85 جىل دەنساۋلىق كۇزەتىندە
سارسەنبى, 7 قاراشا 2012 7:25
«الماتى تاۋەرس» كەشەنىندە الماتى قالاسى دەنساۋلىق ساقتاۋ باسقارماسىنىڭ قۇرىلعانىنا 85 جىل تولۋىنا وراي «دەنساۋلىق ساقتاۋ سالاسىنىڭ وزەكتى ماسەلەلەرى» اتتى حالىقارالىق كونگرەسس ءوتتى. ەلىمىزدىڭ مەديتسينا سالاسىنىڭ تانىمال عالىمدارى, عىلىمي-زەرتتەۋ ينستيتۋتتارى مەن ورتالىقتارىنىڭ باسشىلارى, قالانىڭ مەديتسينا قاۋىمى وكىلدەرى مەن ارداگەرلەرى باس قوسقان القالى جيىنعا قاتىسۋشىلار دەنساۋلىق ساقتاۋ سالاسىنىڭ زاماناۋي باسقارۋ تاسىلدەرىن, سونداي-اق وسىناۋ ماڭىزدى سالانى دامىتۋدا قاي باعىتقا ەرەكشە نازار اۋدارۋ قاجەتتىگىن تالقىلادى.
سارسەنبى, 7 قاراشا 2012 7:25
«الماتى تاۋەرس» كەشەنىندە الماتى قالاسى دەنساۋلىق ساقتاۋ باسقارماسىنىڭ قۇرىلعانىنا 85 جىل تولۋىنا وراي «دەنساۋلىق ساقتاۋ سالاسىنىڭ وزەكتى ماسەلەلەرى» اتتى حالىقارالىق كونگرەسس ءوتتى. ەلىمىزدىڭ مەديتسينا سالاسىنىڭ تانىمال عالىمدارى, عىلىمي-زەرتتەۋ ينستيتۋتتارى مەن ورتالىقتارىنىڭ باسشىلارى, قالانىڭ مەديتسينا قاۋىمى وكىلدەرى مەن ارداگەرلەرى باس قوسقان القالى جيىنعا قاتىسۋشىلار دەنساۋلىق ساقتاۋ سالاسىنىڭ زاماناۋي باسقارۋ تاسىلدەرىن, سونداي-اق وسىناۋ ماڭىزدى سالانى دامىتۋدا قاي باعىتقا ەرەكشە نازار اۋدارۋ قاجەتتىگىن تالقىلادى. سونداي-اق , فورۋم اياسىندا الەمنىڭ 15 ەلىنەن, ياعني رەسەي, اقش, ينديا, اۆستريا, جاپونيا, نيدەرلاندى, بەلارۋس, ليتۆا, فينليانديا, شۆەتسيا, حورۆاتيا, وڭتۇستىك كورەيا, گەرمانيا, پولشا, قىرعىزستاننان كەلگەن مەديتسينا سالاسىنىڭ جەتەكشى ماماندارى شەبەرلىك سىنىپتارىن وتكىزىپ, وتاندىق دارىگەرلەرمەن تاجىريبە الماسۋى كونگرەستىڭ مازمۇنىن ارتتىرا ءتۇستى.
مەرەيتويلىق جيىننىڭ بەتاشارى وتكەندى ەكشەپ, تارازىلاپ الۋ ماقساتىندا الماتى قالاسى دەنساۋلىق ساقتاۋ جۇيەسىنىڭ تاريحىنا ارنالعان دەرەكتى ءفيلمدى كورسەتۋمەن باستالدى. ودان كەيىن ءسوز العان الماتى قالاسى اكىمىنىڭ ورىنباسارى سەرىك سەيدۋمانوۆ قالا تۇرعىندارىنىڭ دەنساۋلىعىن ساقتاۋ ءىسىندە اق حالاتتى ابزال جانداردىڭ جانكەشتى ەڭبەكتەرىن جوعارى باعالاي كەلە, 1927 جىلدىڭ 1 قازانىندا الماتى قالاسى دەنساۋلىق ساقتاۋ باسقارماسى قۇرىلعان كەزدە ونىڭ قۇرامىندا مەڭگەرۋشى مەن حاتشى عانا قىزمەت اتقارسا, ال قازىرگى تاڭدا 82 قالالىق, 40-تان استام رەسپۋبليكالىق, 950 جەكەمەنشىك مەديتسينالىق مەكەمە بارىن ماقتانىشپەن اتاپ ءوتتى. بۇگىندە قالالىق مەكەمەلەردىڭ وزىندە 5 مىڭعا جۋىق دارىگەر مەن 9 مىڭنان استام ورتا مەديتسينا قىزمەتكەرلەرى جۇمىس جاسايتىنىن تىلگە تيەك ەتتى.
