ۇلتتىق قاۋىپسىزدىك قىزمەتىنىڭ حابارلاۋىنشا, وقيعا تاراز شەكارا وتريادىنىڭ «جاسوركەن» زاستاۆاسىنا قاراما-قارسى جەردە 2019 جىلعى 23 قاڭتاردا بولعان.
قىرعىز رەسپۋبليكاسىنىڭ شەكارا جاساعى ەل اۋماعىنان 10 جىلقى ايداپ وتۋگە تالپىنعان 3 زاڭ بۇزۋشىنى انىقتاعان. ۇستاۋ كەزىندە شەكارا بۇزۋشىلار قارسىلىق كورسەتىپ, سۋىق قارۋدى قولدانعان. ولارعا قارسى شەكاراشىلار دا وق اتقان. ناتيجەسىندە زاڭ بۇزۋشىلاردىڭ ءبىرى وق ءتيىپ, جاراقات العان. قالعان ەكى بەلگىسىز ادام جىلقىلارمەن قازاقستان رەسپۋبليكاسى اۋماعىندا جاسىرىنعان.
جاراقات العان شەكارا بۇزۋشى (قازاقستان ازاماتى) تالاس اۋىلى اۋرۋحاناسىنا بارار جولدا قازا تاپقان.
قازىرگى تاڭدا تاراز شەكارا وتريادىنىڭ كۇشتەرى جانە قۇرالدارىمەن شەكارا بۇزۋشىلار مەن جىلقىلاردى ىزدەۋ شارالارىن جۇرگىزىپ جاتىر.
وسى وقيعاعا بايلانىستى سىرتقى ىستەر مينيسترلىگى رەسمي وكىلى ايبەك سمادياروۆ مالىمدەمە جاسادى. ونىڭ ايتۋىنشا, قازاقستاندىق ديپلوماتتار رەسمي تۇردە قىرعىزستان تاراپىنان وقيعانىڭ ءمان-جايى تۋرالى تولىق اقپاراتتى سۇراتقان.
ء«بىزدىڭ بىشكەكتەگى ەلشىلىگىمىز وقيعانىڭ بارلىق ەگجەي-تەگجەيىن انىقتاعاننان كەيىن مۇنداي جاعدايلاردا ءتيىستى قۇقىقتىق جانە ۇيىمداستىرۋ, سونىڭ ىشىندە قۇجاتتاردى راسىمدەۋ جانە مارقۇمنىڭ دەنەسىن وتانىنا جىبەرۋ شارالارىن قابىلدايدى. قازىرگى ۋاقىتتا قازاقستان مەن قىرعىزستاننىڭ شەكارا جانە كونسۋلدىق قىزمەتتەرى ءتيىستى شارالاردى جۇرگىزىپ جاتىر», دەلىنگەن حابارلامادا.
ۇلتتىق قاۋىپسىزدىك قىزمەتىنىڭ حابارلاۋىنشا, قايتىس بولعان شەكارا بۇزۋشى بۇعان دەيىن «قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتۋ» بويىنشا سوتتالعان.
