ينۆەستيتسيالىق قىزمەت تۋرالى تولىق ەسەپ سالىمشىلاردىڭ زەينەتاقى جيناقتارى قانداي جانە قانشا مولشەردەگى باعالى قاعازدارعا, قانداي نارىقتىق باعا بويىنشا ينۆەستيتسيالاناتىنى جايىنداعى ماعلۇماتتاردان تۇرادى.
2019 جىلدىڭ 1 قاڭتارىنداعى جاعداي بويىنشا قازاقستان رەسپۋبليكاسى ۇلتتىق بانكىنىڭ سەنىمگەرلىكپەن باسقارۋىنداعى بجزق اق زەينەتاقى اكتيۆتەرى 9 378,03 ملرد تەڭگەنى قۇراپ,ءبىر جىلدا 1 603,21 ملرد تەڭگەگە ياعني, 20,62 پايىزعا ءوستى.
بىرىڭعاي جيناقتاۋشى زەينەتاقى قورى (بۇدان ءارى – بجزق, قور) سالىمشىلارىنىڭ جەكە زەينەتاقى شوتتارىنا ەسەپتەلگەن تازا ينۆەستيتسيالىق تابىس سوماسى 2018 جىلى 917,1 ملرد تەڭگەنى قۇرادى. قوردىڭ زەينەتاقى اكتيۆتەرى بويىنشا ينۆەستيتسيالىق تابىستىلىعىنىڭ مولشەرى 2018 جىلى 11,27 پايىزدى قۇراسا, بۇل كەزدەگى ينفلياتسيا 5,3 پايىزدى كورسەتتى. وسىلايشا زەينەتاقى اكتيۆتەرى بويىنشا ناقتى تابىستىلىق 2018 جىلى 5,97 پايىز بولدى.
قوردىڭ زەينەتاقى اكتيۆتەرى پورتفەلىنىڭ نەگىزگى بولىگى قازاقستان رەسپۋبليكاسىنىڭ مەملەكەتتىك قۇندى قاعازدارىنا (43,27 پايىز) تيەسىلى. ەسەپتىك كۇنگە دەيىن تەڭگەدە نومينالدانعان مەملەكەتتىك قۇندى قاعازدار بويىنشا وتەۋگە قاتىستى ورتاشا تابىستىلىق جىلىنا 6,9 پايىزدى, ال اقش دوللارىندا جىلىنا 4,4 پايىزدى قۇرادى.
ەلىمىزدىڭ كۆازيمەملەكەتتىك ۇيىمدارىنىڭ وبليگاتسيالارى زەينەتاقى اكتيۆتەرىنىڭ ينۆەستيتسيالىق پورتفەلىنىڭ 13,86 پايىزىنا جەتكەن. 2019 جىلدىڭ 1 قاڭتارىنا دەيىن تەڭگەدە نومينالدانعان قر كۆازيمەملەكەتتىك ۇيىمدارىنىڭ وبليگاتسيالارى بويىنشا وتەۋگە قاتىستى ورتاشا تابىستىلىق جىلدىق 10,3 پايىزدى, ال اقش دوللارىنا – جىلدىق 5,0 پايىزدى قۇرادى.
2019 جىلدىڭ 1 قاڭتارىنا قاراي زەينەتاقى اكتيۆتەرى پورتفەلىندەگى دەپوزيتتەر ۇلەسى 2,9 پايىزدى قۇراپ, ولاردىڭ وتەۋگە قاتىستى ورتاشا تابىستىلىعى جىلدىق 9,6 پايىزدى كورسەتتى.
2019 جىلدىڭ 1 قاڭتارىنا قاراي قر ەكىنشى دەڭگەيدەگى بانكتەرىنىڭ وبليگاتسيالارى زەينەتاقى اكتيۆتەرى پورتفەلىنىڭ 13,5 پايىزىن قۇرادى. تەڭگەدە نومينالدانعان وبليگاتسيالاردى وتەۋگە قاتىستى ورتاشا تابىستىلىق جىلدىق 10 پايىزدى, ال اقش دوللارىندا جىلدىق 6,6 پايىزدى كورسەتتى.
2019 جىلدىڭ 1 قاڭتارىنا قاراي شەتەلدەردىڭ مەملەكەتتىك قۇندى قاعازدارىنا شەتەل ۆاليۋتاسىندا نومينالدانعان ينۆەستيتسيالار ۇلەسى 12,7 پايىزدى قۇراپ, وتەۋگە قاتىستى ورتاشا تابىستىلىق جىلدىق 3,9 پايىزدى كورسەتتى.
قوردىڭ زەينەتاقى اكتيۆتەرى ەسەبىنەن ساتىپ الىنعان قارجى قۇرالدارى نومينالدانعان ۆاليۋتا بويىنشا قارجى قۇرالدارىنىڭ ينۆەستيتسيالىق پورتفەلى بىلايشا كەلتىرىلگەن; قۇندى قاعازداردىڭ 67,2 پايىزى ۇلتتىق ۆاليۋتادا ينۆەستيتسيالانعان, اقش دوللارىندا – 32,37 پايىز , وزگە ۆاليۋتالاردا – 0,4 پايىز. سەنىمگەرلىكپەن باسقارۋداعى بجزق زەينەتاقى اكتيۆتەرىنىڭ قۇرىلىمدىق ءبولۋى بجزق-نىڭ ينۆەستيتسيالىق دەكلاراتسياسىنىڭ تالاپتارىنا سايكەس كەلەدى.
ايناش ەسالي,
«Egemen Qazaqstan»
الماتى
