سونىمەن, مەملەكەت باسشىسىنىڭ 2018 جىلعى 19 ماۋسىمداعى تاريحي جارلىعىنان كەيىن بۇرىنعى وڭتۇستىك قازاقستان وبلىسىنىڭ اكىمشىلىك ورتالىعى سانالعان شىمكەنت شاھارى وزىندىك دامۋ باعىتىن ايقىنداپ, قىزۋ جۇمىسقا كىرىستى. مۇنداعى ماقسات – قالانىڭ قالىپتاسقان ەرەكشەلىگىن ساقتاپ, تۇرعىندار مەن قالا قوناقتارىنا جاعداي جاساۋعا باعىتتالدى. قالا بيلىگىنە جەرگىلىكتى پروبلەمالارعا وزگە قىرىنان قاراي الاتىن زاماناۋي مەنەدجەرلەر كەلدى. بۇل تۇرعىدا جەرگىلىكتى كادرلاردىڭ پوتەنتسيالى ەرەكشە ەسكەرىلدى. از عانا ۋاقىت ارالىعىندا شاعىن ءارى ىقشام مەملەكەتتىك باسقارۋ اپپاراتى قايتا جاساقتالدى. بىرقاتار سالانىڭ تىزگىنىن شەت ەلدە ءبىلىم العان بىلىكتى ماماندار ۇستادى. ءمىنسىز ەڭبەك ەتكەن جەرگىلىكتى مامانداردىڭ دا تاجىريبەسىنە ءمان بەرىلدى.
الدىمەن قالا اۋماعىنداعى كاسىپتىڭ كوزىن تاپقان كاسىپكەرلەر مەن كاسىپكەرلىك نىسانداردىڭ قىزمەتى تياناقتى سارالاندى. شىمكەنتتىڭ ەلىمىزدەگى ءىرى كاسىپكەرلىك ورتالىعىنا اينالدىرۋعا ايرىقشا باسىمدىق بەرىلدى. جەلتوقساندا وتكەن حالىقارالىق ينۆەستيتسيالىق فورۋمعا گەرمانيا, دانيا, كانادا, وڭتۇستىك كورەيا, بىرىككەن اراب امىرلىكتەرى سىندى ەكونوميكالىق سالادا كوش ىلگەرى 20 ەلدەن بەلگىلى كومپانيالاردىڭ جەتەكشىلەرى كەلدى. ناتيجەسىندە 200 ملن اقش دوللارىن قۇرايتىن 11 مەموراندۋمعا قول قويىلدى. اتاپ ايتقاندا, قالانىڭ سولتۇستىك اۋماعىندا بوي تۇزەپ جاتقان زاماناۋي «شىمكەنت سيتي» اۋدانى اۋماعىنا سالىناتىن تۇرعىن ءۇي كەشەندەرى مەن اكىمشىلىك عيماراتتاردىڭ قۇرىلىسىنا, «جەدەل جاردەم» قىزمەتى پاركىن جاڭعىرتۋعا, ميكروفيبرا وندىرەتىن توقىما فابريكاسىنا, ورتالىق ستاديوندى قايتا جاڭارتۋعا جانە ت.ب. جوبالارعا ينۆەستورلاردىڭ الەۋەتى جۇمىلدىرىلدى. ال بۇل باستامالاردىڭ شاپاعاتىن قالا تۇرعىندارى الداعى جىلدارى كورەتىن بولادى.
بيىل قوعامدىق كولىك پاركىن جاڭالاۋ ءۇشىن ەكولوگيالىق ءھام ەكونوميكالىق تۇرعىدا ءتيىمدى ءارى تۇرعىنداردى تاسىمالداۋعا ىڭعايلى جاڭا مىڭ اۆتوبۋس الىنادى. قالا بيلىگىنىڭ جولاۋشىلارعا جاعداي جاساۋدى كوزدەگەن بۇل شەشىمى كوپ ۇزاماي جەمىسىن بەرە باستادى. اۆتوبۋستاردىڭ الدى وتكەن جىلى-اق جەتكىزىلىپ, قالا شەتىندەگى ەلدى مەكەندەر مەن قالا ورتالىعىنداعى بايلانىس نىعايدى. ءبىر سوزبەن ايتقاندا, شاھار سىرتىنداعى «ۇلاعات», «اقجار», «شاپىراشتى» سىندى شاعىناۋداندار مەن تۇرعىن ءۇي الاپتارىنداعى تۇرعىندارىنىڭ قالا ورتالىعىنا كەلىپ-كەتۋى وڭ شەشىلدى. قوعامدىق كولىكتەردىڭ الەۋمەتتىك باعىتتارى ايقىندالدى. جۇمىس ءتارتىبى مەن تازالىققا ءجىتى ءمان بەرىلدى.
