بىردەن ايتا كەتۋ كەرەك, سونى جاڭالىقتىڭ ەلگە جاقسىلىعى مول بولماق. وبلىستىق الەۋمەتتىك باعدارلامالاردى ۇيلەستىرۋ جانە جۇمىسپەن قامتۋ باسقارماسى تۇرعىندارعا قىزمەت كورسەتۋ ورتالىقتارى, كاسىپورىندار مەن ءبىلىم بەرۋ جۇيەسى جاڭا جۇيەنىڭ سەنىمدى ارىپتەستەرى بولۋعا قۇلشىنىپ وتىر.
– ءوزارا ىنتىماقتاستىق تۋرالى مەموراندۋمدارعا قول قويىلۋىنىڭ ءوزى ورتاق ءىستىڭ ارناسىن كەڭىتە تۇسەدى,–دەدى وبلىس اكىمىنىڭ ورىنباسارى قانات ىدىرىسوۆ, – بۇل ءىس تۇرعىنداردىڭ تۇرمىس ساپاسىن جاقسارتۋعا, كاسىپكەرلىكتى دامىتۋعا ءارى مەملەكەتتىك باعدارلامالاردىڭ مۇلتىكسىز ورىندالۋىنا سەپتىگىن تيگىزەدى.
جوبانىڭ نەگىزگى ماقساتى ەكى قولعا ءبىر كۇرەك تابا الماي جۇرگەن تۇرعىنداردى ناتيجەلى جۇمىسپەن قامتۋ, قولايلى كاسىپ ىزدەۋگە كومەكتەسۋ, وسى باعىتتا كەڭەس بەرۋ.
وبلىستىق كاسىپكەرلەر پالاتاسىنىڭ دەرەكتەرىنە قاراعاندا, وڭىردە 20 مىڭنان استام تۇرعىن جۇمىسسىز رەتىندە تىركەلگەن. كەرىسىنشە, اعىمداعى جىلدىڭ قاراشا ايىندا جۇرگىزىلگەن مونيتورينگتە وبلىستىڭ 250 كاسىپورنىندا ەكى مىڭ جۇمىس ورنىنىڭ بوس تۇرعانى انىقتالعان. مىنە, ەندى وسى ورايداعى قيىن ءتۇيىننىڭ ساۋالىن جاڭا قىزمەت شەشپەك.
– ەلباسى نۇرسۇلتان نازارباەۆتىڭ بيىلعى جولداۋىندا ەلدىڭ تۇرمىسىن جاقسارتىپ, تابىسىن مولايتۋعا ايرىقشا ءمان بەرىلدى,–دەيدى اقمولا وڭىرلىك كاسىپكەرلەر پالاتاسىنىڭ ديرەكتورى تيمۋر ناقىپبەكوۆ,–جاڭا جوبانىڭ ەرەكشەلىگى الەۋمەتتىك مىندەتتەرگە نەگىزدەلىپ وتىر. ىنتاسى بار ادامدارعا بوس جۇمىس ورىندارىن قولايىنا وراي تاڭداۋ مۇمكىندىگى بەرىلەدى. ال, جۇمىس بەرۋشىلەر بولسا, وزدەرىنە قاجەتتى جۇمىسشىلاردى ىرىكتەي الادى.
ەڭبەك ميگراتسياسى بيزنەستىڭ دە دامۋىنا اسەر ەتپەك. بيزنەس دامىسا, سالىق تۇسىمدەرى دە ارتا تۇسەتىندىگى بەلگىلى.
تۇساۋكەسەر اياسىندا جاڭا جوبانىڭ ارىپتەستەرى اقمولا وبلىسىنىڭ اكىمدىگى, شىمكەنت قالالىق, سولتۇستىك قازاقستان, اقمولا وبلىستىق كاسىپكەرلەر پالاتاسى, جۇمىسپەن قامتۋ ورتالىقتارى جانە جەرگىلىكتى جۇمىس بەرۋشىلەر اراسىندا ىنتىماقتاستىق مەموراندۋمدارعا قول قويىلدى. بۇل ىسكە «كوكشەتاۋ ءسۇت زاۋىتى», «كاماز-ينجينيرينگ» جانە «تىنىس» اكتسيونەرلىك قوعامدارى «كاين» جاۋاپكەرشىلىگى شەكتەۋلى سەرىكتەستىگى ءتارىزدى بىرقاتار ۇجىمدار قاتىستى.
بايقال ءبايادىل,
«ەگەمەن قازاقستان»
اقمولا وبلىسى
