مىڭ بوياۋلى شاھاردىڭ نۇرسۇلتان نازارباەۆ داڭعىلى مەن ومىربەك جولداسبەكوۆ كوشەلەرىنىڭ قيىلىسىندا جۇرتشىلىق جاقسى كورەتىن ساياباق بار. كەزىندە 90-جىلدارى ەرتە كوكتەمدە سامال مولتەك اۋدانىندا سەنبىلىك وتەتىنى حابارلاندى. بۇل شارانى ۇيىمداستىرعان سول كەزدەگى اقپارات ءمينيسترى التىنبەك سارسەنباەۆ بولاتىن. وسى سەنبىلىككە الماتىدان شىعاتىن ورتالىق گازەتتەردىڭ شىعارماشىلىق ۇجىمدارى قاتىسىپ, ەندى سالىنىپ جاتقان سامال مولتەك اۋدانىنىڭ كەلبەتى جيىلعانداردى ەرەكشە قۋانىشقا بولەپ, قالامگەرلەر ۇجىمداسا اعاش ەگىپ ەدى. جىلدار جىلجىپ, قالا دا كوركەيدى. الماتى دا ادەمى بولىپ اسپەتتەنە ءتۇستى. ءساندى كوشەلەر كوبەيىپ, كوز جاۋىن الاتىن كورىنىستەر كوڭىلگە سالتانات سىيلادى. ساياباقتاعى باياعى ءبىز ەككەن تال-تەرەكتەر دە ساندەنە ءتۇستى. جىلدار وتە كەلە كوركەيگەن باققا اينالدى. سول باقتىڭ ورتاسىنداعى الاڭقايداا حالىق ءارتىسى, حالىق قاھارمانى, سۇيىكتى سازگەرىمىز, ساعىنىشقا تولى ەل كوكەيىندە جاتتالعان قۇستار ءانىنىڭ اۆتورى نۇرعيسا تىلەنديەۆ اعامىزدىڭ بيىك ەسكەرتكىشى بوي كوتەردى. الماتىلىقتار ءۇشىن تاريحي ورىنعا بالاناتىن بۇل ساياباقتا جاس ونەرپازداردىڭ قولىنان شىققان ايرىقشا ونەر تۋىندىسىنىڭ تۇرۋى دا زاڭدى سەكىلدى. الدىمىزدا كوگىلدىر كوكتەم بارىن ەسكەرگەن بالعىن سۋرەتشىلەر بيىلعى جاستار جىلىنا سىمباتتى ەسكەرتكىشتى وزدەرىنە ارناپ قويعانداي ەكەن. الماتى اكىمدىگىنىڭ قولداۋىمەن جارىق كورگەن بىرەگەي تۋىندى وسكەلەڭ ۇرپاقتى وتكەن كۇننىڭ ۇلى مۇراسىمەن قاۋىشتىرىپ تۇرعانداي اسەرگە بولەيدى. «بوساعاڭ بەرىك بولسىن» دەپ باتا بەرەتىن دانا حالقىمىزدىڭ يگى تىلەگى ساياباققا كەلگەن جاستاردىڭ بولاشاعىنا ازىق بولسا دەيسىڭ.
ساپارباي پارمانقۇل,
«ەگەمەن قازاقستان»
الماتى
