التاي قالاسىندا ەسىگىن ايقارا اشقان ورتالىقتى شىعىس قازاقستاندا جۇمىسىن باستاعان العاشقى ورتالىقتارىڭ ءبىرى, قارلىعاشى دەۋگە بولادى. وبلىستىق سوتتىڭ ازاماتتىق ىستەر جونىندەگى سوت القاسىنىڭ توراعاسى دامير ابدۋعاليەۆتىڭ ايتۋىنشا, ورتالىق جوعارى سوتتىڭ «سوت جۇيەسىنىڭ 7 تاسى» جوباسى اياسىندا اشىلىپ وتىر. «ورتالىقتى اشۋ جونىندەگى ۇسىنىسىمىزدى اۋدان اكىمى نۇرجان توقسەيىتوۆ قۋانا قۇپتاپ, بىزگە عيمارات بەردى. ءبىز ول عيماراتتى وبلىستىق سوتتىڭ كومەگىمەن جوندەۋدەن وتكىزدىك», - دەيدى اۋداندىق سوتتىڭ توراعاسى ايكەن يسماگۋلوۆ.
ەندى اۋدان مەن قالا تۇرعىندارىنىڭ تۇيتكىلدى ماسەلەلەرىن شەشۋگە مەدياتورلار, نوتاريۋستار, پسيحولوگتار مەن سوت ورىنداۋشىلارى كومەكتەسەدى. اۋداندىق سوت توراعاسىنىڭ سوزىنە سەنسەك, جاڭا ورتالىقتا زاڭدىق جانە پسيحولوگيالىق ءبىلىمى بار مامانداردان, كاسىبي جانە كاسىبي ەمەس مەدياتورلاردان كەڭەستەر الۋعا بولادى. اۋدان جانە قالا تۇرعىندارىنا بارلىق قىزمەتتەر تەگىن كورسەتىلەدى.
سالتاناتتى شارادا ءسوز العان اۋدان اكىمى نۇرجان توقسەيىتوۆ ورتالىق ەلباسى تاپسىرمالارىن ورىنداۋ اياسىندا اشىلعانىن, ىرىڭ-جىرىڭ بولعاننان ىمىراعا كەلگەننىڭ مىڭ ارتىقتىعى اتا-بابالارىمىزدان قالعان سارا جول ەكەندىگىن اتاپ ءوتتى. «مۇنداي ورتالىقتاردى وبلىستىڭ بارلىق قالالارى مەن اۋداندارىندا اشۋ قاجەت. ولاردىڭ قۇرامىندا زاڭدىق ءبىلىمى بار ماماندار عانا ەمەس, پسيحولوگتاردىڭ بولۋى دا ماڭىزدى. بۇگىندە ۇيلەنە سالا اجىراسىپ جاتقان جاستار وتە كوپ. ولار قايتا قوسىلۋى ءۇشىن دەر كەزىندە بىلىكتى مامانداردىڭ كومەگى قاجەت. ماسەلەن, ۇلىبريتانيادا ەكى جاس اجىراسقان جاعدايدا مەدياتورلارعا بارۋى زاڭمەن بەكىتىلگەن», - دەيدى ادۆوكات ليليا سافينا.
ورتالىقتىڭ اشىلۋ سالتاناتى اياسىندا اۋداندىق سوت, اۋدان اكىمدىگى جانە اقساقالدار كەڭەسى اراسىندا ىنتىماقتاستىق جونىندەگى مەموراندۋمعا قول قويىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
التاي اۋدانى
