن بەرىلگەن ليزينگ بويىنشا 16 ملرد تەڭگە ءبولىنىپ, ونىڭ 12,8 ملرد تەڭگەسى يگەرىلدى, وعان كوممەرتسيالىق 773 كولىك ساتىلدى. مۇنداي باعدارلاما ءوزىن اقتادى دەپ ويلايمىز, قايتارىمدى قارجى نەگىزىندە ءوندىرىستى ينۆەستيتسيالاۋدىڭ ءتيىمدى قۇرالىنا اينالدى. مۇنى تاپتىشتەپ ايتىپ وتىرعانىم, ءبىزدىڭ تۇتىنۋشىلارىمىز وتاندىق وندىرىستەن شىققان اۆتوموبيلدەردى ساتىپ الۋعا دايىن ەكەنىن, مۇنداي جەڭىلدىكتەر تۇرعاندا سىرتتان يمپورتتىق كولىكتەر ىزدەمەيتىنىن كورسەتتى. ەكىنشى جاعىنان مۇنداي جەڭىلدىكتەر تەحنيكانى ۋاقىتىلى, كەم دەگەندە ايىنا 150 بىرلىك كولىكتى قازاقستان بويىنشا ساتىپ وتىرۋعا, سول ارقىلى وتاندىق ءاۆتووندىرىستى دامىتۋعا ىقپال ەتەدى.
وتاندىق تۇتىنۋشىلاردىڭ جەڭىلدىك كرەديتكە سۇرانىسى ءوسىپ وتىر. ۇلتتىق بانك توراعاسىنىڭ حابارى وتە جاعىمدى جاڭالىق بولدى دەپ بىلەمىن. ويتكەنى قازىر قازاقستاندىقتاردىڭ بارلىعى ەلىمىزدىڭ قالاعان قالاسىنان باسپانا الۋعا قول جەتكىزىپ جاتقان ءتيىمدى باعدارلاما اۆتوكولىك الۋعا دا جاسالاتىن بولسا, ودان ءۇش جاقتى تيىمدىلىك بولار ەدى, ياعني تۇتىنۋشى, ءوندىرىس, مەملەكەت قاتار ۇتاتىن بولادى. قايتارىمى بار قوسىمشا قارجىلاندىرۋ وندىرىسكە قوسىمشا جۇمىس ورنىن اشۋعا, بيۋدجەتكە تۇسەتىن سالىق كولەمىن ۇلعايتا تۇسۋگە, اۆتوموبيل ءوندىرىسىن دامىتىپ, ونىڭ نارىعىن كەڭەيتە تۇسۋگە مۇمكىندىك بەرەدى.
تۇتىنۋشىلار قازىر قوستانايداعى «سارىارقااۆتوپروم» ماشينا جاساۋ زاۋىتىنىڭ ءونىمىن تاڭداپ الاتىنداي جوعارى دەڭگەيگە جەتتىك. بۇل ءۇشىن ماقتانىش تا رارتىق ەمەس. وتكەن جىلى ماشينا قۇراستىرۋ 13 پروتسەنتكە ارتتى. بيىل 25 مىڭ تەمىر تۇلپاردى ساپقا قويامىز دەپ وتىرمىز. وتكەن جىلدىڭ سوڭىنا قاراي كەلىسىم جاسالعان قىتايدىڭ اۆتوموبيل يمپورتى جانە ەكسپورتى بويىنشا مەملەكەتتىك ترانسۇلتتىق سمس كومپانياسى الليۋر كومپانيالار توبىنىڭ كاپيتالىنا كىرگەنى بەلگىلى. 1,1 ملرد دوللار ينۆەستيتسيا سالعان قىتايلىق ارىپتەستەر وتاندىق اۆتووندىرىسىندە جىلىنا 80 مىڭ اۆتوموبيل شىعارۋدى جوسپارلاپ وتىر. ەلىمىزدىڭ باس بانكيرى ايتقان قۋانىشتى حابار ءىس جۇزىندە دە تۇتىنۋشىلاردى قۋانىشقا بولەيدى دەپ ويلايمىز.
ەربول سەيپىلوۆ,
«قازاقستان اۆتوبيزنەسى قاۋىمداستىعى» زتب تەحنيكالىق رەتتەۋ جونىندەگى ديرەكتورى
