ءوزىن اياماعان اياعان
ول كىسى ەكەۋىمىز ۇنەمى تەاتردا كەزدەسەتىنبىز. پرەمەرانىڭ بىردە-ءبىرى ءبىزسىز وتپەيدى. ودان كەيىن بىرگە شىعامىز. مىنەتىن اۆتوبۋسىمىز دا ءبىر. ءۇش-ءتورت رەت كەزدەسىپ ءجۇزتانىس بولعاننان كەيىن:
– سەن «قازاقفيلمدە» جۇمىس ىستەمەيسىڭ بە؟ – دەپ سۇرادى.
ءسويتىپ, ەكەۋىمىز تانىستىق. ول كىسىنىڭ ەسىمى – اياعان ەكەن, فاميلياسى – ءشاجىمباي. مىنە, سودان كەيىن ەكەۋىمىز ەتەنە بولا تۇستىك. تەاتردا ءبىر جاڭالىق بولا قالسا, ايەكەڭنەن ەستيتىن بولدىم, ءبىر قويىلىمنىڭ پرەمەراسى وتەتىنىن قۇلاعىم شالسا, مەن حابارلايمىن. پرەمەرادان كەيىن تاعى كەزدەسەتىن جەرىمىز ورتاق: «زا كۋليسامي» دەيدى عوي ورىستار… «گريمەركادا» تالاي جۇزدەسىپ, پىكىر تالاستىرىپ, ساحنادا ونەر كورسەتكەن كىسىلەردىڭ شاشباۋىن كوتەرەمىز.
ول كىسى ەكەۋىمىز ۇنەمى تەاتردا كەزدەسەتىنبىز. پرەمەرانىڭ بىردە-ءبىرى ءبىزسىز وتپەيدى. ودان كەيىن بىرگە شىعامىز. مىنەتىن اۆتوبۋسىمىز دا ءبىر. ءۇش-ءتورت رەت كەزدەسىپ ءجۇزتانىس بولعاننان كەيىن:
– سەن «قازاقفيلمدە» جۇمىس ىستەمەيسىڭ بە؟ – دەپ سۇرادى.
ءسويتىپ, ەكەۋىمىز تانىستىق. ول كىسىنىڭ ەسىمى – اياعان ەكەن, فاميلياسى – ءشاجىمباي. مىنە, سودان كەيىن ەكەۋىمىز ەتەنە بولا تۇستىك. تەاتردا ءبىر جاڭالىق بولا قالسا, ايەكەڭنەن ەستيتىن بولدىم, ءبىر قويىلىمنىڭ پرەمەراسى وتەتىنىن قۇلاعىم شالسا, مەن حابارلايمىن. پرەمەرادان كەيىن تاعى كەزدەسەتىن جەرىمىز ورتاق: «زا كۋليسامي» دەيدى عوي ورىستار… «گريمەركادا» تالاي جۇزدەسىپ, پىكىر تالاستىرىپ, ساحنادا ونەر كورسەتكەن كىسىلەردىڭ شاشباۋىن كوتەرەمىز.
ايەكەڭ «جانسەبىلدى» باستاعان كەزدە, ۇنەمى ەكىنشى رەجيسسەر بولىپ جۇرەتىن تاتيانا ۆوەۆودينا دەيتىن كىسى ۇزاق جولساپارعا بارۋعا مۇرشام كەلمەيدى دەپ جاعدايىن ايتىپتى. ول كارتيناعا قاتىسىم بولماسا دا, ستسەناري اۆتورى ءجۇسىپبەك, قورعاسبەك پەن اياعانعا انا جەرى, مىنا جەرى دەگەن سەكىلدى ورايلى ساتىنە قاتىستى ءوز پىكىرىمدى ءبىلدىرىپ جۇرەتىنمىن. بالكىم, سودان با ماعان «ەكىنشى رەجيسسەر بول» دەپ ءوتىنىش ايتتى. اڭگىمەنىڭ اقيقاتى, بۇل فيلم باسقالاردى قايدام, مەن ءۇشىن ەڭ ءبىر الاڭسىز ءجۇرىپ, دەمالىپ تۇسىرگەن كينولەنتام بولدى. ءار ءفيلمنىڭ ءوز اڭگىمەسى بولادى. ول دا ادام سياقتى, ءوز تاعدىرىمەن جاسالادى. قازىرگى ريددەر قالاسىنان وتىز شاقىرىم جەردە, التاي تاۋىنىڭ ءمولدىر سۋلى, كوزدىڭ جاۋىن الاتىن جاسىل جەلەكتى ءبىر تۇكپىرىندە تۇسىردىك ونى.
