كامبودجالىق «مۇراگەر حانزادا» كومپانياسى الەمدەگى الپاۋىت بيزنەس قۇرىلىمداردىڭ ءبىرى سانالادى. ءبىزدىڭ ەلىمىزدە بۇل كومپانيا «اقمول» كاسىپورنىمەن سەرىكتەستىك جۇمىس جاساۋدا. جاڭا تەحنولوگيالار سالاسىندا الەمدىك دەڭگەيدە بەلگىلى «مۇراگەر حانزادا» قىتاي, لاوس سياقتى مەملەكەتتەردە اقپاراتتاردى ساقتاپ, وڭدەۋگە مۇمكىندىك بەرەتىن 40-تان استام «Data ورتالىق» سالعان.
بۇل جوبالارعا 1,2 ملرد. اقش دوللارى كولەمىندە ينۆەستيتسيا قۇيعان. كومپانيا وكىلدەرىنىڭ تاڭداۋى ەلەكتر ەنەرگياسىنا باي ەكىباستۇزعا ءتۇسىپتى. ال, «Data ورتالىقتىڭ» جۇمىسىنا 1 مىڭ مەگاۆاتت كولەمىندە ەنەرگيا قاجەت كورىنەدى. ەكىباستۇزعا قازىر مول ەنەرگيانى تاراتۋعا مۇمكىندىك بەرەتىن ينفراقۇرىلىم كەرەك.
بولات باقاۋوۆ بۇنداي ۇلكەن بيزنەس, جاقسى ماقسات ءۇشىن جان-جاقتى قولداۋ كورسەتۋگە ءازىر ەكەنىن جەتكىزدى. ال, كامبودجالىق كاسىپكەرلەر تاراپىنان بۇل ماقسات ءۇشىن ينۆەستيتسيا قۇيۋ تۋرالى شەشىم قابىلدانسا, جوبانىڭ جۇزەگە اسىرىلۋىن وبلىستىق اكىمدىك بارىنشا قولدايدى.
كەزدەسۋ سوڭىندا كومپانيا وكىلدەرى جوبانى جان-جاقتى سارالاپ, ءتيىستى شەشىم قابىلدايتىندارىن جەتكىزدى.
فاريدا بىقاي,
«ەگەمەن قازاقستان»
پاۆلودار
