ارگەنتينانىڭ بۋەنوس-ايرەس قالاسىندا وتكەن III جاسوسپىرىمدەر وليمپياداسىنىڭ جەڭىمپازى دياس باحراددين مەن پارادزيۋدو بويىنشا العاشقى قازاقستاندىق الەم چەمپيونى ولجاس ورازالى ۇلى جاڭا پاتەرلەردىڭ كىلتىن الدى.
كەزدەسۋگە III جاسوسپىرىمدەر وليمپياداسىنىڭ جەڭىمپازى دياس باحراددين, پارادزيۋدو بويىنشا الەم چەمپيونى ولجاس ورازالى ۇلى, سونداي-اق دزيۋدودان پارا ازيادانىڭ كۇمىس جۇلدەگەرى - ازامات تۇرىمبەتوۆ, گرەك-ريم كۇرەسىنەن الەم چەمپيوناتىنىڭ قولا جۇلدەگەرى - ايدوس سۇلتانعالي جانە بايداركا مەن كانوە ەسۋدەن ازيا ويىندارىنىڭ قولا جۇلدەگەرى - مەرەي مەدەتوۆ جانە وتىرىپ ويناۋ ۆولەيبولىنان پارا ازيا ويىندارىنىڭ قولا جۇلدەگەرلەرى - ەريك قاسقاباەۆ, شىڭعىس مەدەۋوۆ جانە المات ماناباەۆ قاتىستى.
«بيىل وبلىس سپورتشىلارى الەمدىك ارەنالاردا كوپتەگەن جوعارى تابىستارعا قول جەتكىزىپ, تاۋەلسىز ەلىمىزدىڭ مارتەبەسىن اسقاقتاتۋدا. وبلىسىمىزدا بۇقارالىق سپورت, جوعارى سپورت شەبەرلىگى, ۇلتتىق سپورتپەن قاتار مۇمكىندىگى شەكتەۋلى سپورتشىلار اراسىندا دا سپورت قارقىندى دامىپ كەلەدى. پورتۋگاليانىڭ وديۆەلاش قالاسىندا پارادزيۋدودان وتكەن الەم چەمپيوناتىندا قازاقستان قۇراماسىنا جالعىز التىن مەدالدى قىزىلوردالىق ولجاس ورازالى ۇلى الىپ بەردى. بۇل جەڭىس – قازاقستان پاراليمپيا سپورتى تاريحىنداعى العاشقى مەدال بولىپ سانالادى. سىزدەردىڭ جەتكەن جەتىستىكتەرىڭىز - وسكەلەڭ ۇرپاقتىڭ پاتريوتتىق سەزىمىن كۇشەيتىپ, مىڭداعان جاستىڭ سپورتقا, سالاۋاتتى ءومىر سالتىنا ىنتاسىن ارتتىرارى ءسوزسىز. سىزدەر ءبىزدىڭ ەلىمىزدىڭ حالىقارالىق سپورتتاعى مارتەبەسىنىڭ جوعارى ەكەندىگىن دالەلدەپ, جاتتىقتىرۋشىلار مەن جانكۇيەرلەردىڭ عانا ەمەس, بارشا قازاقستاندىقتاردىڭ ءۇمىتىن اقتادىڭىزدار»,-دەدى وبلىس اكىمى.
كەزدەسۋدە سپورتشىلار اتىنان دياس باحراددين, ايدوس سۇلتانعالي جانە ەريك قاسقاباەۆ وبلىس اكىمىنە قولداۋ كورسەتكەنى ءۇشىن العىس ايتتى.
باقتيار تايجان,
«ەگەمەن قازاقستان»
قىزىلوردا وبلىسى
