اتالعان فەستيۆال جاس كاسىپكەرلەردىڭ ەكو-جوبالارىن قولداۋعا باعىتتالعان. ناتيجەسىندە فەستيۆالگە قاتىسۋشىلاردىڭ بىرقاتارى پوليەتيلەن پاكەتتەردى ەكولوگيالىق ماتەريالدارمەن الماستىرۋدىڭ جولدارىن ۇسىندى. ماسەلەن, «Life bag» جوباسىنىڭ يەسى دميتري سەباستيانوۆ بىرنەشە جىلدان بەرى پوليپروپيلەن پوليمەرىنەن ەكولوگيالىق پاكەت شىعارىپ ءجۇر. ونىڭ ارتىقشىلىعى, پوليپروپيلەننەن جاسالعان, ماتا ەمەس ميكروتالشىقتى ماتەريال 3-5 جىلدا توپىراققا ءسىڭىپ جوق بولىپ كەتەدى. بۇل تەحنولوگيا 80-جىلدارى ەۋروپادا جاسالعان. الماتىدا وسى ماتەريالدى وراما تۇرىندە شىعاراتىن زاۋىت بار ەكەن.
فەستيۆالدە پلاستيك پاكەتتەردى الماستىرۋعا ۇمتىلعان باسقا دا بالامالى جوبالار تابىلدى. بۇل كەندىر, پلاشش ماتاسى نەمەسە كاپرون ماتەريالدار بولدى.
– جوبا باستالعالى بەرى كوپ رەت پايدالانۋعا بولاتىن سومكەلەر, باحيلالار, بولات بوتەلكەلەر, بلوكنوتتار, بامبۋك ىسقىشتاردى ۇسىندىق. كەيبىرەۋىن ءوزىمىز شىعارىپ وتىرمىز. ەڭ باستىسى, كەز كەلگەن بۇيىمدى ءبىر پايدالانىپ, لاقتىرا سالماۋ. بيىل ناۋرىز ايىنان بەرى كوپ رەت پايدالانۋعا بولاتىن دوربالار ارقىلى 1150 پاكەتتى ۇنەمدەدىك, – دەيدى «پاكەتتەر جويىلسىن» ەكولوگيالىق بلوگىنىڭ اۆتورى ميحايل بەلياكوۆ.
ال ءال-فارابي اتىنداعى قازاق ۇلتتىق ۋنيۆەرسيتەتىنىڭ 3-كۋرس ستۋدەنتى دينا ۋبىشەۆا ءسىڭلىسى سايدامەن بىرگە پاكەتتەردەن سىرعا, داپتەر قاپتاعىش, سومكە سياقتى بۇيىمدار جاساۋدى ۇيرەنىپتى.
– قازىر بىزدە قاتتى پلاستيكتەرمەن جۇمىس ىستەيتىن ماشينا جوق. سوندىقتان 20-30 شاقتى پاكەتتى قاباتتاپ, ۇتىكپەن نىعىزداپ, پلاستينالار جاساپ الامىز. سودان كەيىن ونى ءبىر كادەگە جارايتىن دۇنيەگە اينالدىرامىز. قالدىق پاكەتتەردى دوستارىمىز, تانىستارىمىز, وقىتۋشىلارىمىز اكەلىپ بەرەدى, – دەيدى دينا ۋبىشەۆا.
مىسالى ءال-فارابي اتىنداعى قازۇۋ پان گي مۋن اتىنداعى تۇراقتى دامۋ ينستيتۋتىنىڭ جوبالىق مەنەدجەرى مايا سۇيىنشاليەۆا ينستيتۋت ديرەكتورى كارتريجدەن قالعان بوياۋ قالدىقتارىنان جەيدەلەرگە ەكولوگيالىق تاقىرىپتا تاماشا سۋرەتتەر سالۋدى ۇسىنىپ وتىرعانىن ايتادى. ويتكەنى ونىڭ قالدىقتارىن قولدانباسا, قورشاعان ورتا ءۇشىن وتە زياندى. بۇل ءادىس اقش-تا بۇرىننان بار كورىنەدى.
«قازاقستاندا قورشاعان ورتانى جاقسارتۋعا باعىتتالعان جوبالار كوپ ەمەس. سوندىقتان وسىناۋ جاھاندىق ماسەلەگە جاستاردى تارتۋدىڭ ماڭىزى وراسان. ەكولوگيا – ءبىزدىڭ ورتاق بولاشاعىمىز. سوندىقتان جاستاردىڭ يدەيالارىنا سەرپىن بەرىپ, ەكو-قوعامداستىعىن قۇرۋعا باعىتتالعان «3.2.1. ستارت!» جوباسىن قايتادان وتكىزىپ وتىرمىز. سايىس باستالعان جىلى جاستاردىڭ يدەيالارى شالا بولاتىن. بىراق قاتىسۋشىلار ۇيرەنىپ, سىناپ كورىپ, بۇگىنگى تاڭدا گرانت ۇتىپ الماعاندار دا ءوز ەكو-جوبالارىن جۇزەگە اسىرىپ, تابىس تابا باستادى. «3.2.1. ستارت!» جوباسى ارقىلى جاستارىمىز ەكو-يدەيالار ءوزىمىزدىڭ اينالامىزدا ەكەنىن ءتۇسىندى», دەدى بايقاۋدىڭ ۇيىمداستىرۋشىسى ءاليما يسەمباەۆا.
سايىستىڭ سىيلىق قورى – 3 ميلليون تەڭگە. قازىردىڭ وزىندە كەلەسى ماۋسىمعا وتىنىمدەر قابىلداۋ باستالىپ كەتكەن. بيىل فينالعا شىققاندار جوبالارىن العا جىلجىتۋدىڭ مەنەدجمەنتىن مەڭگەرىپ, بيزنەس-جوسپارلاۋدى, ماركەتينگ جانە PR-ستراتەگيالارىن ۇيرەنىپ, ەكى كۇندىك bootcamp وقۋىن ءوتتى.
ايناش ەسالي,
«ەگەمەن قازاقستان»
الماتى
