بارلىق تىلەك بىلدىرۋشىلەر ىشىندە اسپازدار جانە ناۋبايشىلاردىڭ ىرىكتەۋ سايىسىنا 13 كوماندا قاتىستى. سايىستىڭ ەرەجەلەرىنە سايكەس «دالا اسحانا» سايىسى ەكى كەزەڭنەن تۇردى. ءبىرىنشى كەزەڭدە اسپازدار مەن ناۋبايشىلار جاۋىنگەرلىك دايىندىعىن كورسەتىپ, اۆتوماتاتتان وقۋ-اتىس جاتتىعۋىن ورىنداسا, ەكىنشى كەزەڭدە «كوماندا قۇرامىندا اس دايىنداپ, نان پىسىرۋدەن باسەكەلەستىك» تانىتتى.
قازىلار القاسىنىڭ شەشىمىمەن ىرىكتەۋ جارىسىنىڭ قورىتىندىسى بويىنشا, كوماندالىق ەسەپتە اسكەري بولىمدەر اراسىندا جەڭىمپاز بولىپ 10181 جانە 27943 اسكەري بولىمدەرىنىڭ اسپازدارى مەن ناۋبايشىلارى تانىلدى,دەدى «شىعىس» وڭىرلىك قولباسشىلىعى ءباسپاسوز قىزمەتىنىڭ جەتەكشىسى, اعا لەيتەنانت يسلامبەك قالدىبەكوۆ.
يسلامبەك قالدىبەكوۆتىڭ ايتۋىنشا, بيىل تامىز ايىندا اسكەري سالاداعى اس جانە نان پىسىرۋشىلەرىنىڭ حالىقارالىق سايىسى رەسەي فەدەراتسياسىنىڭ الابينو وقۋ-جاتتىعۋ الاڭىندا وتەدى. قازاقستاندىق اسكەري اسپازداردىڭ ۇزدىكتەرى وسىعان قاتىسۋعا جولداما الادى.
ايتا كەتۋ كەرەك, ارميانىڭ حالىقارالىق ويىندارى 28 سالا بويىنشا قازاقستان مەن شەت مەملەكەتتەردىڭ اسكەري ماماندارىنىڭ ەڭ كۇشتى وكىلدەرىن انىقتايتىن 2015 جىلدان بەرى ءداستۇرلى تۇردە وتكىزىپ كەلە جاتقان جارىستار.
راۋشان قابجانقىزى,
«ەگەمەن قازاقستان»
سەمەي
