شارا شىمىلدىعىن استانا قايىرىمدىلىق گراند بالىنىڭ نەگىزىن قالاۋشى الپامىس ءشارىموۆ اشتى:
«تاۋەلسىزدىك, جاڭا جىل مەرەكەلەرىنىڭ قارساڭىندا بۇگىن سىزدەردى ارنايى قۇتتىقتاۋعا كەلىپ وتىرمىز. بۇل 18 جەلتوقساندا وتەتىن كەش اياسىندا ۇيىمداستىرىلىپ وتىرعان شارا جانە سول كەشكە ءبىز سىزدەرمەن بىرگە توسىنسىي دايىندايتىن بولامىز», دەدى ول.
كونتسەرت باستالعاننان قاريالاردىڭ كوڭىل-كۇيىنە ەرەكشە اسەر ەتتى. اۋەزدى اننەن باستالعان كەش ساحنانى ارلەي تۇسكەن ۇلتتىق بيمەن جالعاستى. شارا كەزىندە بىردە-ءبىر قاريانى نازاردان تىس قالدىرماعان ۇيىمداستىرۋشىلار بىرگە بي بيلەپ, ءان شىرقاپ, ءتۇرلى ويىندار ويناتتى.
قايىرىمدىلىق گراند بالى ەڭ العاش رەت الپامىس ءشارىموۆتىڭ ۇيىمداستىرۋىمەن 2015 جىلى ورال قالاسىندا باستاۋ العان, ول ەستىپ-سويلەۋ قابىلەتىنەن ايىرىلعان بالالار مەكتەپ-ينتەرناتىنا ارنالعان كەش بولاتىن.
«مەن 4 جىل قاتارىنان ورال قالاسىندا بۇل شارانى ۇيىمداستىرىپ كەلەمىن. بيىل استانا قالاسىنىڭ قوعامدىق دامۋ ىستەر باسقارماسى ماعان وسى شارانى ۇيىمداستىرۋعا ۇسىنىسپەن كەلىپ, قولداۋ كورسەتىپ وتىر. مۇنداي كەشتەردى وتكىزۋدەگى ماقساتىم – جاستاردى قايىرىمدىلىققا ۇندەپ, كوپشىلىكتىڭ كوكەيىندەگى «قايىرىمدىلىق جاساۋ ءۇشىن باي بولۋ كەرەك» دەگەن ۇستانىمدى جويۋ», دەيدى الپامىس ءشارىموۆ.
ايتا كەتەيىك, استانا قايىرىمدىلىق گراند بالى اياسىندا بالالار ۇيىندە قايىرىمدىلىق كونتسەرت, شەبەرلىك سىنىپتارى جانە «جۇرەكتەن جۇرەككە» اكتسياسى وتەدى. وسى اكتسيا كەزىندە الەۋمەتتىك جاعدايى تومەن 150 وتباسىعا توسىنسىي جاسالاتىن بولادى.
قارلىعاش قۇرامىس,
«ەگەمەن قازاقستان»
