قىزىل تەرروردىڭ قاندى قىلىشىنا ىلىككەن 4 مىڭنان استام جازىقسىز قۇربان وسى جاڭالىق اۋىلىنىڭ ماڭىنا كومىلگەن ەكەن. الماتىدان 40 شاقىرىم قاشىقتىقتاعى اۋىلدىڭ ماڭى 1938 جىلدارى «ۇشتىكتىڭ» شەشىمىمەن اتىلعان ادامداردى جەرلەيتىن ورىنعا اينالىپتى. 1988 جىلدان ساياسي قۋعىن-سۇرگىن قۇرباندارىن اقتاۋ جۇمىستارى باستالعاندا بۇل ماڭعا كومىلگەن جازىقسىز جانداردى ەسكە الۋ ءىسى دە قولعا الىنعان بولاتىن. ال تاۋەلسىزدىكتىڭ العاشقى جىلدارىندا «ادىلەت» قوعامىنىڭ مۇرىندىق بولۋىمەن جاڭالىق اۋىلىندا مەموريالدى ەسكەرتكىش كەشەنى تۇرعىزىلىپ, رەپرەسسيا قۇرباندارىنا مۋزەي اشۋ ماقساتى تۇردى. الايدا, ساياسي قۋعىن-سۇرگىن قۇرباندارىنا ارنالعان مۋزەي اراعا 20 جىلدان استام ۋاقىت سالىپ, بيىل قولدانىسقا بەرىلدى.
الماتى وبلىسى اكىمدىگىنىڭ قولداۋىمەن باستالعان قۇرىلىس جۇمىستارىنا 288 ملن تەڭگە قاراجات بولىنگەن ەكەن. ءبىر جىل ىشىندە سالىنعان مۋزەيدىڭ جالپى اۋماعى 535 شارشى مەتردى قۇرايدى. مۋزەيدىڭ ەكسپوزيتسيالىق زالىندا ۇلت قايراتكەرلەرى تۋرالى ماتەريالدار قويىلىپ, وسى جەردە جەرلەنگەن 4 مىڭنان اسا ساياسي-قۋعىن سۇرگىن قۇرباندارىنىڭ اتى-جوندەرى تاس تاقتاعا ويىلىپ جازىلعان.
- بۇل مۋزەي وسىدان 20 جىل بۇرىن سالىنۋى كەرەك ەدى. مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسى جارىق كورگەننەن كەيىن الماتى وبلىسىنىڭ اكىمدىگى مۋزەيدىڭ قۇرىلىسىن قولعا الدى. وسى جەردىڭ توپىراعىن 1930 جىلدارداعى قازاقتىڭ ءسۇت بەتىندەگى قايماقتارى, الاش قايراتكەرلەرى, زيالى قاۋىم وكىلدەرى جامىلىپ جاتىر. ولاردىڭ بارلىعى جازىقسىز, ۇلتىنا, ەلىنە, جەرىنە ادال بولعانى ءۇشىن اتىلعاندار, دەيدى «ادىلەت» قوعامدىق بىرلەستىگىنىڭ توراعاسى عاريفوللا انەس.
قالماحانبەت مۇقامەتقالي,
«ەگەمەن قازاقستان»
الماتى وبلىسى