سول كەز ويعا ورالسا, مىندەتتى تۇردە ەسكە الاتىن ءبىر جاعداي: 1991 جىلعى ايگىلى «تامىز توڭكەرىسى». ياناەۆ ءوزىن-ءوزى پرەزيدەنت ەتتى. گورباچەۆ تاسالى جەردە قاماققا الىندى. حالىق نە بولىپ, نە قويىپ جاتقانىنان بەيحابار. بۇل اياعاننىڭ ارقاسىنا ايازداي باتتى. «مەن جۇمىسىمدى ەندى باستاپ ەدىم. «الجيرىم» دە, «جانسەبىلىم» دە وسىمەن بىتكەن شىعار… انا زامان قايتا ورناسا, سونىمەن قۇريتىن شىعارمىز…», دەدى. جۇمىسقا زاۋقىمىز سوقپاي قالدى. اياعاننىڭ ءمانىسى كەتتى. ءبارىمىز سەندەلىسكە ءتۇستىك. اڭدىعانىمىز تەلەديدار. ءبىر جاڭالىق, جاقسىلىق بولسا ەكەن دەۋمەن ەكى كۇنىمىز ءوتتى. پرەزيدەنتىمىز نازارباەۆ سويلەگەن كەزدە عانا بەتىمىزگە قان ءجۇگىردى. وعان قاتتى قۋانعان تاعى دا اياعان. بۇگىندە كينومىزدى كورسەڭىزدەر, سونىڭ ءبىر تۇسىندا قاسىم جاكىباەۆ اعامىزدى سۇيرەتىپ كەلە جاتقاندا, ارباسىنان قۇلايتىن جەرى بار. گالينا ماكاروۆا ارباسىن قايتادان تۇرعىزىپ, وتىرعىزادى دا, تەمىر جولدىڭ جاعاسىن جيەكتەپ ءجۇرىپ وتىرادى. ونى ءبىز كەشكىلىك ۋاقىتتا تۇسىرگەنبىز. سول جەردە «قازىر بارلىق رەسپۋبليكالاردىڭ باسشىلارى شەتىنەن پرەزيدەنت بولىپ كەتتى» دەپ كەلەتىن اكتريسانىڭ ءوز ءسوزى بار. شىن مانىندە نۇرسۇلتان ءابىش ۇلىن جاقسى كورەتىن. بولمەسىندە دە راديونى قوسىپ قويىپ, سويلەگەن سوزدەرىن تىڭداپ وتىراتىن. فيلمدە «كاك ۆاش پرەزيدەنت؟ كاك ەگو زوۆۋت؟» دەپ جاكىباەۆتان سۇرايدى. قاساعاڭ: «ەگو زوۆۋت نۋرسۋلتان!» – دەيدى. «ۆوت, ون منە بولشە نراۆيتسيا» دەپ ارباسىن سۇيرەپ, ىلگەرىلەيدى. كەيىن 1991 جىلدىڭ جەلتوقسانىندا دىبىستاۋ پروتسەسى باستالعان كەزدە ماكاروۆانىڭ وزىنە سول ءسوزىن قايتادان قايتالاتتىق.
