قازاقستان • 21 قاڭتار، 2019

قىربالتاباي مەكتەبىندەگى وقيعا: بالالارعا «بيبليا» تاراتىلعانى راس پا؟

609 رەتكورسەتىلدى

الماتى وبلىسىنىڭ ەڭبەكشىقازاق اۋدانىنا قاراستى قىربالتاباي اۋىلىندا ى.التىنسارين اتىنداعى جالپى ءبىلىم بەرەتىن مەكتەپ بار. سوڭعى ءبىر اپتا ارالىعىندا وسى مەكتەپكە قاتىستى وقيعا الەۋمەتتىك جەلى مەن ءباسپاسوز ارقىلى تارالىپ، قوعامدىق پىكىرگە ارقاۋ بولۋدا.

ناقتىراق ايتقاندا، مەكتەپ جانىنداعى ينتەرناتتىڭ وقۋشىلارىنا «قازاق-گەرمان-امەريكالىق بيبليا ميسسياسى» اتتى قوعامدىق بىرلەستىك تاراپىنان جاڭاجىلدىق سىيلىق تاراتىلىپ، ءدىني ادەبيەتتەر بەرىلگەنى جايلى حابار قازىر تەكسەرىلىپ جاتىر. مەكتەپ-ينتەرناتقا اۋدان اكىمدىگى تاراپىنان ارنايى قۇرىلعان كوميسسيا بارىپ، تاربيەشىلەرمەن جانە  وقۋشىلارمەن اڭگىمەلەسۋ وتكىزىلگەن ەكەن.

- ەڭبەكشىقازاق اۋدانىنىڭ اكىمىنىڭ ورىنباسارى، اۋداندىق ىشكى ساياسات ءبولىمى، ءدىن ينسپەكتورلارى، ءبىلىم ءبولىمى جانە اتالعان ى.التىنسارين اتىنداعى ورتا مەكتەبى مەن جانىنداعى ينتەرناتتىڭ ديرەكتورلارىمەن بىرلەسكەن جۇمىس توبى قۇرىلىپ بۇل ماسەلە تولىعىمەن قارالدى. 17 قاڭتار كۇنى جۇمىس توبىمەن بىرگە اۋداندىق اكىمدىكتە مەكتەپ-ينتەرناتتا جاڭاجىلدىق سىيلىقتار تاراتقان «قازاق-گەرمان-امەريكالىق تاۋرات ميسسياسى» قوعامدىق بىرلەستىگىنىڭ پرەزيدەنتى الەكسەي لۋبوشنيكوۆپەن كەزدەسۋ ۇيىمداستىرىپ، جاڭاجىلدىق سىيلىقتاردىڭ ىشىندە ءدىني كىتاپتار نەمەسە ۋاعىزداۋشى پاراقشالار بولماعانى جانە قايىرىمدىلىق شاراسىن ۇيىمداستىرۋشىلار تاراپىنان ءدىن تاقىرىبىندا اڭگىمەلەر قوزعالماعانى انىقتالدى. لۋبوشنيكوۆ الەكسەي ۆيكتوروۆيچ جانە ى.التىنسارين ورتا مەكتەبى مەن جانىنداعى ينتەرناتى ديرەكتورىنىڭ تاراپىنان بالالارعا ارنالعان سىيلىقتاردىڭ ءاراسىندا دىني كىتاپتار بولماعانىن راستاپ تۇسىنىكتەمە جازىپ بەردى. وسى ورايدا، بۇل ماسەلەنى ارى قاراي ۋشىقتىرۋدىڭ قاجەت ەمەس ەكەندىگىن ايتا وتىرىپ، بۇل ماسەلە قازىرگى تاڭدا اۋدان اكىمدىگىنىڭ تاراپىنان قاداعالاۋدا ەكەندىگىن جەتكىزەمىز، - دەيدى ءبىزدىڭ سۇراۋىمىزعا وراي ەڭبەكشىقازاق اۋدانى ىشكى ساياسات ءبولىمىنىڭ باسشىسى مومۋنجان اكبارجان ۇلى.

بىراق، قىربالتاباي اۋىلىنداعى مەكتەپتەگى جاعدايدى قوعام نازارىنا جەتكىزگەن ەكولوگ، الماتى وبلىسى كەربۇلاق اۋدانىنىڭ قۇرمەتتى ازاماتى گوزەل قۇلجاباەۆا اۋدان اكىمدىگى بەرگەن رەسمي جاۋاپتى بىرجاقتى دەپ وتىر. الماتى قالاسىندا وسى ماسەلەگە وراي ءباسپاسوز ءماسليحاتىن وتكىزگەن گوزەل قۇلجاباەۆا ينتەرناتتا  «قازاق-گەرمان-امەريكالىق بيبليا ميسسياسى» تاراپىنان ءدىني ادەبيەت، ونىڭ ىشىندە 120 دانا «بيبليا» كىتابىنىڭ تاراتىلعانى جايلى ناقتى دالەلدىڭ بولعاندىعىن ايتادى. ونى راستايتىن سۋرەت كەيىننەن باسپاسوزدە جاريالانعان ەكەن.

