ۇكىلى جۇيرىكتەردىڭ ۇزدىكتەرىن اتاماس بۇرىن جۇرتتىڭ جۇرەگىنەن جول تاپقان جوبانىڭ ماقسات, مۇراتى جايىندا از-كەم ايتا كەتسەك, ارتىق بولماس. ەلباسى ن.نازارباەۆ «بولاشاققا باعدار: رۋحاني جاڭعىرۋ» باعدارلامالىق ماقالاسىندا «سالت-ءداستۇرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر سوزبەن ايتقاندا, ۇلتتىق رۋحىمىز بويىمىزدا ماڭگى قالۋعا ءتيىس» دەگەن بولاتىن. قانداي دا ءبىر ۇلتتىڭ ءوزىنىڭ عاسىرلاپ قالىپتاسقان رۋحاني مۇراسى سالتانات قۇرىپ تۇرسا, ول ەلدىڭ رۋحى بيىك, ۇستىنى مەن ۇستانىمى مىقتى بولماق. ۋاقىتتىڭ داۋىلى مەن جاۋىنىندا جوعالماي, وتكەن كۇننىڭ تالاي سىنىنا ءتوزىپ بەرگەن ومىرشەڭ ونەر كەلەشەكتىڭ دە وزەگىن تالدىرمايتىنى انىق.
ايتا كەتەيىك, اقپارات جانە كوممۋنيكاتسيالار مينيسترلىگىنىڭ قولداۋىمەن «قازاقستان» رترك» اق العاش رەت 2017 جىلى جۇزەگە اسىرعان بۇل جوبانىڭ بەرگەنى از بولمادى.
وتكەندى بۇگىنگى كۇنمەن ورنەكتەي وتىرىپ ەرتەڭگە قىزمەت ەتتىرۋ ماقساتىندا قولعا الىنعان «Men qazaqpyn» بۇگىندە ءوزىنىڭ العا قويعان ماقساتى مەن جۇرگىزىلۋ جۇيەسى ارقىلى حالىقتىق جوباعا اينالدى. قازاقستاننىڭ تۇكپىر-تۇكپىرىندەگى ونەرى بار جاستاردىڭ جارقىراپ كورىنۋىنە جاقسى جاعداي جاسادى. سونىمەن بىرگە رەسەي, قىتاي, موڭعوليا ەلدەرىندە تۇراتىن قانداستار اراسىندا ىرىكتەۋ جارىستارىن وتكىزىپ, ولاردىڭ قازاقستاندا ونەر بايگەسىنە تۇسۋىنە مول مۇمكىندىك تۋعىزدى. ءبىر وكىنىشتىسى, قىتايداعى قانداستار ورتاسىنان كەلگەن ونەرپازدار بىلتىر جوبانىڭ جۋان ورتاسىنا كەلگەندە ات باسىن كەرى بۇرۋعا ءماجبۇر بولىپ ەدى, بيىل مۇلدە قاتىسا المادى...
وبالى نە كەرەك, جوبا جەتەكشىلەرى اتالعان ەلدەرگە بارىپ, ارنايى ءتۇسىرىلىم جاسادى, سول جەردە جاساقتالعان قازىلارمەن جوباعا جولداما الاتىن ونەرپازداردى ىرىكتەدى. بۇل وڭاي جۇمىس ەمەس. ۇيىمداستىرۋشىلاردىڭ ايتۋىنشا, «Men qazaqpyn» مەگاجوباسىنا بيىل 3 مىڭعا جۋىق ۇمىتكەر قاتىسىپ, سونىڭ 54-ءى تەلەارناداعى جوباداعى ۇلكەن بايگەدە باقتارىن سىناپتى. ارينە, قۋانارلىق جاعداي. بۇل بىرىنشىدەن, ۇلتتىق ونەرگە ۇمتىلعان جاستار قاراسىنىڭ مولدىعىن كورسەتسە, ەكىنشىدەن, بىلتىرعى جوبانىڭ ءساتتى جۇزەگە اسقاندىعىنىڭ ايعاعى.