«جانسەبىلدى» كورگەن سايىن ون جەتىنشى تامىز ەرىكسىز ەسىمە تۇسەدى. «گكچپ». تۋرا «گكچپ»-نىڭ كەزىندەگى كوڭىل-كۇي, اسەرلەر… ماكاروۆا ءوز بەينەسىمەن عانا ەمەس, سونداعى ءوز داۋسىمەن دە ماڭگىلىككە قالدى.
فيلمدە كەڭەستەر وداعىنىڭ ءانۇرانى ورىندالادى. «قازاقفيلم» شىعارعان دۇنيەلەردىڭ ىشىندە زامانىندا سول ءانۇران ورىندالعان سوڭعى فيلم شىعار بۇل. ەرتەڭ ەرتە جينالىپ, ۆوكزالعا بارا جاتقانىمىزدا وسى ءانۇران ورىندالادى. ماكاروۆا اپامىز جاكىباەۆ اعامىزدى ارباسىمەن سۇيرەتىپ, جايلاپ باسىپ ورماننىڭ ورتاسىمەن تەمىرجولعا كەلە جاتاتىن ەپيزودى. ءفيلمنىڭ ءاربىر ۇزىگى تۋرالى وسىلاي اڭگىمەلەۋگە بولادى. ويتكەنى, قاي ءساتى بولسىن جۇرەك سۇزگىسىنەن ءوتىپ بارىپ جاسالعان عاجاپ دۇنيە بولدى بۇل.
اياعاننىڭ رەجيسسەرلىك شەبەرلىگى تۋرالى ايتقاندا «الجير-ءدى» دە اتتاپ كەتە المايسىڭ. ونىڭ ىشىندەگى قويىلىمدىلىق ساحنالارىنىڭ سونشالىقتى شىنايى كورىنەتىنى سونداي, باياعىدا, تۋرا تۇرمەنىڭ ىشىندە ءتۇسىرىلىپ الىنعانداي اسەر ەتەدى. تۇتقىنداردى ۆاگوننان ءتۇسىرىپ جاتقانى, بالالاردىڭ جىلاعانى – بۇگىندە فيلمدەگى سول ۇزىكتەردى ستالينيزم زامانى زوبالاڭىنىڭ كورىنىسى رەتىندە پايدالانىپ ءجۇر. بۇل اياعاننىڭ ويلاپ تاۋىپ جۇرگەن ساحنالىق كورىنىستەرى. ونى ورىستار «يگروۆوي» دەپ ءجۇر عوي. وندا اكتەرلەر وينايدى. «الجير-گە» دەيىن ونداي ءتاسىلدى ەشكىم قولدانعان ەمەس. ءتىپتى ونەرى وزىق دەيتىن ورىس كينوگەرلەرىنەن دە كەزىكتىرگەن ەمەسپىن. ءبۇگىندە الەمدىك كينولارعا ەركىن جول اشىلدى. سويتسەك, ولاردا بۇرىننان بار ەكەن. تاريحي كينولەنتالاردا سول ءداۋىردىڭ, كەزەڭنىڭ شىندىعىن اشۋ ءۇشىن ەمىن-ەركىن پايدالانعانىن كورىپ-ءبىلىپ ءجۇرمىز. وسىدان جيىرما جىل بۇرىن بۇل بىزگە توسىن ءتاسىل كورىنىپ, ءبىراز كىسىلەر توسىرقاي قاراعانىمەن, قازىرگى كۇنى جاڭالىق بولماي قالدى. مىنە, بۇنى قازاق كينوسىنا العاش رەت اكەلگەن اياعان ءشاجىمباي ەدى دەۋىمىزگە ابدەن بولادى.
