ءماجىلىس دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەنشىك قۇقىعىن قورعاۋدى كۇشەيتۋ, تورەلىك, سوت جۇكتەمەسىن وڭتايلاندىرۋ جانە قىلمىستىق زاڭنامانى ودان ءارى ىزگىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جەكەلەگەن تارماقتارىندا مەملەكەت باسشىسىنىڭ ازاماتتاردىڭ م ۇلىكتىك قۇقىقتارىن قورعاۋدى كۇشەيتۋ جونىندەگى قارسىلىقتارىمەن كەلىستى.
سونىمەن قاتار جالپى وتىرىستا قازاقستان رەسپۋبليكاسىنىڭ زاڭنامالىق اكتىلەرىنە بيزنەس-ورتانى دامىتۋ جانە ساۋدا قىزمەتىن رەتتەۋ ماسەلەلەرى بويىنشا زاڭنامالىق تۇزەتۋلەر II وقىلىمدا ماقۇلداندى.
زاڭ جوباسىنىڭ ماڭىزدىلىعىنا توقتالعان نۇرلان نىعماتۋلين بۇل قۇجات مەملەكەت باسشىسىنىڭ بيزنەس-ورتانى ودان ءارى دامىتۋ جونىندەگى تاپسىرماسىن ىسكە اسىرۋ ماقساتىندا ازىرلەنگەنىن اتاپ ءوتتى.
پالاتا سپيكەرىنىڭ پىكىرىنشە, بۇگىن قابىلدانعان تۇزەتۋلەر كاسىپكەرلىكتى قولداۋدىڭ ءتيىمدى تەتىگىن قۇرۋعا مۇمكىندىك بەرەدى. ويتكەنى, بۇل, ەڭ الدىمەن, جاڭا كاسىپورىندار اشۋ, نەسيە الۋ, قۇرىلىسقا رۇقسات بەرۋ جانە سالىق سالۋعا جاعداي جاسايدى.
بۇل جولدا بۇگىنگى ەنگىزىلىپ وتىرعان وزگەرىستەر بيزنەس سالاسىن دامىتۋعا, ساۋدا قىزمەتىن نىعايتۋعا ەرەكشە ىقپال ەتەتىن بولادى. سونىمەن بىرگە كاسىپكەرلەر ءۇشىن دە وتە ءتيىمدى. وسىنىڭ بارلىعى شاعىن جانە ورتا بيزنەستىڭ ەكونوميكالىق قۋاتىن كۇشەيتۋگە سەرپىن بەرەتىنى ءسوزسىز, - دەدى نۇرلان نىعماتۋلين.
ماسەلەن, 2020 جىلدان باستاپ تاۋارلاردى تاڭبالاۋ جانە ساۋدا-ساتتىق قىزمەتىندە كاسسالىق-باقىلاۋ قۇرالدارىن پايدالانۋ ەرەجەلەرى ەنگىزىلدى.
دەپۋتاتتاردىڭ ۇسىنىسى بويىنشا وسى زاڭ جوباسىندا قاراستىرىلعان ونىمدەردى تاڭبالاۋمەن وندىرۋشىلەردىڭ وزدەرى نەمەسە قۇرىلاتىن بىرىڭعاي ءونىمدى تاڭبالاۋشى وپەراتورلار اينالىساتىن بولادى. سونىمەن قاتار بىرىڭعاي وپەراتورعا قالالاردا عانا ەمەس, سونىمەن قاتار بارلىق وبلىستىق ورتالىقتاردا تاڭبالاۋ قىزمەتتەرىن ۇسىنۋ ءۇشىن ءوز فيليالدارى مەن ءتيىستى جابدىقتارى بولۋى كەرەك.
جۇمىس توبىنىڭ زاڭ جوباسىمەن جۇمىسى بارىسىندا دەپۋتاتتار بىرقاتار تۇزەتۋ ەنگىزدى. اتاپ ايتقاندا, قولما-قول اقشاسىز تولەمدەردى ىنتالاندىرۋ ماقساتىندا سالىقتىق اكىمشىلەندىرۋدى وڭايلاتۋ; مۇگەدەكتەرگە الەۋمەتتىك قىزمەتتەر كورسەتۋ كەزىندەگى كىرىستەردى سالىق سالۋدان بوساتۋ; سالىنعان اكىمشىلىك ايىپپۇلدى مەرزىمىنەن بۇرىن تولەگەن كەزدە شارتتى جەڭىلدىك بەرۋ; تولىق دەكلاراتسيا بەرۋ مەرزىمىن ۇزارتۋ ارقىلى كەدەندىك اكىمشىلەندىرۋدى وڭايلاتۋ, سونداي-اق حالىقارالىق پوشتا جونەلتىلىمدەرى كەزىندە كەدەندىك راسىمدەردى وڭايلاتۋ; ەلەكتروندىق ساۋدا الاڭدارىن دامىتۋ جانە ەلەكتروندىق ساۋدانى جۇزەگە اسىرعان كەزدە ساتىپ الۋشىلاردىڭ قۇقىقتارىن قورعاۋ جونىندەگى نورمالاردى ناقتىلاۋ.
وتىرىس بارىسىندا دەپۋتاتتار تاراپىنان قولداۋعا يە بولىپ, ماقۇلدانعان راتيفيكاتسيالىق زاڭ جوبالارىنىڭ قاتارىندا قازاقستان مەن يوردان حاشيميت كورولدىگى اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى, ادامداردى ۇستاپ بەرۋ جانە سوتتالعان ادامداردى بەرۋ تۋرالى كەلىسىمدەر بار.
جالپى وتىرىس سوڭىندا ءماجىلىس دەپۋتاتتارى دەپۋتاتتىق ساۋالدار جولدادى. ولار - ق. سۇلتانوۆ, م. قازبەكوۆا, م.ماگەرراموۆ, ن.جۇمادىلداەۆا.
