ايماقتار • 24 قاڭتار، 2019

بالالارعا ءدامدى كوفە ىشكىزىپ، فۋتبول ويناۋدى ۇيرەتكەن جاس كاسىپكەر –اسحات نۇرلىباەۆ

268 رەتكورسەتىلدى

بۇل جىگىت تۋعان ولكەسىن ەرەكشە جاقسى كورەدى. سوندىقتان بولار، شەتەلدەگى تاماشا جاعداي­دىڭ بارلىعىنان باس تارتىپ، شىمكەنتكە قايتىپ ورالدى. بوس­قا كەلگەن جوق، الەمدىك نا­رىق­­تىڭ قارا قازانىنا اينال­عان قىتاي ەلىندە 10 جىل بويى كاسىپ­كەرلىكتىڭ سان ءتۇرىن ۇيرەنىپ قايتتى.

كەلگەن بويدا ۇيرەنگەنىن كا­دەگە جاراتسام دەپ تالپىندى. باس-اياعى 2-3 جىلدىڭ ىشىندە 5 بيزنەس جوبانى قولعا الىپ، 30 شاقتى ادامدى جۇمىسپەن قامتىپ ۇلگەردى. ءبىز تىلگە تيەك ەتىپ وتىر­عان ازامات – شىمكەنتتىك جاس كا­سىپكەر اسحات نۇرلىباەۆ. 

اسحات ۋنيۆەرسيتەت قابى­رعاسىن­دا جۇرگەن شاعىندا-اق قالا تۇرعىندارىنا ساپالى، باعاسى قالتا قاقپايتىن كوفەحانا اشۋدى ويلادى.

– ەڭ العاش كوفەحانا اشۋ تۋرالى وي Starbucks، مcDonald’s سىندى تانىمال كومپانيالاردىڭ ونىمىنەن ءدام تاتقان شاقتا كەلگەن. كەيىننەن ىشكى نارىقتى زەرتتەدىك. اۋەلى قالا تۇرعىندارىنىڭ كوفەگە دەگەن قىزىعۋشىلىعىن ءبىلۋ ماقساتىندا ارنايى كولىكتە كوفە ساتۋدى باستادىق. قالاداعى جوعارى وقۋ­ ورىندارى، ساۋدا ورتالىقتارى مەن­ بانك عيماراتىنىڭ الدىندا تۇر­عىن­دارعا ءدامدى كوفە ۇسىندىق.  تۇتى­نۋ­شىلارىمىزدىڭ سانى ارتا باستاعان سوڭ، ع.ىلياەۆ كوشەسى بويىنان كىشىگىرىم دۇڭ­گىرشەك اشتىق. كەيىننەن جەكە عيمارات جالداپ، ەرەكشە ديزايندا جاسالعان ورتالىقتا قىزمەت كورسەتە باستادىق. ءبىزدىڭ حوش ءيىستى كوفەمىزدىڭ باعاسى ستۋدەنتتەردىڭ قالتاسىنا قو­­نىم­د­ى. 0،5 ليترلىك كوفە نەبارى 300 تەڭگە. ويتكەنى نەگىزگى تۇتى­­نۋشى­لا­رىمىز دا وسى جاس­تار، – دەيدى اسحات نۇرلىباەۆ. 

وسىلايشا نارىق زاڭدىلى­عىمەن باسەكەلەستەرىن ءادىل جەڭە بىلگەن جاس كاسىپكەر شىمكەنتتە «Procoffee» اتتى كوفە ورتالىعىن اشتى. بۇگىندە جوعارى وقۋ ورىندارى مەن ستۋدەنت جاستار ءجيى شوعىرلاناتىن جەرلەردە اتالعان ءونىم برەندكە اينالىپ ۇلگەردى.

انىعىندا، شىمكەنت دەسە جىل­دىڭ ءتورت مەزگىلى ساۋدا قىز-قىز قايناعان بازارى كوپ مە­كەن ەلەستەيدى. شاھار تۇر­عىن­دا­رىنىڭ بويىنداعى وسى ءبىر پىسىقتىق ولاردىڭ بىردەن كاسىپ­كە بەيىمدەلۋىنە كوپ سەپتىگىن تي­گىزسە كەرەك. شيراق اسحات تا وسى توپتىڭ بەل ورتاسىندا ءجۇرىپ شىڭ­­دال­عان. 

