وسىنى جاقسى بىلەتىن قوستانايلىق ساقتاعان بودەنە اسىراۋدى حوببيىنە اينالدىرىپتى.
قالاداعى بالاباقشالاردىڭ بىرىندە جۇمىس ىستەيتىن ساقتاعان باقباسوۆ بۇگىندە 400-گە جۋىق بودەنە اسىراپ وتىر. مۇنداي كاسىپپەن اينالىسۋىنا تەلەديداردان كورگەن ءبىر باعدارلاما اسەر ەتكەن ەكەن. ونىڭ ايتۋىنشا, وسىدان 4 جىل بۇرىن رەسەيدىڭ قورعان قالاسىنا بارىپ, 15-كە تارتا بالاپان ساتىپ العان. ولارعا ارناپ قورا تۇرعىزىپ, ەدەنىن گازبەن جىلىتىلاتىن ەتىپ جاساعان. اۋا تەمپەراتۋراسى دا ءبىر قالىپتى. جەلدەتكىشى جانە بار. قۇستاردى توردان جاسالعان ارنايى ۇيشىكتەرگە ءبولىپ قويعان.
– سۋ اۆتوماتتى تۇردە كەلىپ تۇر. بودەنەلەرىم دە بۇعان ابدەن ۇيرەنىپ العان. ارنايى جاسالعان شۇمەكتى تۇمسىعىمەن شوقىپ قويىپ, سۋ ىشە بەرەدى (كۇلەدى). الدارىنداعى جەمسالعىشتى دا ءوزىم قولدان جاسادىم. تاڭەرتەڭ جانە كەشكە ءبىر رەتتەن جەم بەرەمىن. بودەنە كۇتىمى كوپ ۋاقىت المايدى. ءبىر قۇس تاۋلىگىنە ءبىر جۇمىرتقا بەرەدى, – دەيدى ساقتاعان.
جاز ايلارىندا بودەنەلىنىڭ سانى 1000-عا جۋىقتايدى ەكەن. بۇگىندە تاپسىرىس ارقىلى ەت, جۇمىرتقا ساتىپ الاتىندار دا كوبەيگەن. سوندىقتان الداعى ۋاقىتتا كاسىپكەرلىكتى قولداۋ مەكەمەلەرى ارقىلى شاعىن نەسيە الىپ, بودەنە شارۋاشىلىعىن نىعايتۋ ويىندا بار كورىنەدى.
P.S. كۇنى كەشە Instagram جەلىسىندە جاريالانعان جۇمىرتقانىڭ سۋرەتى الەۋمەتتىك جەلىدە لايك جيناۋدان رەكورد ورناتقانى بەلگىلى. بۇل سۋرەتكە 30 ميلليونعا جۋىق ادام لايك قويعان. الايدا...
بۇگىنگى كەيىپكەرىمىز ساقتاعان باقباسوۆ الەۋمەتتىك جەلىدە مۇنداي فوتولار جۇكتەمەيدى, لايكقا دا مۇقتاج ەمەس ەكەنى انىق.
عانيبەت عالىمبەك ۇلى,
سۋرەتتەردى تۇسىرگەن بەردىبولات كوركەمباەۆ