سول سەكىلدى اياق استىنان كوتەرىلگەن توپىراقتى داۋىلدىڭ اينالانى ۇيقى-تۇيقى ەتۋى, كيىز ءۇيدىڭ ۋىقتارىنىڭ شەتىنەن ساتىرلاپ سىنىپ, شاڭىراعىنىڭ شايقالۋى – بۇل دا رەجيسسەرلىك شەشىم. قازاق ادەبيەتى مەن ونەرىنىڭ ايگىلى قايراتكەرلەرىن, الاش ارىستارىن, مەملەكەت, قوعام قايراتكەرلەرىن ءتۇرمەنىڭ تورىنا توعىتىپ, اتىپ-اسۋلارى كيىز ءۇيدىڭ ءبىر-بىرلەپ سىنعان كورىنىستەرى ارقىلى ءجۇرەككە جەتەدى. قازاننىڭ وتى وشكەن, قاقپاعى ايدالاعا ۇشقان… انالار باۋىر ەتى – بالالارىنان تىرىدەي كوز جازعان… تەمىر توردىڭ سىرتىندا كوز جاسىن تيا الماي جىلاعان ءسابي بەينەسى… مىنە, وسىنىڭ ءبارى – سول زاماننىڭ سۇرقايىلىعىن انىق تا قانىق ەتىپ كينو تىلىمەن بەينەلەي جەتكىزگەن شىنايى كورىنىستەر.
قازاق كينوسى قۇرىلعالى نە زامان؟! الايدا, اياعان وسى ونەرگە ءوز ءۇنىن الا كەلگەن قازاقى رۋحتاعى ايتۋلى تۇلعا ەكەنىن ءا دەگەندە-اق كورسەتە ءبىلدى. وسى ويىمىزدىڭ ناقتى ءبىر دالەلى – «ءبايتەرەك». بۇل ءوزى اتىنا زاتى ساي كەلەتىن فيلم. كورگەندەرى دە كوپ, كوڭىلگە ءتۇيگەندەرى ودان دا مول قارتتاردىڭ باسىن قوسۋى, سولاردىڭ بىرەگەي وكىلى رەتىندە ءجۇز جاساعان قوشتاي جانىسباي ۇلىن سومداۋى ەرىكسىز ءتانتى ەتەدى. ناماز وقىتۋى, اۋىلداعى ۇلى وتان سوعىسىنان ورالماعان ازاماتتاردىڭ ەسكەرتكىشى الدىنا بارىپ قۇران باعىشتاۋى, كوكپار شابۋى, سىنىقشىلىقپەن اينالىسۋى – ءبارى-ءبارىنىڭ باسى «ءبايتەرەكتە» توعىسىپ جاتىر. باس-اياعى شاعىن, جيناقى كينولەنتا ۇلكەن ءومىردىڭ, قايشىلىعى استاسقان كەشەگى كەڭەستىك زاماننىڭ بەينە بايانشىسى ىسپەتتى. ونى تاماشالاپ, تالداعان كينوگەرلەر مەن قالامگەرلەر قاۋىمى اياعاندى شىعارماشىلىق قۋاتى باي, بولاشاقتا بەرەرى كوپ مامان رەتىندە تاني ءبىلدى. شىندىعىندا, سولاي ءۇمىت ارتقان ەل الدانعان جوق. قازاق كينوسىنىڭ التىن قورىنا ەنگەن سوقتالى فيلمدەر ءتۇسىردى.
ۋاقىت – ءادىل تارازى. قاي نارسەنىڭ دە باعاسى جىلدار جىلجىعان كەزدە ناقتىلانا بەرەدى. اسىلدىڭ اتى وزادى. ول ەشقاشان ءمانىن جويمايدى, ەسكىرمەيدى. ماسەلەن, ايتار بولساق, اياعاننىڭ «الجير-ءى» دە, «بايتەرەگى» دە دەرەكتى دۇنيەدەگى سونداي جاقۇت دەسەك, ابدەن جاراسادى. سونداي-اق, «جانسەبىلىن» جانارعا جاس ءۇيىرمەي كورۋ مۇمكىن ەمەس. مەنىڭشە, بۇلار قاي كەزەڭدە دە, قانداي قوعامدا دا كورەرمەن سۇرانىسىنا شىعاتىن وزىق ۇلگىلەر.
