بۇل دەرەكتەردى «تۇركىستان وبلىسى جانە شىمكەنت قالاسى كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ توراعاسى بەرىك بەكجانوۆ بريفينگتە مالىمدەدى. جالپى 17 سالالىق كاسىپوداقتار بىرىكتىرىلگەن بىرلەستىك, 2052 باستاۋىش ۇيىمىنداعى 217 مىڭنان استام كاسىپوداق مۇشەلەرىنىڭ قۇقى مەن مۇددەلەرىن قورعايدى. كاسىپوداقتاردىڭ بەلسەندىلىگىنىڭ ارقاسىندا 1836 مەكەمەدە ۇجىمدىق شارت جاسالعان, بۇل بارلىق جاسالعان ۇجىمدىق شارتتاردىڭ 32%-ى. بيىلعى تەكسەرۋلەر ناتيجەسىندە 1288 ەڭبەك قاۋىپسىزدىگىن ساقتاۋ ەرەجەلەرىن بۇزۋشىلىق انىقتالعان. ولاردىڭ 410-ى ەڭبەك قاۋىپسىزدىگى جاعدايىن قامتاماسىز ەتۋگە قاتىستى بولسا, 261-ءى ەڭبەك قاۋىپسىزدىگى ەرەجەسىن جانە نۇسقامالارىن بۇزعان, 434-ءى ارنايى كيىممەن جانە جەكە قورعانىس كيىمىمەن قامتاماسىز ەتپەگەن. وكىنىشكە قاراي, 2018 جىلى تۇركىستان وبلىسى جانە شىمكەنت قالاسى بويىنشا كاسىپورىندار مەن ۇيىمداردا 101 وندىرىستىك جازاتايىم وقيعا ورىن الىپ, زارداپ شەككەن 122 ازاماتتىڭ 22-ءى قايتىس بولعان, 51-ءى اۋىر جاراقات السا, 49-ى جەڭىل جاراقاتتانعان.
كاسىپورىنداردىڭ جۇمىسشىلارعا بەرەشەگىن وتەۋ باعىتىنداعى جۇمىستار دا بەلسەندى جۇرگىزىلىپ كەلەدى. «شىمكەنت قالاسى بويىنشا جالاقى قارىزداردى جويۋ جونىندە ۇشجاقتى كوميسسيانىڭ اتقارعان جۇمىستارىنىڭ ناتيجەسىندە 4 مەكەمە (10 ادام – 2,9 ملن.تەڭگە) قارىزدارىن جاپقان, 2 مەكەمە بانكروت (378 ادام – 45 ملن.تەڭگە) دەپ تانىلعان. بۇگىنگە 6 مەكەمەدە 910 جۇمىسكەردىڭ الدىندا 143,4 ملن. تەڭگە جالاقى قارىزى قالىپ وتىر. ال تۇركىستان وبلىسى بويىنشا 2 مەكەمە (384 ادام – 30,75 ملن.تەڭگە) قارىزىن جاۋىپ, 2 مەكەمەدەگى 73 جۇمىسكەردىڭ الدىندا 43 ملن.735 مىڭ تەڭگە جالاقى قارىزى قالىپ وتىر», - دەيدى اۋماقتىق كاسىپوداقتار بىرلەستىگىنىڭ توراعاسى بەرىك بەكجانوۆ. سونداي-اق, جۇمىسكەرلەردىڭ دەنساۋلىعىن جاقسارتۋ ماقساتىندا كاسىپوداقتار ورتالىعى جانىنان «پروفتۋر» تۋريزم ورتالىعى 2018 جىلدىڭ تامىز ايىنان جۇمىس ىستەۋدە. بۇگىنگە جالپى 15 جولداما, «مەركە», «جاڭاقورعان», «مانكەنت» جانە «ارمان» شيپاجايلارىنا بەرىلگەن.
عالىمجان ەلشىباي,
«ەگەمەن قازاقستان»
تۇركىستان وبلىسى
