ادىلەت مينيسترلىگى «فيليپ مورريس ينتەرنەشنل» جانە «ەرنست ەند يانگ» كومپانيالارىمەن بىرلەسىپ «قازاقستان رەسپۋبليكاسىنىڭ زياتكەرلىك مەنشىك قۇقىقتارىن ساقتاۋ جانە قورعاۋ سالاسىنداعى زاڭناماسىن جەتىلدىرۋ» تاقىرىبىندا دوڭگەلەك ۇستەل وتكىزدى. ءىس-شارا قازاقستان رەسپۋبليكاسى پرەزيدەنتى جانىنداعى شەتەلدىك ينۆەستورلار كەڭەسىنىڭ ينۆەستيتسيالىق ساياساتىن ىسكە اسىرۋ بويىنشا بىرلەسكەن جۇمىس توبىنىڭ جۇمىس جوسپارى اياسىندا ءوتتى.
دوڭگەلەك ۇستەل جۇمىسىنا قارجى مەن ۇلتتىق ەكونوميكا مينيسترلىكتەرىنىڭ, ادىلەت مينيسترلىگىنىڭ ۇلتتىق زياتكەرلىك مەنشىك ينستيتۋتىنىڭ, «قازاقستاندىق شەتەلدىك ينۆەستورلار كەڭەسى» قاۋىمداستىعىنىڭ, سونداي-اق, قازاقستان رەسپۋبليكاسى اۋماعىندا ارەكەت ەتەتىن بىرقاتار جەتەكشى شەتەل كومپانيالارىنىڭ وكىلدەرى قاتىستى.
دوڭگەلەك ۇستەلگە قاتىسۋشىلار قازاقستان رەسپۋبليكاسىنىڭ 2018 جىلعى 20 ماۋسىمداعى زاڭىمەن ەنگىزىلگەن زياتكەرلىك مەنشىكتى ساقتاۋ جانە قورعاۋ سالاسىندا ەنگىزىلگەن سوڭعى تۇزەتۋلەردى جان-جاقتى تالقىلادى. وندا بيزنەس, مينيسترلىكتەر مەن مەملەكەتتىك ورگانداردىڭ وكىلدەرى زياتكەرلىك مەنشىك قۇقىقتارى سالاسىنداعى رەتتەۋدىڭ ودان ءارى دامۋ بولاشاعىنا قاتىستى پىكىرلەرىمەن الماسىپ, قۇقىق قولدانۋ تاجىريبەسىنىڭ وزەكتى ماسەلەلەرىن تالقىلادى.
دوڭگەلەك ۇستەل بارىسىندا ساراپشىلار تاۋار بەلگىسىن تىركەۋ جۇيەسى وڭتايلاندىرىلۋى, تاۋار بەلگىسىن الۋ ءوتىنىم ساراپتاماسىن وتكىزۋدىڭ, قۇقىقتى تابىستاۋدى تىركەۋ مەرزىمى قىسقارتىلۋى, تاۋار بەلگىلەرىن قورعاۋعا ارنالعان ءتيىمدى قۇقىقتىق جاعدايلار قالىپتاسقاندىعى, «كونترافاكتىلىك تاۋار مەن ونىڭ قاپتاماسى» تەرمينىنىڭ ناقتى انىقتالۋى, تاۋار بەلگىسى يەسىنىڭ زالالدارىن وتەۋدىڭ قوسىمشا تەتىگى ەنگىزىلگەندىگى جايىنداعى تۇزەتۋلەر مەن وزگەرىستەرگە وراي ءوز ويلارىن جەتكىزدى.
ادىلەت مينيسترلىگىنىڭ مالىمەتتەرى بويىنشا قازىرگى كەزدە زياتكەرلىك مەنشىك سالاسىنداعى زاڭنامانى ودان ءارى جەتىلدىرۋ ماسەلەلەرى پىسىقتالۋدا.
ەلۆيرا سەرىكقىزى,
«ەگەمەن قازاقستان»
الماتى
