وسىنداي ءدۇبىرلى دودانى الماتى وبلىسىنىڭ ورتالىعىندا وتكىزۋىمىز بەكەر ەمەس. سەبەبى, قازىرگى كەزدە جەتىسۋ وڭىرىندە مما قارقىندى دامىپ كەلەدى. بىلتىرعى جىلى ولار قازاقستان كۋبوگىنىڭ جالپى كوماندالىق ەسەبىندە باس جۇلدەنى ولجالاعان بولاتىن. بۇل جولى دا كوپتەگەن كەرەمەت جانە ىمىراسىز جەكپە جەكتەردىڭ كۋاسى بولاتىنمىز داۋسىز. ەل كۋبوگىمەن قاتار, تالدىقورعاندا «BATTLE OF NOMADS» حالىقارالىق ءتۋرنيرى وتەدى. ال ول جارىستا تەك كاسىپقوي سپورتشىلار عانا كۇش سىناسادى, – دەيدى قازاقستاندا وسى ونەردىڭ دامۋىنا ەلەۋلى ۇلەس قوسىپ جۇرگەن ازاماتتاردىڭ ءبىرى اسىلبەك دۇيسەنوۆ.
تالدىقورعاندا جالاۋى جەلبىرەيتىن جارىستا قازاقتىڭ ەڭ تانىمال جەكپە-جەك شەبەرلەرىنىڭ ءبىرى ارمان ءاشىموۆ تە ونەر كورسەتەدى. كەزىندە كيكبوكستان ءبىراز بەلەستەردى باعىندىرعان قانداسىمىز سپورتتىڭ بۇل ءتۇرىن دە ەركىن مەڭگەردى. «مۇستافا وزتۇرىك» دەگەن بۇركەنشىك ەسىممەن تانىمال ءاشىموۆ رەسەيدىڭ «م-1» نۇسقاسى بويىنشا ۋاقىتشا الەم چەمپيونى اتاندى. وسى كۇنگە دەيىن 11 كەزدەسۋ وتكىزىپ, 8 رەت جەڭىسكە جەتتى. ۇستىمىزدەگى جىلدىڭ 24 مامىرىندا سانكت-پەتەربۋرگتە ۋكراينالىق الەكساندر دوسكالچۋكپەن كۇش سىناسىپ جاتقان جەرلەسىمىز قولىن سىندىرىپ العان ەدى. سودان ءبىراز ۋاقىت ەمدەلىپ, جارتى جىلدان اسا ۋاقىتقا سوزىلعان ۇزىلىستەن كەيىن ايقاس الاڭىنا قايتا شىعۋعا بەل بۋدى. ارماننىڭ قارسىلاسى – يسپانيالىق كريستان گارسيا كوللادو. پيرەنەي تۇبەگىنەن كەلگەن سپورتشى 14 جەكپە-جەك وتكىزىپ, 10 رەت باسىمدىققا يە بولدى.
سونىمەن قاتار, ايتۋلى جارىستا ءالى ەشكىمنەن جەڭىلىپ كورمەگەن جالىندى جاس شاۆقات راحمونوۆ پەن ساقا سپورتشى دميتري كۋدينوۆتىڭ دا ونەرىن تاماشالايمىز.
عالىم سۇلەيمەن,
«ەگەمەن قازاقستان»