اياعان تۋرالى ويلاسام, فرانتسۋزدىڭ جان ۆيگو دەگەن رەجيسسەرى ەسىمە تۇسەدى. ءوزى وتىز بەس-اق جىل ءومىر سۇرگەن. ارتىندا ەكى-اق كينوسى قالدى. ءبىرى – «ءتارتىبى ءۇشىن ەكىلىك», ەكىنشىسى – «اتالانتا». ول سوڭعى ءفيلمىن ءتۇسىرىپ ۇلگەرگەنىمەن, كورە الماي كەتتى. الايدا, فرانتسۋز كينوسى تاريحىندا قۇبىلىس بولىپ قالدى. كەيىنگى جاڭا تولقىن كينوشىلارى ونى دا ءپىر تۇتادى, سودان ۇيرەنەدى. اياعان دەرەكتى كينودا – «الجير-ىمەن», كوركەم فيلمدە «جانسەبىلىمەن» ءوز مەكتەبىن جاسادى. ءدال بۇگىنگى كۇنى ونداي قازاقى قاسيەتىمەن ەرەكشەلەنگەن, كورەرمەننىڭ كوزايىمى بولارلىق كينولەنتالار جاساپ جۇرگەن رەجيسسەرلار كەمدە-كەم دەسەم, بۇعان ەشكىم دە داۋ ايتا الماس.
ايەكەڭ رەجيسسەر رەتىندە ۇلكەن بيىككە كوتەرىلدى. ءبىز العاش تانىسىپ, ارالاس-قۇرالاس بولىپ جۇرگەن كەزدىڭ وزىندە ساليقالى اڭگىمەلەرگە باراتىن. ويلارى سوقتالى, كەسەك بولىپ كەلەتىن. قاراپ وتىرسام, بۇل وتىزدى ەندى ورتالاعان كەزى ەكەن. ەگەر ءتىرى بولعاندا, ەل اۋزىندا ءجۇرەتىن, قالىڭ قاۋىمنىڭ ويىنان شىعاتىن تالاي-تالاي مىقتى فيلمدەر جاسايتىنى ءسوزسىز ەدى. ءويتكەنى, ول ۇنەمى ىزدەنىس ۇستىندە جۇرەتىن. كىتاپحاناعا ءجيى باراتىن. وقىمايتىن گازەتتەرى قالمايتىن. تەاتردان شىقپايتىن. تەلەراديودا نە بولىپ جاتىر, قانداي جاقسى حابارلار بەرىلدى – بارىنەن حاباردار بولىپ جۇرەتىن. اكتەرلەردىڭ ءبارىن تانيتىن. ولارمەن ۇلكەن-كىشى دەمەي ارالاسىپ, تەڭ دارەجەدە سويلەسەتىن. وسى جاعىنان العاندا دا ونىڭ اتى وزىق ەدى. ايتپەسە, بۇگىندە كينونىڭ توڭىرەگىندە جۇرگەندەر – تەاتردان بەيحابار, ال تەاتردا جۇرگەندەر كينودان حابارسىز بولىپ جاتادى. مىنە, ءبىز بىلەتىن اياعان ءشاجىمباي سونداي جان ەدى. ونىڭ جانە ءبىز بىلمەيتىن ءبىر قىرى – جازا بىلەتىندىگى. سويتسەك, قولجازبا كۇيىندە قالعان پوۆەستەرى مەن اڭگىمەلەرىنىڭ ءوزى ءبىرشاما بولىپ شىقتى.