قالا اۋماعىنداعى قاۋىپسىزدىك ءىس-شارالارىن بارىنشا جەتىلدىرۋ ماقساتىندا بيىل قالا اۋماعىنا 50 مىڭ بەينەكامەرا ورناتۋ جوسپارلانۋدا. وسىلايشا, شىمكەنت ەلىمىزدەگى ەڭ قاۋىپسىز قالاعا اينالماق. تسيفرلاندىرۋعا باسىمدىق بەرىلىپ, «Shymcard» جۇيەسى قولدانىسقا ەنبەك. ەندى قالا تۇرعىندارى ءبىر كارتامەن قالاعان قىزمەتتەر مەن سەرۆيستەرگە تولەم جاساي الادى.
بۇگىندە قالا بيلىگى شىمكەنتتىكتەردىڭ تۇرمىسىن جاقسارتۋ, جاڭا جۇمىس ورىندارىن اشۋ, تۇرعىندارعا قولايلى جاعداي جاساۋ ءۇشىن جوسپارلى جۇمىس ىستەۋدە.
حالىقتىڭ كوڭىلىنەن شىققان ىلكىمدى جوبالار اكىمدىك تاراپىنان ءاردايىم جەتىلدىرىلىپ وتىرماق. «اربات» سەكىلدى نىسانداردى كوبەيتۋ, حالىق تىنىعاتىن, سەرۋەندەيتىن, زاماناۋي دەمالىس ورىندارىن اشۋ, كوپقاباتتى ءارى جايلى تۇرعىن ۇيلەر سالۋ تۇراقتى نازاردا بولماق. بۇل باعىتتاعى ءىرى جوبالاردى قارجىلاندىرۋ ماقساتىندا شەتەلدىك ينۆەستورلارمەن كەلىسسوزدەر ءجۇرىپ جاتىر.
قالاداعى ءىرى كاسىپورىندار مەن ورتا جانە شاعىن كاسىپكەرلىك نىسانداردىڭ جالپى, ەڭبەكقور شىمكەنتتىكتەردىڭ تابىستى قىزمەتىنىڭ ناتيجەسىندە شىمكەنت 2025 جىلى ءوزىن-ءوزى تولىق قامتاماسىز ەتەتىن دەڭگەيگە جەتەدى. بۇل - ۇلتتىق ەكونوميكا مينيسترلىگىنىڭ بولجامى.
تۇرعىنداردىڭ ءومىر ساپاسى مەن مادەنيەتىن جاقسارتۋ بۇگىنگى قالا تىزگىنىن ۇستاعان باسشىلارعا جۇكتەلگەن نەگىزگى مىندەتتەردىڭ ءبىرى. وسىلايشا, اۋقىمدى جوبالاردى ىسكە اسىرۋدى كوزدەپ وتىرعان شىمكەنتتىكتەر وزدەرى تۋرالى قوعامدا قالىپتاسقان كەيبىر جاعىمسىز ستەرەوتيپتەردى جويۋ ارقىلى شىمكەنتتى ترەندتەن برەندكە اينالدىرۋدى كوزدەپ وتىر. جۋىردا جۇرگىزىلگەن «شىمكەنت – مەنىڭ قالام» ونلاين ساۋالناماسىنا قاتىسقانداردىڭ 82 پايىزى شىمكەنتتى دامىتۋعا ۇلەس قوسۋدى ازاماتتىق مىندەتىم دەپ سانايتىنىن جەتكىزگەن. بۇل - ءبىزدىڭ پىكىرىمىزگە دالەل بولارى ءسوزسىز.
بەكەن قونىس
