بۇل كۇندەرى اقش-تىڭ «LDS Charites» قايىرىمدىلىق قورى جانە قازاقستاندىق «تاۋەلسىز ءومىر «دوس» ورتالىعى» قايىرىمدىلىق بىرلەستىگى مەن «ۋاقىپ» قايىرىمدىلىق قورى ەلىمىز بويىنشا مۇمكىندىگى شەكتەۋلى جاندارعا 300-دەن استام اربانى تەگىن سىيعا بەرىپ جاتىر.
وڭىردەگى ارباعا مۇقتاج مۇمكىندىگى شەكتەۋلى جاندارعا بەرىلگەن 21 اربانىڭ 19-ى «LDS Charites» قايىرىمدىلىق قورىنان بولسا, قالعان ەكى اربا «تاۋەلسىز ءومىر «دوس» ورتالىعى» قوعامدىق بىرلەستىگى ارقىلى الىندى.
بىرلەستىكتىڭ اتقارۋشى ديرەكتورى انار وماروۆانىڭ ايتۋىنشا, «DOS Ortopedia» اتتى اربالار - قازاقستاندىق العاشقى برەند. ونىڭ ستاندارتتى جانە ەلەكتروندى ءتۇرى بار.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە, ارامىزدا بيۋدجەتتىڭ كومەگى ارقىلى اربا الا المايتىن مۇمكىندىگى شەكتەۋلى جاندار از ەمەس. سوندىقتان, ولار بىرنەشە جىل ءوتىنىش بەرىپ, كۇتەدى. جوبا تۋرالى ەستىپ, وزدەرى حابارلاسىپ جاتقاندار بار. قايىرىمدىلىق جوباسى اياسىندا بۇل قۇرالداردى بۇعان دەيىن ارباسىز جۇرگەندەر جانە ارباسى ەسكىرگەندەر دە الدى.
جالپى, وڭىرىمىزدە بيۋدجەت ەسەبىنەن 2017 جىلى 1500-گە جۋىق ادامعا اربا بەرىلسە, وتكەن جىلى كەزەككە 400-گە جۋىق ادام تۇرعان.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن ورازبەك ساياحات