ىشكى جان دۇنيەسىنىڭ تازالىعى, ءبىلىمدارلىق – ادامنىڭ ءبىتىم-بولمىسىن بيىكتەتە تۇسەتىن اسىل قاسيەتتەر. ونداي قاسيەتتەرى بار كىسىلەرمەن قاشاندا سىرلاسقىڭ, ديدارلاسقىڭ كەلىپ تۇرادى. مەن ءۇشىن اياعان سونداي اعا ەدى. ەكەۋمىز كەزدەسكەن سايىن ءار تاراپتى وي قوزعاپ, ءسوز تالاستىرامىز. پىكىرلەرىمىز قايشىلاسىپ جاتاتىن. ءبىز وسىلاي ورتاق ويعا كەلەتىنبىز. ءبىر وكىنەرلىگى, سونداي پىكىر تالاستىراتىن ادامداردىڭ ازدىعى سول زاماندا دا بايقالىپ قالاتىن. بۇگىنگى ۋاقىتتا ءتىپتى ازايعان. كەيىنگى تولقىن جاستارىمىز دەيتىن قاۋىمعا كەي-كەيدە قارنىڭ اشادى. وقۋعا جوق. اياعان سەكىلدى ونەرىمىزدىڭ تانىمال تۇلعالارىن اتاي باستاساڭ, «ول كىم ەدى؟» دەيدى. ەستىپ وتىرىپ, ءوزىڭ ۇيالاسىڭ… مىسالى, ءبىزدىڭ كەزىمىزدە اسسيستەنتتەردىڭ ءوزى كەز كەلگەن اكتەردىڭ اتى-ءجونىن ايتىپ, ونىڭ قاي سپەكتاكلدە قاي ءرولدى سومداعانىن, قاي كينودا كىم بولىپ ويناعانىن ءبىلىپ تۇرۋشى ەدى. بۇگىندە وندايلارمەن ساعىنىسىپ كورىسەسىڭ. اياعان ءشاجىمباي اكتەرلەردىڭ ءبارىن ءبىلىپ قانا قويماي, ولاردىڭ قابىلەت-قارىمىن, قانداي ءرولدى سەنىپ تاپسىرۋعا بولاتىنىن سەزىنىپ, بولاشاق فيلمدەرىنە ويناتۋ ءۇشىن ىشتەي ۇيعارىپ, توپشىلاپ جۇرەتىن. ماسەلەن, جاپ-جاس جىگىت كەڭەس نۇرلانوۆتى تاڭداۋىن قاراڭىزشى! ول كەزدە تيۋز-ءدىڭ اكتەرى. ونەرگە ەندى-ەندى قادام باسقان شاعىنان قاداعالاپ ءجۇرىپتى. قاسىم اعامىز سومداعان مۇقاتايدىڭ جالىنداعان جاستىق شاعىن جاساسا وسى جاسايدى دەپ بىلگەن. سونداي-اق, تەرگەۋشىنىڭ رولىنە ءنۇراسىلوۆتى شاقىرعاندا دا, ونىڭ تەك قانا سىرتقى تۇلعاسى ەمەس, اكتەرلىك شەبەرلىگىن دە, مىنا ءسوزدى وسى ايتا الادى, مىنا ءاندى وسى سالا الادى دەگەن عوي. فيلمدە «تىلسىم بار, گۇلسىم بار» دەپ كەلەتىن قايىرمالى ولەڭ ايتىلادى, سول تۋرا سونىڭ ينتەللەكتىسىنە سايكەس كەلەدى. شىندىعىندا, «ول بىزگە اعايىن بولادى, مىناۋ جەڭگە بولادى» دەگەن سوزدەرى دە وزىنە سونداي ۇيلەسەدى. ءدال سولاي ويناۋ ءۇشىن دە اكتەرلىك قورەك كەرەك قوي. ايەكەڭنىڭ رەجيسسەرلىك سەزىمتال تۇيسىگى قاتەلەسپەپتى, ءرول يەسىن تاپتى. وسى سەكىلدى ەكىنشى تەرگەۋشىنى ىزدەگەن كەزدە دە ول الدانبادى. ونى