16 قاڭتار، 2019

اتىراۋلىق كاسىپكەرلەردى نە الاڭداتادى؟

220 رەتكورسەتىلدى

بيزنەس باستاۋدىڭ قيىندىعى دا، قىزىعى دا بار. اتىراۋلىق كاسىپكەرلەر جەر تەلىمىن الۋعا قاتىستى ماسەلەلەرگە كوپ كەزىگەدى. وبلىستىق كاسىپكەرلەر پالاتاسىنىڭ ءباسپاسوز حاتشىسى اسەل تۇقپاەۆانىڭ ايتۋىنشا، وتكەن جىلى بيزنەستى قورعاۋ تۋرالى 165 ءوتىنىم تۇسكەن، سونىڭ 80-ءى كاسىپكەرلەردىڭ پايداسىنا شەشىلدى.

پالاتا باسشىسىنىڭ ورىنباسارى سارسەنباي جولدىباەۆ وڭىردەگى بيزنەس يەلەرىن نەگىزىنەن جەر الۋ، سالىقتى اكىمشىلىكتەندىرۋ، تابيعي مونوپوليالار مەن بيزنەس سۋبەكتىلەرى اراسىنداعى ازاماتتىق-قۇقىقتىق قاتىناس، قارجى سەكتورىنا قاتىستى ماسەلەلەر الاڭداتاتىنىن ايتادى. پالاتا تاراپىنان جاسالعان شارالاردىڭ ناتيجەسىندە بىلتىر 310 ملن تەڭگەگە جۋىق سومادا كاسىپكەرلەردىڭ م ۇلىكتىك قۇقىعى قورعالعان.

-«پوتەنتسيال ويل» جشس كەڭ تارالعان پايدالى قازبالاردى وڭدەۋگە جەر تەلىمىن بەرۋ كەزىندە زاڭ تالاپتارىنىڭ بۇزىلۋى تۋرالى پالاتاعا شاعىمداندى. ينۆەستور 9 اي بويى كەن ورنىن دايىنداۋعا جەرگىلىكتى اتقارۋشى ورگانداردان رۇقسات الا الماي كەلگەن. كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس-ارەكەت كەڭەسىنىڭ ارالاسۋىمەن ماسەلە وڭ شەشىلدى،-دەيدى سارسەنباي جولدىباەۆ.

اتالعان كەڭەستىڭ ۇسىنۋىمەن وتكەن جىلى كاسىپكەرلەر قۇقىعىن بۇزعاندارى ءۇشىن 3 لاۋازىمدى تۇلعا تارتىپتىك جاۋاپكەرشىلىككە، 2 لاۋازىمدى تۇلعا اكىمشىلىك جاۋاپكەرشىلىككە تارتىلعان. پالاتا ساراپشىلارى، سونداي-اق، داۋلى ماسەلەلەر تۋىنداعان جاعدايدا سوتتا كاسىپكەرلىك سۋبەكتىلەرىنىڭ مۇددەلەرىن قورعايدى. مىسالى، 2018 جىلى 10 سوت وتىرىسى ءوتىپ، ونىڭ بەسەۋى كاسىپكەرلەردىڭ پايداسىنا شەشىلدى.

وتكەن جىلدىڭ تاعى ءبىر جەتىستىستىگى – اتىراۋلىق كاسىپكەرلەر ەلەكتر ەنەرگياسىن تۇتىنعاندارى ءۇشىن الدىن الا تولەم جاساۋدان تولىق بوساتىلدى. بۇل دا پروكۋراتۋرا مەن پالاتانىڭ بىرلەسىپ اتقارعان جۇمىستارىنىڭ ناتيجەسى. شاعىن جانە ورتا بيزنەستى بەرەكەتسىز تەكسەرە بەرۋ كورسەتكىشى دە جىل ساناپ كەمىپ كەلەدى. وبلىستىق پروكۋراتورىنىڭ دەرەگىنە سۇيەنسەك، 2017 جىلى 5600 بيزنەس سۋبەكتىسىنە تەكسەرۋ جۇرگىزىلسە، بىلتىر بۇل سان 1046-عا دەيىن تومەندەگەن.

باقىتگۇل باباش،

«ەگەمەن قازاقستان»

اتىراۋ

سوڭعى جاڭالىقتار

ۇقساس جاڭالىقتار