انا مەن بالا ۇلتتىق عىلىمي ورتالىعى باسشىسىنىڭ ورىنباسارى ۆەنەرا التىنوۆا ورتالىقتىڭ بالالار ترانسپلانتولوگياسى بويىنشا مۇمكىندىكتەرىن تانىستىردى. ونىڭ ايتۋىنشا 2012 جىلدان بەرى, ياعني 6 جىل ىشىندە بالالارعا 81 بۇيرەك ترانسپلانتاتسياسى جاسالعان بولسا, وپەراتسيانىڭ 89 پايىزى انا مەن بالا ۇلتتىق عىلىمي ورتالىعىندا وتكەن.
«انا مەن بالا ۇلتتىق عىلىمي ورتالىعىندا 2012 جىلدان بەرى تەرمينالدى كەزەڭدەگى بۇيرەك, باۋىر سوزىلمالى اۋرۋلارىن ەمدەۋدە جوعارى تەحنولوگيالىق ادىستەر ەنگىزىپ كەلەدى. وسىنىڭ ارقاسىندا قازىر بۇيرەك پەن باۋىر ترانسپلانتاتسياسى ءۇشىن ناۋقاس بالالار شەتەلدىك كلينيكالارعا بارمايتىن بولدى. قازىرگى ۋاقىتتا ەلىمىزدە 61 بالا بۇيرەك دونورىنا, 21 بالا باۋىر دونورىنا مۇقتاج. 2015 جىلدان بەرى بالالارعا ءمايىت اعزالارىنان بۇيرەك ترانسپلانتاتسياسى جاسالا باستادى. بىلتىر الماستىرىلعان ورگاندى اعزاسى قابىلداماعان بالاعا قايتارا بۇيرەك ترانسپلانتاتسياسى جاسالدى. بۇل سالادا اعزاسى الماستىرىلعان بالالار مەن ترانسپلانتاتتىڭ امان قالۋ دەڭگەيى ەۋروپا ەلدەرىمەن بىردەي. ءبىزدىڭ ورتالىقتا بۇل كورسەتكىش 94,4%-عا جەتىپ وتىر», دەدى ۆ.التىنوۆا.
بۇل ورتالىقتا 2014 جىلدان باستاۋ العان باۋىر ترانسپلانتاتسياسى دا ايتارلىقتاي دامىعان. كلينيكا باسشىسى قازىرگە دەيىن تۇركيانىڭ باشكەنت ۋنيۆەرسيتەتتىك كلينيكاسى, بەلارۋستىڭ رەسپۋبليكالىق اعزالار مەن تىندەر ترانسپلانتاتسياسى عىلىمي-تاجىريبەلىك ورتالىعى ماماندارىمەن بىرلەسىپ 6 اي مەن 1 جاس 2 اي ارالىعىنداعى 7 بالاعا باۋىر ترانسپلانتاتسياسى ءساتتى جاسالعانىن جەتكىزدى. ونىڭ ىشىندە ەكى ترانسپلانتاتسيانى ورتالىق ماماندارى وزدەرى جاساعان.
سونداي-اق بىلتىر كەمىك مايى ترانسپلانتاتسياسى 527 بالاعا جاسالدى. ونىڭ ىشىندە كۇردەلى وبىرمەن 116 بالا, لەيكوزبەن 411 بالا ەم الىپ شىقتى.
الايدا دونور تاپشىلىعى بالالار ترانسپلانتولوگياسىندا دا تۇيتكىلدى ماسەلە بولىپ وتىر. «جىل سايىن بۇيرەككە مۇقتاج بالالاردىڭ قاتارى 14-18-گە كوبەيىپ وتىرادى. بىراق بالالاردىڭ كەيبىرىنىڭ اكە-شەشەسىنىڭ جوق بولۋى نەمەسە قان توبىنىڭ سايكەس كەلمەۋى, اتا-اناسىنىڭ دەنساۋلىعىنىڭ بولماۋى, دونوردىڭ تابىلماۋى جاعدايدى قيىنداتا تۇسەدى. سونداي جاعدايلاردا مايىتتەن اعزا الا الساق, بالالارعا جاقسى مۇمكىندىك تۋار ەدى. دونور بولماعاندىقتان, كوپ بالا قايتىس بولىپ كەتەدى» دەدى ۆ.التىنوۆا.
مايگۇل سۇلتان,
«ەگەمەن قازاقستان»
