اتىراۋ وبلىسىندا بيىلعى سپورت سالاسىنىڭ كورسەتكىشتەرى قورىتىندىلاندى. وبلىستىق دەنە شىنىقتىرۋ جانە سپورت باسقارماسىنىڭ مالىمەتى بويىنشا جىل باسىنان بەرى 1200 سپورتتىق شارا وتكەن, ونىڭ باسىم بولىگى اۋىلدىق جەرلەردە ۇيىمداستىرىلدى. شارالارعا جالپى العاندا 245 مىڭ ادام قاتىستى.
قازىر وبلىس بويىنشا 858 دەنە تاربيەسى ۇجىمى جۇمىس ىستەيدى. ونىڭ ىشىندە 16 بالالار مەن جاسوسپىرىمدەر سپورت مەكتەبى, 6 بالالار مەن جاسوسپىرىمدەردىڭ دەنە شىنىقتىرۋ كلۋبى بالالارعا سپورتتىڭ 22 تۇرىمەن اينالىسۋعا مۇمكىندىك بەرەدى. وليمپيادالىق رەزەرۆ دايىنداۋ ورتالىعىندا 159 وقۋشى سپورتپەن شۇعىلدانادى.
-2018 جىلى ءبىزدىڭ سپورتشىلار ءار ءتۇرلى دەڭگەيدەگى سپورتتىق شارالارعا قاتىسىپ, 1194 مەدال جەڭىپ الدى. بيىلدىڭ وزىندە وبلىستا 10 حالىقارالىق دارەجەدەگى سپورت شەبەرى, 18 سپورت شەبەرى, 145 سپورت شەبەرلىگىنە ۇمىتكەر دايىندالدى. وسى جىلى 220 اتىراۋلىق سپورتشى بىرنەشە سپورت تۇرلەرىنەن قازاقستان رەسپۋبليكاسىنىڭ ۇلتتىق قۇراما كومانداسىنا كىردى, - دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ.
ايماقتا سپورتتىق ينفراقۇرىلىمدى دامىتۋ ايرىقشا نازاردا. جىل باسىنان بەرى 52 نىسان (اتىراۋ قالاسىندا, يساتاي اۋدانىندا سپورت كەشەندەرى, 25 سپورت زالى, 19 سپورت الاڭى, قىزىلقوعا اۋدانى ساعىز سەلوسىندا تير) پايدالانۋعا بەرىلدى. ماحامبەت اۋدانى اقجايىق اۋىلىندا دەنە شىنىقتىرۋ-ساۋىقتىرۋ كەشەنى قۇرىلىسى اياقتالۋى جاقىن. جىلىوي, قۇرمانعازى اۋداندارىندا سپورت كەشەندەرى سالىنىپ جاتىر. جاقىن بولاشاقتا دەنە شىنىقتىرۋ جانە سپورتپەن اينالىسۋ ءۇشىن 45 نىسان قۇرىلىسى جۇرگىزىلەدى. سپورتتى دامىتۋعا قاراجات تەك مەملەكەتتىك بيۋدجەتتەن عانا بولىنبەيدى. سپورتتىق ينفراقۇرىلىمدى دامىتۋعا كوممەرتسيالىق قۇرىلىمدار دا ۇلەس قوسۋدا. اتىراۋدا مەملەكەتتىك-جەكەمەنشىك ارىپتەستىك ارقىلى جابىق جەڭىل اتلەتيكا مانەجىن سالۋ جوسپاردا بار.
-وڭىردە ۇلتتىق سپورت تۇرلەرى دە وركەندەپ كەلەدى. قازىر وبلىستا ۇلتتىق سپورتتىڭ 8 ءتۇرىن دامىتۋعا باعىتتالعان سپورتتىق كلۋب جۇمىس ىستەيدى. سپورتتىق مەكتەپتەردە توعىزقۇمالاق, قازاقشا كۇرەس ۇيىرمەلەرى بار, جەكپە-جەكتەن وبلىستىق فەدەراتسيا قۇرىلعان. 2018 جىلى اتىراۋدا ۇلتتىق سپورت تۇرلەرى بويىنشا «كاسپي كۋبوگى-جايىق جاعاسىندا» حالىقارالىق ءتۋرنيرى ءوتتى, - دەيدى رينات يبراگيموۆ. –وبلىستا 8 سپورت كلۋبى بار: ۆولەيبول, باسكەتبول, فۋتبول, حوككەي, بوكس, ت.ب. ايماقتا مۇمكىندىگى شەكتەۋلى جانداردىڭ دا سپورتپەن اينالىسۋلارى ءۇشىن جاعداي جاسالعان. اتىراۋ وبلىسىنان پاراليمپيادا قۇراماسىنا 44 سپورتشى ەندى. 13 سپورتشىنىڭ حالىقارالىق دارەجەدەگى سپورت شەبەرى اتاعى بار, 27 سپورتشى قازاقستان رەسپۋبليكاسىنىڭ سپورت شەبەرى, 45 سپورت شەبەرلىگىنە ۇمىتكەر بار.
-جەڭىل اتلەتيكا مارافونىن ۇيىمداستىرۋ داستۇرگە اينالدى. بيىل 4 مارافون مەن ۆەلوجارىس ءوتىپ, وعان مىڭنان استام اتىراۋلىقتار مەن قالا قوناقتارى قاتىستى. مۇنداي شارالار تۇرعىنداردىڭ قىزىعۋشىلىقتارىن ارتتىرىپ, سالاماتتى ءومىر سالتىن ۇستانۋلارىنا جول اشادى. ايتا كەتۋ كەرەك, وبلىس تۇرعىندارىنىڭ 31 پايىزى سپورتپەن اينالىسادى, - دەيدى باسقارما باسشىسى.
سپورت پەن سالاماتتى ءومىر سالتىن ناسيحاتتاۋ ءۇشىن قالادا «سپورتتىق ايالدامالار» - كوشەدەگى جاتتىعۋ قوندىرعىلارى ورناتىلدى. وبلىس ورتالىعىنىڭ ءار بولىگىندە 30 جاتتىعۋ قۇرالى, 4 «Street Workout» الاڭى بار. سكەيت-پاركۋر, ستريت-ۆوركاۋتپەن اينالىساتىن ورىندار قاراستىرىلعان جاستار ساياباعىنىڭ قۇرىلىسى بويىنشا جۇمىستار باستالدى, جاڭا نىسان اۋماعىندا ۆەلوسيپەد جولى دا بولادى.