سونىمەن, ايتۋلى كونتسەرتكە مەملەكەت جانە قوعام قايراتكەرى, «Men qazaqpyn» مەگاجوباسى قازىلار القاسىنىڭ توراعاسى مىرزاتاي جولداسبەكوۆ, «قازاقستان» رترك» اق باسقارما توراعاسى, مەگاجوبا يدەياسىنىڭ اۆتورى ەرلان قارين جانە «Qazaqstan» ۇلتتىق تەلەارناسىنىڭ ديرەكتورى ەركىن تاڭاتقان ۇلى قاتىسىپ, تەرمە, كۇي, ءان جانرلارى بويىنشا ماراپاتتادى.
وسى تۇستا جوبانىڭ جۇرگىزىلۋ ەرەكشەلىگى جايىندا دا ءبىر اۋىز ايتا كەتۋگە تۋرا كەلەدى. الامانعا جولداما العان ونەرپاز العاشقى اينالىمدا ءوزى دايىنداپ اكەلگەن شىعارماسىن ورىنداسا, ودان كەيىنگى كەزەڭدەردە ۇيىمداستىرۋشىلار دايىنداعان تۋىندىنى ورىندايدى. ونى ءتىپتى الدىن الا بىلمەيدى دە, مىنە, وسى جەردە ۇلكەن جاۋاپكەرشىلىك پەن تۇياق سۇرىندىرەر سىن تۇر. بۇل اينالىمدا ونەرپاز جەرەبەدە شىققان سول تۋىندىنى بىلۋىمەن قاتار بەلگىلى شارتتارمەن مەكتەپتەرگە بولىنگەن ءار ءوڭىردىڭ ورىنداۋشىلىق ءداستۇرىن دە يگەرگەن بولۋى ءتيىس. بۇل جيىن مەن تويدا ء«اۋ» دەپ جۇرگەن كەز كەلگەن اۋەسقويدىڭ قولىنان كەلەتىن شارۋا ەمەس. سوندىقتان بۇل ءانشى مەن كۇيشى, جىرشىنىڭ رەپەرتۋارىن دا تارازىعا تارتىپ باعادى. «ەڭىستەن سالساڭ توسكە وزعان, ەرتەدەن سالساڭ كەشكە وزعان» شىن جۇيرىكتەردىڭ سۋىرىلىپ شىعاتىن كەزەڭى دە وسى.
ءسويتىپ, وسىنداي سىنداردان سۇرىنبەي وتكەن توعىز ساڭلاق بايگەنىڭ قورىتىندى كەشىنە كەلدى. ياعني, ءار جانردان ءۇش ونەرپاز قارا ءۇزىپ شىقتى. ەندى ماراپاتتاۋ ءۇشىن ساحناعا كوتەرىلگەن ادامنىڭ اۋزىنان جۇرەكتەرى لۇپىلدەپ وتىرعان ۇشەۋدىڭ بىرەۋىنىڭ عانا ەسىمى اتالماق. بۇل شەشىمدى ايتۋ قازىلارعا دا وڭاي سوقپاسى انىق. سونىمەن, جينالعان جۇرتتىڭ الدىنا ءان جانرى بويىنشا الپىسبەك وڭايباي ۇلى (ماڭعىستاۋ وبلىسى), راۋان Əبىلباەۆ (الماتى قالاسى), اياۋلىم قاماجان (استانا قالاسى), كۇي جانرى بويىنشا جəنىبەك جəميەۆ (اتىراۋ وبلىسى), شىڭعىس يساەۆ (تۇركىستان وبلىسى), تاڭات سəدەنوۆ (الماتى وبلىسى), ال تەرمە جانرى بويىنشا كۇنسۇلۋ تۇرىكپەن (قىزىلوردا وبلىسى), سالتانات ەرسۇلتان (استانا قالاسى), ارۋجان ەرىموۆا (اتىراۋ وبلىسى) شىقتى.
