كىپ-كىشكەنتاي كورەرمەندەرىن ءارى قۋانتىپ, ءارى تاڭعالدىرۋ ءۇشىن بيىل شەتەلدىك ونەرپازداردىڭ قاتىسۋىمەن «جاڭا جىلدىق سۋدوكۋ» قويىلىمىن ارەناعا شىعاردى. جاڭاجىلدىق العاشقى قويىلىمعا بالالار ۇيلەرىنىڭ بالدىرعاندارى مەن كوپ بالالى وتباسىلار ورتاقتاسىپ, رياسىز قۋانىشقا بولەندى.
– جىل سايىن كورەرمەندەرىمىزگە توسىنسىي جاساۋ ءۇشىن بار ونەرىمىزدى سالامىز. وتكەن جىلى «ەر توستىك» ەرتەگىسى قويىلدى. بيىلعى قويىلىمنىڭ وزگەشەلىگى – تسيرككە شەتەلدىك ارتىستەردى شاقىردىق. ولار كوپتەگەن حالىقارالىق تسيرك ونەرى فەستيۆالىنىڭ بىرنەشە دۇركىن لاۋرەاتتارى كلوۋن ارمەن اسيريانتس (يسپانيا), ماسكەۋدەگى نيكۋلين تسيركىنىڭ بوس ساتىداعى ەكۆيليبريست-جونگلەرى كريستينا گۋك (رەسەي), شاۋىپ بارا جاتقان اتتىڭ قۇلاعىندا وينايتىن «نوماد» توبىنىڭ ءارتىسى الفيا كۋنگۋجينوۆا مەن ونىڭ كاسكادەر قىزدارى, سپورتتىق گيمناستيكادان الەم چەمپيونى, «باتۋتتاعى اكروباتتار» نومەرىنىڭ جەتەكشىسى سەرگەي فەدورچەنكولار, – دەيدى «قازاق مەملەكەتتىك تسيركى» مكقك ديرەكتورى باقىت بوكەباەۆ.
وسىلايشا سالت-ءداستۇرى جاعىنان وزىمىزگە جاقىن جاپون ءاپسانالارىنا بارىپ وتىر. سيۋجەت بويىنشا جاپون ارۋاعى ەمما ءوزىنىڭ جاۋىز نوكەرلەرىمەن كىشكەنتاي كورەرمەندەردى جاڭا جىل تۇمارىنان ايىرماقشى بولادى. قارا كۇشتەردى ماقساتىنا جەتكىزبەۋ جولىندا تسيرك ترۋپپاسى سان الۋان ونەردىڭ ءتۇرىن كورسەتتى.
مەرەكەلىك باعدارلامادا ج.ەلەبەكوۆ اتىنداعى رەسپۋبليكالىق ەسترادا جانە تسيرك كوللەدجىنىڭ جاڭا تۇلەكتەرى دە ءبىرىنشى رەت كۇردەلى اكروباتيكالىق نومىرلەرىمەن ونەر كورسەتۋگە مۇمكىندىك الدى.
ەرتەگى سوڭىندا اقشاقار سۇيكىمدى قوياندارىمەن, قۇنجىڭ قاققان مەيىرىمدى ايۋلارىمەن شىعىپ, سيقىرلى ساندار كۇشىمەن جاڭاجىلدىق سۋدوكۋدىڭ شەشىمى تابىلدى.
ايناش ەسالي,
«ەگەمەن قازاقستان»
الماتى