- جالپى مەن ينتەرناتتاعى جاعدايدى قىربالتاباي اۋىلىنا بارعاندا كەزدەيسوق ەستىدىم. ادەتتە، اتا-انا رەتىندە كامەلەتتىك جاسقا تولماعان بالالارعا قانداي دا ءبىر ءدىني ۋاعىز جۇرگىزۋگە بولمايتى بەلگىلى. بۇل جەردە كىتاپ سىيلاۋ شاراسى اتا-انانىڭ قاتىسۋىنسىز بولعان. جاڭاجىلدىق سىيلىق رەتىندە، تاتتىلەرمەن بىرگە بەرىلگەن بولۋى كەرەك. مۇنى بالالارمەن سويلەسكەنىمدە، وزدەرى مويىندادى. ولار كىتاپتان بولەك قۇراستىرمالى ويىنشىق جاپسىرمالاردى دا العانىن ايتتى. ويىنشىق بولىكتەرىن تولىق ءتىزىپ شىققاندا ودان يسا ءماسىحتىڭ سۋرەتى مەن ۋاعىز سوزدەر كورىنەتىن بولعان. بىردەن اشىپ ايتايىن، مەن بۇل جەردە قانداي دا ءبىر ءدىني كوزقاراس ءۇشىن ماسەلە كوتەرىپ وتىرعان جوقپىن. ماسەلە، مەكتەپ جاسىنداعى بالالاردىڭ قۇقىن قورعاۋ مەن مەملەكەتتىك مەكەمە قابىرعاسىندا تەك تولىق سۇزگىدەن وتكەن كىتاپتاردى عانا وقۋعا رۇقسات بەرىلەتىندىگى جايىندا. مەن ءوزىم تابيعات قورعاۋشىسى رەتىندە جازعان ەڭبەكتەرىمدى ءبىلىم مينيسترلىگىنىڭ رۇقساتىنان كەيىن عانا مەكتەپتەرگە كومەكشى قۇرال رەتىندە ۇسىنا الامىن. سوندا، «بيبليانى» بالاعا وقۋعا رۇقسات بەرىلگەن بە؟ - دەيدى گوزەل قۇلجاباەۆا حانىم.

ونىڭ ايتۋىنشا، وقۋشىلارمەن سويلەسكەندە بالالار سىيلىق العاندارىن، «بيبليا» كىتابىن دا كورگەندەرىن جاسىرماعان. وقۋشىلار مۇنى تەلەفوىنداعى داۋىس جازۋ قۇرىلعىسىنا ايتقان. بىراق، وقيعا تۋرالى ءسوز شىققاننان كەيىن مەكتەپ اكىمشىلىگى ينتەرنات وقۋشىلارىنا ەشقانداي سىيلىق، ونىڭ ىشىندە ءدىني كىتاپتار الماعاندىعى جايلى قولحات جازدىرىپ العان. «بۇل دا بالا قۇقىعىن بۇزۋ. زاڭ بويىنشا مۇنداي قولحات اتا-انا قاتىسۋىمەن جازىلادى» دەيدى ول.

ءبىز بۇل جاعدايعا وراي الماتى وبلىستىق ءبىلىم باسقارماسىنىڭ باسشىسى داۋرەن ءجۇنىسوۆتىڭ پىكىر بىلگەنبىز:

- ى.التىنسارين اتىنداعى مەكتەپ-ينتەرناتىنا قاتىستى وقيعادان حاباردارمىن. وتكەن سەنبى كۇنى ەڭبەكشىقازاق اۋدانىنا بارىپ، جاعدايدى كوزبەن كورىپ قايتتىم. اۋداندا ارنايى كوميسسيا جۇمىس ىستەپ جاتىر. الدىن الا بەلگىلى بولعانىنداي، تاربيەشىلەر مەن وقۋشىلار ينتەرناتتا ءدىني ادەبيەتتەر تاراتىلعانىن راستاماعان. بۇل جەردە دىبىستىق جانە بەينەجازبا بولعان ەكەن. ونىڭ انىق-قانىعىن كوميسسيا تەكسەرىپ بولعاسىن، جاۋابىن بەرەمىز، - دەدى وبلىستىڭ باس مۇعالىمى.

ال تاقىرىپتىڭ ءتۇيىنى قالاي تارقاتىلىپ، تەكسەرۋ جۇمىستارىنىڭ ناتيجەسى نەنى كورسەتەتىنى «ەگەمەن قازاقستان» گازەتىنىڭ نازارىندا بولادى.

قالماحانبەت مۇقامەتقالي،

«Egemen Qazaqstan»

الماتى وبلىسى

سۋرەت zanmedia.kz سايتىنان الىندى

سوڭعى جاڭالىقتار

مال باققانعا بىتەدى...

ايماقتار • كەشە

جەر يەسىن تاپسا يگى

ايماقتار • كەشە

ءبارىمىزدىڭ ابايىمىز

رۋحانيات • كەشە

ۇقساس جاڭالىقتار