ورىنداعان نىشان تىلەۋبەرگەنوۆ تە, ول جەتىساي تەاترىندا اكتەر بولاتىن, قايتىس بولىپ كەتتى, سول ارقىلى بەريانىڭ بەينەسىن اشقىسى كەلدى. مۇرتىن دا بارماقتاي ەتىپ ەرنىنىڭ ۇشىنا قويعىزدى. شاشىن دا ءدال سولاي تىقىرلاتىپ العىزدى. كۇجىرەيگەن جەلكەسىنىڭ جىبىرلاۋىن دا ويلاستىرعان ءوزى. ەگەر رەجيسسەردىڭ دىتتەگەن ويى سولاي بولماسا, كىم ءبىلسىن, «جانسەبىل» باسقاشا شىعار ما ەدى؟.. نىشان ايەكەڭ نە ايتسا, سول ايتقانىنىڭ ءبارىن ءىلىپ الىپ كەتىپ, ويىنان شىقتى, اسقان شەبەرلىگىن تانىتتى. ويىمىزدى تۇيىندەپ ايتقاندا, فيلم ايەكەڭنىڭ ويلاعانىنداي ەكراندالدى. سونى تاماشالاعان قازاق تەاترىنىڭ ءدۇلدۇل ۇستازى اسقار توقپانوۆ: «مىنە, سوڭعى موگيكاندار بۇل!» دەپ, ونىڭ بەتىنەن ءسۇيىپ, قولىن الىپ ەدى.
اسەكەڭنىڭ باعاسى – اسقار تاۋداي باعا! ونى الۋ مىڭنان ءبىردىڭ عانا ەنشىلى تابىسى بولاتىن. سونداعى ايەكەڭنىڭ قۋانىشى-اي! «توقپانوۆ مەنىڭ قولىمدى الدى, بەتىمنەن ءسۇيدى», – دەدى. ءدال سول ساتتە ونىڭ كوزى باقىتتان بال-بۇل جانىپ, ءوزى اسپاندا قالىقتاپ تۇرعانداي كورىندى. سولاي بولاتىن دا ءجونى بار. سەبەبى, ەشكىمدى اكەم-شەشەم دەمەيتىن, بەتىڭ بار, ءجۇزىڭ بار دەپ قارامايتىن, قاي كەزدە دە ايتارىن ايتىپ سالاتىن بولەكشە ءبىتىم يەسى اسقار اعامىزدىڭ اق جارىلعان ءادىل باعاسىن ەستىگەن اياعان ءشاجىمبايدىڭ باسقاداي بولۋعا قاقىسى جوق ەدى. ءبىز سوعان كۋامىز…
شىنايى جاسالعان دۇنيەنىڭ قاي كەزدە دە تولقىتاتىنى بار. سودان دا بولار, ءوزىم قاسىندا ءجۇرىپ, قولىمنان كەلگەنشە بىرگە قىزمەت ەتكەن ايەكەڭنىڭ «جانسەبىلى» اۋەلگى اسەرىن جوعالتقان جوق. قانشاما رەت كورسەم دە جۇرەگىمدى بۇلك ەتكىزىپ جىبەرەتىن جەرلەرى كوپ-اق. كوزىمە ەرىكسىز جاس كەلتىرەدى. «جۇرەكتەن شىققان دۇنيە جۇرەككە جەتەدى» دەگەن وسى شىعار. ايەكەڭ الگىندەي ءساتتىڭ ءبارىن اسقان سەزىمتالدىقپەن ءدوپ باسقان. بۇنىسى كوركەم فيلمدەرگە عانا ەمەس, دەرەكتى ءدۇنيەلەرىنە دە ءتان نارسە. سوندىقتان دا ونىڭ «الجير-ءى» دە جۇرتتىڭ جالىقپاي كورەتىن كينوسى – حالىقتىق كينوعا اينالدى. وسىنىڭ ءبارى اياعاننىڭ ءوزىن اياماعانىنىڭ, كورەرمەنىن ايالاعانىنىڭ ارقاسى.
دارحان قوجاحان,
كينورەجيسسەر.