سونىمەن, كوپتەن كۇتكەن ءسات جەتتى. تەرمە جانرى بويىنشا جەڭىمپازدى ماراپاتتاۋعا شىققان ەرلان قارين مىرزا قولىنداعى قاعازدان كۇنسۇلۋ تۇرىكپەننىڭ ەسىمىن وقىدى. ءسويتىپ, كۇنسۇلۋ ۇزدىك تەرمەشى اتانىپ 1 000 000 تەڭگەنى قانجىعالادى. ال كۇي اتالىمى بويىنشا ماراپاتتاۋعا شىققان مىرزاتاي جولداسبەكوۆ جəنىبەك جəميەۆتىڭ ەسىمىن اتاپ,
1 000 000 تەڭگە جۇلدەنى قولىنا ۇستاتتى. ءان جانرى بويىنشا جەڭىمپاز ەسىمىن وقۋعا شىققان ەركىن تاڭاتقان ۇلى ءۇش ۇمىتكەردىڭ ەكەۋىنىڭ ەسىمىن اتادى. ولار الپىسبەك وڭايباي ۇلى مەن راۋان Əبىلباەۆ. قازىلار القاسى جۇلدەنى 500 000 تەڭگەدەن ەكەۋىنە تەڭدەي ءبولىپ بەرىپتى.
گالا-كونتسەرتتە «Men qazaqpyn» جوباسى قازىلار القاسىنىڭ مۇشەلەرى ۇلجان بايبوسىنوۆا, ايگۇل ۇلكەنباەۆا, ايگۇل ەلشىباەۆا جانە ءى ماۋىسىمىنداعى جەڭىمپازدارى مەن بيىلعى ۇزدىكتەر ونەر كورسەتتى. جيىندا ءسوز العان كورپوراتسيا باسشىسى ەرلان قارين: «جوبانىڭ ماقساتى – ەلىمىزدىڭ تۇكپىر-تۇكپىرىندەگى ءداستۇرلى ءانشى-تەرمەشى, كۇيشىلەردىڭ باسىن ءبىر ارنادا توعىستىرىپ, ەلىمىزدىڭ ءار ايماعىندا قالىپتاسقان ونەر مەكتەپتەرىنىڭ تاڭداۋلى تۋىندىلارىن دارىپتەۋ, اتادان بالاعا مۇرا بولىپ كەلە جاتقان ءتول ونەرىمىز – كۇي, جىر-تەرمەنى دامىتىپ, زامانعا ساي جاڭاشالاندىرىپ, وسكەلەڭ ۇرپاققا ناسيحاتتاۋ» دەي كەلە, ۇلتتىق ونەرگە ارنالعان وزگە دە جوبالاردىڭ جۇزەگە اسۋ الدىندا تۇرعاندىعىن ايتتى. سونداي-اق جوبانى جۇزەگە اسىرۋعا اتسالىسقان قازىلار القاسىنا, شىعارماشىلىق ۇجىمعا جانە قالىڭ كورەرمەنگە العىسىن ءبىلدىردى. اسىرەسە, قازىلار القاسىنا ەرەكشە ريزاشىلىعىن جەتكىزدى. ادىلدىك پەندە بالاسى ءۇشىن بەلگىلى دەڭگەيدە شارتتى ۇعىم ەكەنىن ەسكەرسەك تە, «Men qazaqpyn» مەگاجوباسىنا قازىلىق ەتكەن مامانداردىڭ ونەرپازدىڭ كوزىنشە ارتىق-كەمىن ايتىپ وتىرۋى, كەشەگى كەنەندەردىڭ كوزىن كورگەن, ءومىرى مەن شىعارماشىلىعى ۇلتتىق ونەرمەن بىتە قايناسىپ كەتكەن مىرزاتايداي اسىل اعالاردىڭ ءار ورىنداۋشىعا ايتقان ەسكەرتۋلەرى تەلەديدار ارقىلى ۇلت ونەرى جايىندا وقىلعان ساباقتاي بولدى دەسەك ارتىق بولماس.
ۇلاربەك نۇرعالىم ۇلى,
«ەگەمەن قازاقستان»