اكادەميكتەر تورەگەلدى شارمانوۆ پەن كامال ورمانتاەۆ الماتىلىق ارىپتەستەرىن مەرەيتويلارىمەن قۇتتىقتاپ, جۇرەكجاردى ىستىق لەبىزدەرىن ءبىلدىردى, كونگرەسس جۇمىسىنا ساتتىلىك تىلەدى. دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى اجار تولەعاليەۆا الدىمەن دەنساۋلىق ساقتاۋ مينيسترلىگى مەن مينيستر س.قايىربەكوۆانىڭ اتىنان جينالعانداردى مەرەيتويعا ارنالعان ءىس-شارانىڭ اشىلۋىمەن قۇتتىقتاپ, قازىرگى تاڭدا الماتى قالاسىنىڭ مەديتسيناسى قازاقستاننىڭ دەنساۋلىق ساقتاۋ جۇيەسىنىڭ الدىڭعى لەگىندە ەكەنىن, مەديتسينالىق كومەك تەك قالا تۇرعىندارىنا عانا ەمەس, ەلىمىزدىڭ ايماقتارىنان كەلەتىندەرگە دە كورسەتىلەتىنىن جەتكىزدى. «سوڭعى 20 جىلدا قازاقستاننىڭ دەنساۋلىق ساقتاۋ سالاسىنىڭ بارلىق باعىتىندا جۇيەلى دامۋ ۇدەرىسى جۇرۋدە. وندا قارجىلاندىرۋ 10 ەسەدەن استامعا ءوسىپ, 500-گە جۋىق جاڭا نىساندار سالىنسا, سوڭعى 3 جىلدا الماتىدا ەڭ زاماناۋي قۇرالدارمەن جابدىقتالعان 11 جاڭا اۋرۋحانا مەن ەمحانا بوي كوتەردى. بۇگىندە الماتى ەڭ كۇردەلى وتالار جاسايتىن مەديتسينالىق ورتالىققا اينالدى. ماسەلەن, جۇرەك, باۋىر, بۇيرەك اۋىستىرۋ بۇرىن جاسالماعان وتالار. ەندەشە, الماتىنىڭ ءمۇمكىنشىلىگى زور, بۇگىنگىسى مارتەبەلى, بولاشاعى جارقىن», – دەدى اجار تولەعاليەۆا.
سونداي-اق, كونگرەستە س.اسفەندياروۆ اتىنداعى قازۇمۋ-دا «دەنساۋلىق ساقتاۋ سالاسىنداعى مەنەدجمەنت», «تەراپيا», «كارديولوگيا», ورتالىق قالالىق كلينيكالىق اۋرۋحانادا «حيرۋرگيا», №2 بالالار قالالىق كلينيكالىق اۋرۋحانادا «اكۋشەرلىك-گينەكولوگيا, نەوناتولوگيا-پەدياتريا, انەستەزيولوگيا-رەانيماتسيا», №4 قالالىق كلينيكالىق اۋرۋحانادا «تراۆماتولوگيا» تاقىرىپتارى بويىنشا پلەنارلىق كەڭەستەر وتكىزىلدى. وندا اتالمىش ءار سالا بويىنشا وزەكتى ماسەلەلەر كوتەرىلىپ, ولاردى شەشۋ جولدارى قاراستىرىلدى.
گۇلزەينەپ سادىرقىزى,
«ەگەمەن قازاقستان».
