زاڭ جوباسىنىڭ ماقساتى - سوت جۇيەسىن جاڭعىرتۋ, سۋديا كادرلارىن ساپالىق جاعىنان دامىتۋ جانە جاڭارتۋ, سۋديالار تاۋەلسىزدىگىنىڭ كەپىلدىكتەرىن كۇشەيتۋ جانە سۋديالارعا قۇقىققا سىيىمسىز ىقپالدى بولعىزباۋ. زاڭنامالىق قۇجاتتا جوعارعى سوت پەن وبلىستىق سوتتاردىڭ جالپى وتىرىستارىنىڭ تورالقالارىن تاراتۋ ۇسىنىلادى.
جەرگىلىكتى سوتتىڭ سۋديالارىن جوعارعى سوتتىڭ كەڭەيتىلگەن جالپى وتىرىسىنىڭ قۇرامىنا جىبەرۋ ماسەلەلەرىن جانە جوعارى سوت كەڭەسىنىڭ, سوت ءجيۋريىنىڭ, كادر رەزەرۆى جونىندەگى كوميسسيانىڭ, سوت تورەلىگىنىڭ ساپاسى جونىندەگى كوميسسيانىڭ قۇرامىنا سۋديالاردىڭ كانديداتۋرالارىن قارايتىن وبلىستىق سوتتىڭ كەڭەيتىلگەن جالپى وتىرىسى ەنگىزىلەدى. سۋديالارعا قاتىستى تارتىپتىك ىستەردى قاراۋ ءۇشىن جوعارعى سوت كەڭەسىنىڭ جانىندا سوت ءجيۋريى قۇرىلادى, ول سۋديالاردان, زاڭگەرلەر جۇرتشىلىعىنىڭ وكىلدەرىنەن جانە سۋديالار قاتارىنان جوعارعى سوت كەڭەسىنىڭ مۇشەسىنەن تۇرادى.
بۇدان باسقا, جوعارعى سوت كەڭەسىنىڭ جانىندا كادر رەزەرۆى جونىندەگى كوميسسيا دا قالىپتاستىرىلادى. جوعارعى سوتتىڭ جانىندا وبلىستىق جانە جوعارعى سوتتاردىڭ سۋديالارىنان, سونداي-اق وتستاۆكاداعى سۋديالاردان تۇراتىن سوت تورەلىگىنىڭ ساپاسى جونىندەگى كوميسسيا قۇرىلادى. وبلىستىق سوتتىڭ سۋدياسى لاۋازىمىنا كانديداتتار ءۇشىن كەپىلگەرلىك ينستيتۋتى الىپ تاستالادى. سولار بولعان كەزدە ادام سۋديا لاۋازىمىنا ورنالاسا المايتىن بىرقاتار شارت العاش رەت زاڭدا بەلگىلەنەدى. جوعارعى سوت كەڭەسىنىڭ شالعاي جەرلەردە ورنالاسقان سوتتاردىڭ تىزبەسىن ايقىنداۋ جونىندەگى وكىلەتتىگى ناقتىلانادى. ولشەمشارتتار جۇيەسىن, ونىڭ ىشىندە سوتتاعى, پروكۋراتۋرا ورگاندارىنداعى, ادۆوكاتۋراداعى جۇمىستى ەسكەرەتىن ولشەمشارتتاردى پايدالانا وتىرىپ, بوس سۋديالىق لاۋازىمدارعا كانديداتتاردى ىرىكتەۋ تۋرالى نورما بەكىتىلەدى. سۋديا لاۋازىمىنا كانديداتتار «قازاقستان رەسپۋبليكاسىنىڭ جوعارعى سوت كەڭەسى تۋرالى» زاڭدا كوزدەلگەن جاعدايلاردا پوليگرافولوگيالىق زەرتتەۋگە جىبەرىلەتىن بولادى.
سونىمەن قاتار, ءماجىلىس بۇگىنگى وتىرىستا بالانىڭ قۇقىقتارىن قورعاۋ جونىندەگى ۇيىمداردىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى دەپۋتاتتىق زاڭ جوباسىن ەكىنشى وقىلىمدا ماقۇلدادى. زاڭ جوباسىنىڭ ماقساتى بالالاردىڭ قۇقىقتارىن قورعاۋدى جۇزەگە اسىراتىن ۇيىمداردىڭ جۇمىس ىستەۋىمەن بايلانىستى ماسەلەلەردى فۋنكتسيالاردى ناقتىلاۋ ەسەبىنەن ولاردىڭ قىزمەتىن جەتىلدىرۋ, سونداي-اق ۇلتتىق الدىن الۋ تەتىگى مانداتىن بالانىڭ قۇقىقتارىن قورعاۋ جونىندەگى فۋنكتسيالاردى جۇزەگە اسىراتىن بارلىق ۇيىمدارعا قولدانۋ ارقىلى زاڭنامالىق دەڭگەيدە كەشەندى شەشۋ. زاڭ جوباسىمەن جۇمىس ىستەۋ بارىسىندا دەپۋتاتتار بالانىڭ قۇقىقتارىن قورعاۋ جونىندەگى فۋنكتسيالاردى جۇزەگە اسىراتىن ۇيىمداردىڭ تىزبەسىن ناقتىلاۋعا; ءبىلىم بەرۋ سالاسىنداعى ۋاكىلەتتى ورگانعا بالالاردىڭ قۇقىقتارىن قورعاۋ سالاسىندا ارناۋلى الەۋمەتتىك قىزمەتتەر كورسەتۋ ستاندارتتارىن ازىرلەۋ جانە بەكىتۋ جونىندەگى فۋنكتسيانى بەرۋگە; ومىرلىك قيىن جاعدايدا جۇرگەن بالالاردى قولداۋ ورتالىقتارىن قۇرۋ جانە ولاردىڭ جۇمىس ىستەۋى ءۇشىن زاڭنامالىق نەگىزدەر قالىپتاستىرۋعا; قىلمىستىق كودەكسكە جازالاۋ مەرزىمدەرىن ۇلعايتىپ, سونداي-اق بەلگىلى ءبىر لاۋازىمدى اتقارۋعا جانە بەلگىلى ءبىر قىزمەتپەن اينالىسۋعا ءومىر بويىنا تىيىم سالا وتىرىپ, كامەلەتكە تولماعاندارعا قاتىستى جاسالعان قىلمىستاردى جەكە بولىكتەر ەتىپ شىعارۋعا جانە باسقا دا بىرقاتار تۇزەتۋ ەنگىزدى. دەپۋتاتتاردىڭ ۇسىنىستارىن قاراۋ قورىتىندىسى بويىنشا قازاقستان رەسپۋبليكاسىنىڭ 6 كودەكسى مەن 6 زاڭىنا تۇزەتۋلەر ەنگىزۋ كوزدەلگەن.
سونداي-اق, وتىرىستا قازاقستان مەن رەسەي ۇكىمەتتەرى اراسىنداعى ەلىمىزگە مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسى دەپۋتاتتار تاراپىنان قولداۋ تاپتى. جالپى وتىرىس سوڭىندا حالىق قالاۋلىلارى بىرنەشە دەپۋتاتتىق ساۋالدار جولدادى. ولار ن. سابيليانوۆ, گ. بايماحانوۆا, ج. احمەتبەكوۆ, ر.كيم, ۋ.قاينازاروۆ, ت.سىزدىقوۆ, ك.ابساتيروۆ, ۆ.كوسارەۆ, ب. دۇيسەنبينوۆ, ا. مۋرادوۆ, ا.قوڭىروۆ, م.تەمىرجانوۆ, ا.پەرۋاشەۆ.
