1986 جىلى برازيليانىڭ ريو-دە-جانەيرو قالاسىندا تۋىپ-وسكەن يگيتا 2006-2009 جىلدار ارالىعىندا ءوز ەلىنىڭ «كابۋ-فريۋ» جانە «ۆاسكو دە گاما» كلۋبتارىندا وينادى. سودان كەيىن قازاقستانعا قونىس اۋدارىپ, قاراعاندىنىڭ «تۇلپارىنىڭ» نامىسىن قورعادى. ءبىر جىلداي پورتۋگاليادا ونەر كورسەتكەن ول 2011 جىلى «قايراتتىڭ» جەيدەسىن كيدى. مىنە, سول كەزدەن بەرى ول الماتىلىق كلۋبتىڭ ساپىندا ونەر كورسەتۋدە. 2013 جىلى قازاقستاننىڭ ازاماتتىعىن الىپ, ۇلتتىق قۇراما كوماندامىزدىڭ بەلدى مۇشەسىنە اينالدى.
كلۋبتىڭ دەڭگەيدەگى جارىستار مەن قازاقستان قۇراماسى ساپىندا يگيتا كوپتەگەن تابىستارعا قول جەتكىزدى. ءوزىنىڭ ورەلى ونەرىنىڭ ارقاسىندا سان ميلليون جانكۇيەردىڭ كوزايىمىنا اينالدى. 2015 جانە 2016 جىلدارى ول قاتارىنان ەكى رەت الەمنىڭ ەڭ ۇزدىك قاقپاشىسى اتاندى.
بيىل يگيتادان بولەك, UMBRO Futsal Awards جۇلدەسىنەن ۇمىتكەرلەر قاتارىندا مىناداي اتاقتى فۋتزال شەبەرلەرى بار: ميودراگ اكسەنتەۆيچ (سەربيا, «تۇمەن»), گۋيتتا (برازيليا, «سپورتينگ»), فەرناندو لوپەس پەرەيرا «كارەكا» (برازيليا, «اتلانتيكو ەرەكيم»), حەسۋس ەررەرو (يسپانيا, «ينتەر»), ميحال كالۋزا (پولشا, «رەكورد»), ستەفانو ماممارەللا (يتاليا, «اكۆا ساپونە»), اليرەزا ساميمي (يران, «مەس سۋنگۋن»), گەورگي زامتارادزە (رەسەي, كپرف) جانە حو ۆان يا (ۆەتنام, «تاي سون نام»).
عالىم سۇلەيمەن,
«ەگەمەن قازاقستان»
