الەكساندردىڭ قارسىلاسى – مۇحاممەد رابي. 25 جاستاعى مارروكانىڭ تۋماسى قازاقستاندىق جانكۇيەرلەرگە جاقسى تانىس. 2013 جىلى ول الماتىدا وتكەن الەم چەمپيوناتىنا قاتىستى. وسىنداي ءدۇبىرلى دودادا تۇڭعىش رەت باق سىناعان مۇحاممەد تۇساۋكەسەر كەزدەسۋىندە قىرعىستاننىڭ بوكسشىسى ەركىنبەك بولاتبەكتەن ۇتىلىپ, ەلىنە ەرتە قايتقان بولاتىن.
ەسەسىنە 2015 جىلى دوحادا ۇيىمداستىرىلعان الەم چەمپيوناتىندا ول توپ جاردى. فينالدىق سايىستا قانداسىمىز دانيار ەلەۋسىنوۆكە سان سوقتىردى. ودان بولەك, مارروكالىق سپورتشىنىڭ افريكا چەمپيونى جانە وليمپيا ويىندارىنىڭ قولا جۇلدەگەرى دەگەن اتاقتارى بار. ريو دە جانەيروداعى جارىستىڭ جارتىلاي فينالىندا رابي وزبەكستاندىق شاحرام گياسوۆقا ۇتىلدى. ال وزبەكتىڭ ورەنى فينالدا ءبىزدىڭ دانيار ەلەۋسىنوۆكە ەسە جىبەردى.
2007 جىلى كاسىپقوي رينگكە اۋىسقان مۇحاممەد رابي وسى كۇنگە دەيىن جەتى جەكپە-جەك ۇيىمداستىرىپ, بارلىعىندا جەڭىسكە جەتتى. بەس باسەكەنى مەرزىمىنەن بۇرىن اياقتادى. ءوزىنىڭ سوڭعى كەزدەسۋىن ول ۇستىمىزدەگى جىلدىڭ 20 قازانىندا اۆستريالىق گوگي كنيازەۆيچكە قارسى وتكىزدى.
الەكساندر جۋراۆسكيدىڭ كاسىپقويلار اراسىندا باق سىناپ جۇرگەنىنە 11 جىل بولدى. سول ارالىقتا 33 جاستاعى جەرلەسىمىز 17 كەزدەسۋ وتكىزىپ, 13 رەت باسىمدىق تانىتتى. 11 قارسىلاسىن نوكاۋتپەن ۇتتى. ول دا ءوزىنىڭ سوڭعى جەكپە-جەگىن قازان ايىندا وتكىزگەن ەدى. وكىنشىكە قاراي, جۋراۆسكي وزبەكستاندىق جاسۋر احمادجونوقا ۇپاي سانىمەن ۇتىلدى.
عالىم سۇلەيمەن,
«ەگەمەن قازاقستان»
