جاستار جىلىنىڭ اشىلۋ سالتاناتىندا جاستار تاراپىنان بىرنەشە ۇسىنىس ايتىلدى. ماسەلەن, ينتەرنەت جوبالاردى كوبەيتۋ, «Astana open University» جوباسى, بۇركىتشىلەر مەكتەبىن اشۋ سياقتى يدەيالاردىڭ جاستار ءۇشىن ماڭىزى زور. ال اگرارلىق بيزنەس سالاسىن دامىتۋ ءۇشىن كوكتەمدە استانادا الما باعىن سالۋ ۇسىنىسى ماقۇلداندى.
جاستار ءۇشىن تاعى ءبىر قۋانىشتى جاعداي, بيىل وقۋ ورىندارىنداعى گرانت كولەمى دە 2 ەسە ارتاتىن بولادى. سونىمەن قاتار, جاستار ستارتاپىن قولداۋعا ارنالعان قور قۇرىلادى.
«جاستار جىلىندا» ەلىمىزدەگى جاستار ءۇشىن تىڭ يدەيالار مەن باستامالاردىڭ جۇزەگە اسۋىنا جانە جاستاردىڭ بارلىق الەۋمەتتىك ماسەلەلەرىنىڭ شەشىمىن تاباتىنىنا زور سەنىمدەمىز! جاسوتاندىق رەتىندە ءبىزدىڭ وبلىسىمىزداعى بارلىق جاستارعا جاسالاتىن وسى مۇمكىندىكتەر ولاردىڭ بولاشاقتاعى الەۋەتىن ارتتىرۋعا زور كۇش-جىگەرىن سالادى دەگەن ويدامىن! بيىل عانا ءاسانالى ءاشىموۆ اتىنداعى جاستاردىڭ شىعارماشىلىق ورتالىعىنىڭ جاڭادان بەرىلۋى مەن وبلىسىمىزداعى جاستار اللەياسىنىڭ سالىنۋى بىزدەرگە زور مۇمكىندىك بەرەدى» دەيدى «نۇر وتان» پارتياسى تاراز قالالىق فيليالى جانىنداعى «جاس وتان» جاستار قاناتىنىڭ بولىمشە باسشىسى باقىتجان رايىمباي ۇلى.
«ماعان ەلباسىنىڭ ۆولونتەرلىقپەن اينالىساتىن جوعارى وقۋ ورىندارىنىڭ ستۋدەنتتەرىنە كوڭىل ءبولۋ كەرەك دەگەن ءسوزى قاتتى ۇنادى. سەبەبى, ءوزىم ەكىنشى كۋرستان بەرى ۆولونتەرلىقپەن اينالىسامىن. ءبىلىم الىپ جاتقان وقۋ وردامىزدا «دوستىق» جانە ء«بىز بىرگەمىز» ەرىكتىلەر كلۋبى بار. ونىڭ قۇرىلۋىنا ءوزىم اتسالىستىم. «دوستىق» توبىنداعى ەرىكتىلەر قارت كىسىلەرگە, الەۋمەتتىك جاعدايى تومەن وتباسىلارعا كومەك قولىن سوزسا, ء«بىز بىرگەمىز» توبى مۇمكىندىگى شەكتەۋلى ازاماتتارعا كومەك قولىن سوزادى. ءبىزدىڭ وسى باستامالارىمىزدى ۇكىمەتتىڭ ءوزى قولداپ, ۆولونتەرلارعا جاعداي تۋعىزىپ جاتسا, ءبىزدىڭ ءىسىمىز العا باسارى انىق. ءبىز وسىنداي مەيىرىمدىلىك ىسىمىزبەن وزگەگە ۇلگى بولىپ, ادامگەرشىلىك تۇرعىدان دا ءوسىپ, داميمىز دەپ سانايمىن. جالپى مەن ءبىلىم الىپ جاتقان تاراز مەملەكەتتىك ۋنيۆەرسيتەتىندە جاستاردى قولداۋعا زور مۇمكىندىكتەر بار. بيىلعى جىلدىڭ ەرەكشەلىگىنە وراي ءبىلىم ورداسىنداعى مۇمكىندىكتەر ەكى ەسەلەنەدى دەپ ويلايمىن» دەيدى م.ح.دۋلاتي اتىنداعى تارمۋ ستۋدەنتى دينارا مۇحتاربەكوۆا.
حاميت ەسامان,
«Egemen Qazagstan»,
جامبىل وبلىسى
