«وقۋ بىتىرگەننەن كەيىن جىل بويى جۇمىسقا ورنالاسپاي بوس جۇرەتىن ماسىل جاستار سانىنىڭ ازايۋى جونىنەن قوستاناي رەسپۋبليكادا 2 ورىندا تۇر. ۇستىمىزدەگى جىلدىڭ 1-جەلتوقسانىنا دەيىنگى مالىمەت بويىنشا, وبلىستا جۇمىسسىز جاستاردىڭ سانى 3,1 پروتسەنت بولعان, ال رەسپۋبليكا بويىنشا كورسەتكىش 4,1 پروتسەنتكە تەڭ. 1-قازاندا 23 778 ادام جۇمىسپەن قامتۋ ورتالىقتارىنا جۇمىس سۇراپ بارسا, سونىڭ 5454 جاستار بولاتىن, ياعني 23 پروتسەنتى. ولاردىڭ بارلىعى الەۋمەتتىك جۇمىسقا, جاستار پراكتيكاسىنا, تۇراقتى جانە ماۋسىمدىق جۇمىستارعا جىبەرىلدى, سونىمەن قاتار 724 ادام جاڭا كاسىپكە وقىسا, 44 ادام نەسيە الىپ, ءىسىن باستادى, قوعامدىق جۇمىستارعا مىڭ قارالى جاس باردى» دەدى وبلىستىق جاستار ساياساتى ماسەلەلەرى باسقارماسىنىڭ باسشىسى مارات جۇرقاباەۆ.
جىل بويى «ديپلوممەن – اۋىلعا!» باعدارلاماسى بويىنشا 4310 جاس مامان اۋىلدارعا ءوز ماماندىعىمەن جۇمىسقا تۇرعان. ولاردى الەۋمەتتىك جاعىنان قولداۋ ءۇشىن 4 ميلليارد 310 ميلليون تەڭگەدەن اسا قارجى ءبولىندى. قوستاناي وبلىسىندا «سەرپىن – 2050» مەملەكەتتىك باعدارلاماسىمەن ەلىمىزدىڭ وڭتۇستىك, شىعىس, باتىس وڭىرلەرىنەن 2015 جاس جوعارى جانە ارناۋلى ورتا وقۋ ورىندارىندا ءبىلىم الۋدا.
كەڭەس وتىرىسىندا جاستار ماسەلەسىنە قاتىستى وبلىستا كوپتەگەن شارۋا جۇزەگە اسىپ جاتقانىمەن, ولار ءۇشىن قولجەتىمدى ءبىلىم, جۇمىسپەن قامتۋ ورنالاسۋ, باسپانا, اسىرەسە جاس وتباسىلارى ءۇشىن پاتەر, ءۇي الۋ ماسەلەسى وتكىر كۇيىندە قالىپ وتىرعانى ايتىلدى. الداعى «جاستار جىلى» ەلىمىزدە 11 باعىتىن قامتىعان جول كارتاسى جاسالعانى بەلگىلى. وبلىستا دا وسى ىزبەن اتقارىلار جۇمىستار ناقتىلاناتىن بولادى.
ءنازيرا جارىمبەت,
«ەگەمەن قازاقستان»
قوستاناي
