اق ءۇي باسشىسى ءوز مالىمدەمەسىندە اقش-تىڭ سيريا تەرريتورياسىنان شىعۋ پروتسەسىن باستاعانىن جەتكىزىپ, تەرروريستەر قايتا باس كوتەرسە, ولاردى جويىپ جىبەرۋگە ءازىر ەكەنىن جازعان.
«كوپتەن كۇتكەن اقش اسكەرىن ەلگە قايتارۋ جۇمىسىن باستاپ كەتتىك. الايدا يليم/دايش-تىڭ قاراماعىنداعى شاعىن ايماقتارعا شابۋىل جاساۋدى توقتاتپايمىز. ەگەر ولار قايتا بوي كوتەرسە, جاقىن ماڭدا قالعان بازالاردان شابۋىل جاسايمىز. تۇرىكتەر كۇردتەرگە تيىسەتىن بولسا, ەكونوميكاسىن قيراتىپ جىبەرەمىز. 20 شاقىرىمدىق قاۋىپسىز ايماق قۇرىڭدار...» دەپ جازدى د.ترامپ.
كوپ ۇزاماي اقش پرەزيدەنتى كەلەسى جازباسىندا «باسقاشا ايتقاندا, كۇردتەردىڭ تۇركيانى ارانداتۋىن قالامايمىز. رەسەي, يران جانە سيريا تاراپى اقش-تىڭ دۇشپانى – يليم/دايش ۇيىمىن جويۋ جولىنداعى ۇزاق مەرزىمدى ارىپتەسى رەتىندە پايدا كوردى. بۇل ءبىز ءۇشىن دە پايدالى, بىراق اسكەرىمىزدى ەلگە قايتاراتىن كەز كەلدى. توقتاۋسىز سوعىسقا نۇكتە قويۋىمىز كەرەك» دەپ جازدى.
CNN ارناسىنىڭ حابارلاۋىنشا, د.ترامپتىڭ بۇل سوزدەرى تاياۋ شىعىستاعى تەرروريستەرمەن كۇرەس بارىسىندا ارىپتەس بولا بىلگەن ەلگە باعىتتالعان جاعىمسىز پىكىر. ءبىر جاعىنان, تۇركيا وڭىردەگى كۇرد توپتارىن تەرروريستىك ۇيىم رەتىندە سانايدى. ال اقش-تىڭ سيريادا ارەكەت ەتىپ جاتقان ارىپتەس توپتارىنىڭ باسىم بولىگى كۇردتەردەن قۇرالعان.
Al Jazeera اگەنتتىگىنىڭ حابارلاۋىنشا, انكارا بيلىگى بۇعان دەيىن اقش تاراپىن كۇرد حالقىن قورعاۋ ۇيىمىمەن (YPG) ارىپتەستىك ورناتقانى ءۇشىن ايىپتاپ كەلگەن-ءدى. ويتكەنى تۇركيا بيلىگى اتالعان ۇيىمدى, سونداي-اق كۇردتەردىڭ دەموكراتيالىق ۇيىمى پارتياسىن (PYD) انادولىدا تىيىم سالىنعان توپ - كۇردىستان جۇمىسشىلار پارتياسىمەن (PKK) بايلانىسى بار دەپ كۇدىكتەنەدى. سوندىقتان جوعارىدا اتالعان ۇيىمداردى دا تۇركيا بيلىگى تەرروريستىك توپتار قاتارىنا جاتقىزادى.
ءوز كەزەگىندە تۇركيا ديپلوماتتارى دا قاراپ قالعان جوق. Anadolu ajans اقپاراتتىق اگەنتتىگىنىڭ مالىمەتىنە ساي, تۇركيا پرەزيدەنتىنىڭ ءباسپاسوز حاتشىسى يبراحيم كالىن اقش پرەزيدەنتىنىڭ تۋيتتەرىنە جاۋاپ جازعان.
«قۇرمەتتى دونالد ترامپ, تەرروريستەر سەرىكتەستەرىڭىز بەن وداقتاستارىڭىز بولا المايدى. تۇركيا اقش-تان ستراتەگيالىق سەرىكتەستىك مىندەتتەرىن ورىنداۋىن جانە ارىپتەستىكتىڭ تەررور پروپاگانداسىمەن بىلعانباۋىن كۇتەدى» دەدى ي.كالىن.
سونىمەن قاتار ي.كالىن اقش پرەزيدەنتىنە بەرگەن جاۋابىندا سيريالىق كۇردتەر مەن PKK ۇيىمىن تەڭەستىرمەۋگە شاقىردى. ونىڭ پىكىرىنشە, PYD مەن YPG توپتارى PKK ۇيىمىمەن بايلانىسى بار. «تۇركيا كۇردتەرمەن ەمەس, تەرروريستەرمەن كۇرەسەدى. ءبىز كۇردتەر مەن باسقا دا سيريالىقتاردى تەررور قاۋپىنەن قورعايمىز» دەدى ي.كالىن تۋيتتەردەگى جازباسىندا.
بۇدان بولەك تۇركيانىڭ سىرتقى ىستەر ءمينيسترى مەۆليۋت چاۆۋشوعلى ليۋكسەمبۋرگتە وتكەن سىرتقى ىستەر جانە ەۋروپا ءمينيسترى جان اسسەلبورنمەن بىرلەسكەن ءباسپاسوز جيىنىندا د.ترامپتىڭ مالىمدەمەسىنە بايلانىستى ءوز ويىن ءبىلدىردى.
«ستراتەگيالىق سەرىكتەستىك الەۋمەتتىك جەلىدە تالقىلانبايدى. ءبىز تالقىعا اشىقپىز. دونالد ترامپ تۇركيا مەملەكەت باسشىسىنا حابارلاسىپ, سيريادان كەتەتىنىن جانە مۇنى تۇركيانىڭ ۇيلەستىرۋىمەن ىسكە اسىرماق ويىن ايتقان بولاتىن. ەكى كۇن بۇرىن اقش سىرتقى ىستەر ءمينيسترى مايك پومپەومەن تەلەفونمەن سويلەسكەندە بۇل ماسەلەنى تالقىلادىق» دەدى م.چاۆۋشوعلى.
ودان بولەك, سيريا وڭتۇستىگىنە 30 شاقىرىمدىق قاۋىپسىز ايماق قۇرۋ يدەياسى اقش-تىڭ ەمەس, تۇركيا پرەزيدەنتى ەردوعاننىڭ باستاماسى ەكەنىن دە ايتىپ ءوتتى. جۋرناليستەرگە بەرگەن سۇحباتىندا م.چاۆۋشوعلى مۇنداي ەسكەرتپەلەردەن تۇركيا تاراپى قورىقپايتىنىن جەتكىزدى. سونداي-اق ماڭىزدى ماسەلەنى الەۋمەتتىك جەلىدە ەمەس, ەكىجاقتى كەلىسسوز بارىسىندا ايتىلۋى قاجەت ەكەنىن اتاپ ءوتتى.
سۆەتلانا عالىمجانقىزى,
«ەگەمەن قازاقستان»