قالالىقتارعا كوفە ءىشۋ ما­دە­نيە­تىن ۇيرەتتىم دەپ توق­مەيىل­سىپ قال­­­ماي، كەزەكتى جوبالارىن دا رەت-رەتى­مەن قولعا العان. سو­لار­دىڭ ء بىرى – بەي­نەباقىلاۋ ونىم­دەرىن ساتۋمەن اينالىساتىن «Protech» دۇكەنى. بۇدان بولەك، ىزدەنىمپاز جاستىڭ «Pro-professional» برەن­دىنە قاراستى «Profootball» دۇكەنى تاعى بار. مۇنىڭ بارلىعى «Pro group»­ كومانداسىنىڭ بولىمشەلەرى. ءبىر سوزبەن، حالىققا ساپالى، جوعارى دەڭ­گەيدە ءونىم ۇسىنۋ ماقساتىندا دۇ­نيەگە كەلگەن اتاۋ­لار مەگاپوليس جۇرت­شىلىعىنىڭ اۋزىن­دا ءجيى ايتىلىپ ءجۇر. 

«جىگىتكە جەتى ونەر دە از» دەمەك­شى، سپورتتى جانىنا سەرىك ەتكەن اس­حات بۇل سالاعا دا قارجى سالىپ، تابىس كو­زىن تاپتى. قازاقتىڭ قارا­كوز بالدىرعاندارىنىڭ بويىنداعى فۋت­بولعا دەگەن ءۇمىتتى وياتۋ ماق­ساتىندا شاھاردا «سانلين» فۋتبول اكادەمياسىنىڭ بولىمشەسىن اشتى. 2014 جىلى قۇرىل­عان، ەلىمىزدىڭ 9 قالاسىندا جۇمىس ىس­تەي­تىن اكادەميادا جاس وسكىن­­دەر كا­سىبي جاتتىقتىرۋشىلاردان ءدارىس الا­دى. 

قازىرگى تاڭدا جاستاردىڭ ءبىر عانا ماماندىق يەسى اتانىپ قويماي،  قىزىعۋ­شىلىعى بار ماماندىقتاردى كوپتەپ يگەرگەنى ءجون. ماماندىعىنا شىن بەرىلگەن جاندار كەز كەلگەن سالانىڭ ەڭسە تىكتەپ، دامۋىنا سەپتەسەتىنى انىق. بۇل رەتتە مەملەكەتتىڭ دە جاس كاسىپ­كەرلەرگە كورسەتەر كومەگى از ەمەس. 

– ءتۇرلى ىسساپارلارمەن الەمنىڭ 15 شاقتى ەلىن ارالادىم. ارينە شەتەل­دەردەگى ۇلكەن قالالارمەن شىمكەنت­تى سالىستىرۋعا كەلمەيدى. الايدا ءوزىم وسكەن قالانى ەرەكشە جاقسى كورە­مىن. قىتايدا حالىق كوپ، كوشەدەگى كەپتە­لىستەردەن اياق الىپ ءجۇرۋ مۇمكىن ەمەس. سوندىقتان ءبىر كۇندە ءبىر عانا جۇمىس ىستەي الاسىز. ال مۇندا ءبىر كۇندە كەمى 5-10 شارۋاڭىز تىنادى. قالامىز مەگاپوليس مارتەبەسىن الىپ، دامىپ كەلەدى. ەندىگى مۇرات – شەتەلدە ون جىل ءجۇرىپ جيناعان ءبىلىمىمدى، مۇمكىندىگىمدى تۋعان جەرىمدە پايداعا جاراتۋ. ەلىمىزدە جاستاردىڭ كاسىپكەرلىكپەن اينالىسۋىنا مەملەكەت تاراپىنان بارلىق جاعداي جاسالعان. بارلىق سالادا ءوزارا باسەكەلەستىك بار. ال باسەكەلەستىك بول­عان جەردە ساپا ارتادى، – دەپ اعىنان جا­رىلدى جاس كاسىپكەر.

­­نۇرشات توكەن،

«Egemen Qazagstan»

سوڭعى جاڭالىقتار

ەلباسى تالعات دوناقوۆتى قابىلدادى

قازاقستان • بۇگىن، 17:52

عارىشتاعى قوقىس (ۆيدەو)

ۆيدەو • بۇگىن، 13:08

جارقىن جوبالار

ايماقتار • بۇگىن، 10:00

ۇقساس جاڭالىقتار