15 جەلتوقسان كۇنى يبراگيم ەسكەندىر ازىربايجاندىق انار ابدۋللاەۆپەن شارشى الاڭعا شىعىپ, 90,7 كگ اۋىر سالماقتا Pro Box نۇسقاسى بويىنشا تمد چەمپيونى تيتۋلىنا تالاسقان بولاتىن. 10 راۋندقا ەسەپتەلگەن جەكپە-جەكتە قازاقستاندىق بوكسشى العاشقى ءۇش مينۋتتا-اق نوكاۋتپەن جەڭىسكە جەتتى.
ەلگە جەڭىسپەن ورالعان كاسىپقوي بوكسشى جەڭىسىن تاۋەلسىزدىك مەرەكەسىنە ارناعانىن اتاپ ءوتتى.
"تاۋەلسىزدىك قارساڭىندا رينگكە شىققان مەن ءۇشىن ەرەكشە رۋح بەردى. اتا-بابالارىمىز تاۋەلسىزدىك ءۇشىن كۇرەسكەن, ال بۇگىنگى قازاقستاننىڭ ۇرپاعى تاۋەلسىزدىكتى ساقتاپ قالۋمەن كۇرەسۋىمىز كەرەك. ول ونەر, سپورت, عىلىم جولى بولۋى مۇمكىن. ءاربىر قازاقتىڭ بالاسى تۋ كوتەرسەم دەپ ارماندايتىن بولسا, ءبىزدىڭ ەلىمىز جامان بولمايدى", - دەدى بوكسشى.
ايتا كەتسەك, وسىعان دەيىن 76 كگ سالماقتا شارشى الاڭعا شىعىپ جۇرگەن بوكسشى سوڭعى جەكپە-جەكتە 90, 7 كگ اۋىر سالماققا اۋىستى.
"جەكپە-جەك وتە جاقسى ءوتتى, ءوزىمدى ەركىن ۇستادىم. ويتكەنى مەنىڭ باپكەرلەرىم, پروموۋتەرىم جالعاس توكەشوۆ, باۋىرجان رىسبەكپەن وتە جاقسى تاكتيكادا جاتتىعۋلار جاساپ, دايىندالدىق",- دەپ باپكەرلەرىنە العىسىن ءبىلدىردى.
ءان الەمىندە كوك بايراقتى جەلبىرەتكەن يبراگيم ەسكەندىر سوڭعى جىلدارى كوك تۋىمىزدى كاسىپقوي بوكستا جەلبىرەتىپ ءجۇر. بۇل – ونىڭ كاسىپقوي مانسابىنداعى التىنشى جەكپە-جەگى. بۇعان دەيىن ول 5 جەكپە-جەككە شىعىپ, بارىندە نوكاۋتپەن جەڭىسكە جەتكەن بولاتىن. 2001 جىلدان 2007 جىلعا دەيىن كاسىبي تۇردە بوكسپەن اينالىسقان ول, 2007 جىلى جاتتىعۋ بارىسىندا اۋىر جاراقات الۋىنا بايلانىستى بوكستان قول ءۇزىپ كەتكەن. الايدا, 10 جىلدان سوڭ ءوزىنىڭ سۇيىكتى ءىسى, بالا ارمانى بوكسقا قايتا كەلدى.
سونىمەن قاتار, سوڭعى ۋاقىتتا يبراگيم ەسكەندىر قازاقستاننىڭ العاشقى دەنساۋلىق ەلشىسى رەتىندە جاستار اراسىندا سالاۋاتتى ءومىر سالتىن, دۇرىس تاماقتانۋ ءتارتىبىن دارىپتەپ ءجۇر.
ايتا كەتسەك, قازان ايىندا دەنساۋلىق ساقتاۋ ءمينيسترى ەلجان ءبىرتانوۆ ەلىمىزدىڭ بەلگىلى سپورتشىلارى, انشىلەرىمەن كەزدەسۋ وتكىزىپ, ولارعا «دەنساۋلىق ەلشىسى» اتاعىن بەرگەن بولاتىن. ولاردىڭ قاتارىندا يبراگيم ەسكەندىر دە بار.
