اۋدان اكىمى باۋىرجان قاسەنوۆ اۋىلدىڭ وركەندەۋىنە ۇلەس قوسىپ جۇرگەن اۋىل حالىقنا جۇمىس بەرىپ وتىرعان «گاليتسكوە» جشس, «الديار» جانە «ەگىنباي», «بيك», «اننا», «شىڭعىسحان», «شترەك» شارۋا قوجالىقتارىنىڭ باسشىلارىنا اۋدان حالقى اتىنان العىس ءبىلدىردى. مىسالى, شالعايداعى قاراتاي اۋىلىنداعى ەگىن جانە مال شارۋشىلىعىمەن اينالىساتىن «شىڭعىسحان» شارۋا قوجالىعىنا تۇرعىندار ىرزا.
اۋىل ىشىلىك جۇمىستارعا كومەك بەرىپ, قايىرىمدىلىق جاساپ, قولداۋ كورسەتەدى. بارلىق مەرەكە كۇندەرى مەكتەپ وقۋشىلارىن سىيلىقتارىمەن قۋانتادى. قىستى كۇندەرى شارۋا قوجالىعىنىڭ تەحنيكالارى جولدى قالىڭ قاردان تازالايدى. ال, الەكساندر كاسيتسىن باسقاراتىن «گاليتسكوە» جشس-دا قۋاتتىلىعى اۋسىمىنا 4,8 توننا كۇنباعىس مايىن وندىرەتىن زاۋىت جۇمىس جاسايدى. قۇنى 1 ملرد تەڭگە تۇراتىن 1 مىڭ باس قارا مال تۇراتىن كەشەن سالىنۋدا. سونىمەن بىرگە, «الديار», «ەگىنباي» شارۋا قوجالىقتارىندا زاماناۋي مودۋلدىك استىق كەپتىرگىش قۇرىلعى ورناتىلدى. بۇلارمەن بىرگە «بيك» شارۋا قوجالىعى سۋارمالى ەگىس القابىن 200 گەكتارعا, «اننا» شارۋا قوجالىعى 160 گەكتارعا, «شترەك» شارۋا قوجالىعى 80 گەكتارعا كەڭەيتۋدى جوسپارلاۋدا.
جيىندا اۋىلدىڭ وركەندەۋىنە ۇلەس قوسقان اقىلبەك قابيەۆ, راقىم ءمۇساليموۆ, اباي سۇلەيمەنوۆ, دۇيسەنبى كۇلجانوۆ, ۆەرا ەراشوۆا,نينا سۆيريدەنكو, پەتر فليۋنت سەكىلدى ەڭبەك ارداگەرلەرى «اۋداننىڭ قۇرمەتتى ازاماتتارى» اتاعىنا يە بولدى. ال, «تۋعان جەرگە تاعزىم» شاراسى بارىسىندا اۋىلدىڭ ءوسىپ-وركەندەۋىنە ۇلەس قوسىپ جۇرگەن جانە وسى شاراعا بەلسەنە قاتىسقان الەكساندار كاسيتسىن, جولامان مۇسابەكوۆ, سەرگەي سارۋدجيدي, سەرگەي چەرەۆكو سياقتى اۋىلدىڭ ىسكەر كاسىپكەرلەرى «جىل مەتسەناتتارى» اتاندى. مەرەكەلىك شارا جەرگىلىكتى ونەر ۇجىمدارىنىڭ كونتسەرتتىك باعدارلاماسىنا ۇلاستى.
فاريدا بىقاي,
«ەگەمەن قازاقستان»
پاۆلودار وبلىسى,
ۋسپەن اۋدانى
