اۋدارما • 27 قاڭتار، 2019

شەكارادا قازا تاپقان ميگرانتتار

432 رەتكورسەتىلدى

تەحاس شتاتىنداعى برۋكس اۋدانىنىڭ ورتالىعى فالفۋررياستان تاياۋ ماڭداعى شەكاراعا دەيىن كولىكپەن ءبىر جارىم ساعات ۋاقىت كەتەدى. 

انتروپولوگيا فاكۋلتەتىنىڭ ستۋدەنتتەرى تەحاستاعى قوعامدىق مازاراتتا ميگرانتتاردىڭ بەلگىلەنبەگەن قابىرىن تابۋ ءۇشىن ور قازىپ جاتىر. مەريديت كوحۋت، «نيۋ-يورك تايمس»

ازام احمەد، مەريديت كوحۋت،

«نيۋ-يورك تايمس» – فالفۋررياس (تەحاس، اقش)

اۆتوماگيسترال باستالعان تەحاس شتاتى بۇتالى القاپقا جالعاسىپ، الاسا اعاشتار ءار جەرگە ۇيىسىپ، تىكەندى تالدار قۇمدى جازىققا دەيىن جالعاسىپ جاتىر. مەسكيتتەر، كولەوگين، اكاتسيا سەكىلدى بۇتالى وسىمدىكتەر كوكجيەكتەن ۇيىسىپ كورىنەدى.

شەكارا 125 كيلومەتر قاشىقتا جاتىر. كەيىنگى 15 جىلدا برۋكس اۋدانى ارقىلى شەكارادان وتۋگە تالپىنعان 700-دەن استام ادام قايتىس بولدى. ولار وسىناۋ اتىراپتان جول تابا الماي، ىستىقتان، شولدەن قازا تاپقان. وسىندا باقيعا اتتانعاندار سانى ودان دا كوپ ەكەنى انىق. اۋدان شەريفى بەنني مارتينەستىڭ ويىنشا، ءار 5 ادامنىڭ مۇردەسى عانا تابىلادى.

جىلدار بويى مايىتتەر فالفۋررياستاعى اۋداندىق مازاراتقا اپارىلىپ، اپىل-عۇپىل، شالا قازىلعان قابىرلەرگە جەرلەنىپ كەلگەن.

مۇندا جەر قوينىنا تاپسىرىلعانداردىڭ ناقتى سانىن ەشكىم ايتا المايدى، ويتكەنى اۋدان اكىمشىلىگى 2013 جىلعا دەيىن تىركەۋ جۇرگىزبەگەن-ءدى.

وڭتۇستىك تەحاس ادام قۇقىقتارى ورتالىعىنىڭ وكىلى ەددي كانالەس مايىتتەردى قايتا قازىپ، ولاردىڭ كىمگە تيەسىلى ەكەنىن انىقتاۋعا تالپىنادى.

انتروپولوگتار 2013 جىلدان بەرى ستۋدەنتتەرمەن بىرگە كەلىپ، مۇردەلەردى قازىپ، دنك ۇلگىلەرىن جيناپ كەلەدى. ولار جەرگىلىكتى كور قازۋشىلاردىڭ نۇسقاعان جەرىندە كىشكەنە ور قازادى. سودان كەيىن دنك ۇلگىسى جينالىپ، جوعالعان ادامدار تۋرالى اقپارات تىركەلگەن قورداعى مالىمەتپەن سالىستىرىپ كورەدى.

كەيىنگى 15 جىلدا برۋكس اۋدانى ارقىلى شەكارادان وتۋگە تالپىنعان 700-دەن استام ادام قايتىس بولدى. مەريديت كوحۋت،  «نيۋ-يورك تايمس»

وسى مازاراتتا قازىلعان 150-دەن استام ءمايىتتىڭ 30-ى كىمگە تيەسىلى ەكەنى انىقتالدى. «بۇل جاقىنىن جوعالتقاندار ءۇشىن كەرەك» دەيدى تەحاس مەملەكەتتىك ۋنيۆەرسيتەتىنىڭ ساراپتامالىق انتروپولوگى كەيت سپرەدلي.

ونىڭ ايتۋىنشا، مايىتتەر باستان وتكەن وقيعاسىن ايتىپ بەرەدى. ماسەلەن، ءبىر ادام ۇرىلاردان ءىز جاسىرۋ ءۇشىن قالتاسىنا اقشانىڭ كوشىرمەسىن سالىپ العان ەكەن. باسقالارى بىرگە اكەلە جاتقان جانۋارمەن بىرگە جەرلەنگەن. ەندى بىرىندە كيىم بولسا، قالعاندارىنىڭ قاڭقاسى عانا قالعان. ياعني، ءمايىتتى تاپقانعا دەيىن كوپ ۋاقىت وتكەن.

2013 جىلعا دەيىن مۇنداعى ماسەلەگە باس اۋىرتقاندار از ەدى. سول كەزدە 130 ءمايىت تابىلعان-دى. اۋداندا ءبىر جىلدا مۇنشالىقتى مۇردە كەزدەسپەگەن-تۇعىن. البەتتە، بۇل - ءبىر جىلدا عانا قايتىس بولعاندار سانى ەمەس.

اقش بيلىگىندە قىزۋ تالقىعا تۇسكەن شەكارا قاۋىپسىزدىگى جونىندەگى پىكىرتالاس وسى ارادى مەكەندەيتىندەردى مازالامايدى. «مۇندا ەشقانداي داعدارىس نەمەسە توتەنشە جاعداي بولىپ تۇرعان جوق» دەيدى فيليپ گومەس.

دوكتور سپرادلي قولىنان كەلگەن كومەگىن كورسەتكىسى كەلەدى. «وتباسىمنىڭ ءبىر مۇشەسى شەتەلگە بارىپ، ەشقاشان قايتا ورالماسا نە بولار ەدى؟ وسىنى كوپ ويلايمىن. بىرەۋ تەلەفوندى كوتەرىپ، كومەكتەسە مە؟ تۇتقانى العان كۇننىڭ وزىندە كومەكتەسۋگە ىنتا تانىتا ما؟» دەيدى ول.

سوڭعى جاڭالىقتار

ءۇي جانۋارىنان ۆيرۋس جۇعا ما؟

كوروناۆيرۋس • بۇگىن، 18:39

التىن قورىمىز كوبەيىپ كەلە جاتىر

قازاقستان • بۇگىن، 17:30

اقمولادا تاعى ءبىر ناۋقاس انىقتالدى

كوروناۆيرۋس • بۇگىن، 16:07

قارعىن سۋ بالكاشيندى باسىپ قالدى

ايماقتار • بۇگىن، 16:05

تاسقىننىڭ بۇگىنگى احۋالى

ايماقتار • بۇگىن، 15:42

سالەحاردتان كەلگەن تسيكلون

ايماقتار • بۇگىن، 15:30

ەلوردادا جالپى جاعداي تۇراقتى

كوروناۆيرۋس • بۇگىن، 14:50

فۋتبول ماۋسىمى جالعاسا ما؟

سپورت • بۇگىن، 14:48

ۇقساس جاڭالىقتار