ەلىمىزدىڭ جىلۋمەن جابدىقتاۋ قۇبىرلارىنىڭ قىزمەت ەتۋ مەرزىمىن ۇزارتۋعا جانە نىعايتۋعا ارنالعان ارنايى قۇرالداردى ورناتۋ جانە سىناقتان وتكىزۋ جونىندەگى قاناتقاقتى جوبا جۇمىسقا كىرىستى. جوبا «تكش قازورتالىعى» اق مەن Merus نەمىس كومپانياسى اراسىنداعى كەلىسىم اياسىندا ىسكە اسىرىلۋدا. استانادا «استانا-تەپلوترانزيت» اق الاڭىندا اسپاپتاردى تاجىريبەلىك پايدالانۋ باستالدى جانە قىزىلوردادا جالعاسادى.
گەرمانيا وكىلدەرى حابارلاعانداي, Merus تەحنولوگياسىن كوپ جىلدىق قولدانۋ تاجىريبەسى جىلۋ جانە سۋمەن جابدىقتاۋ جۇيەلەرىندە پايدالانۋ كەزىندە ولاردىڭ جوعارى تيىمدىلىگىن كورسەتتى. قۇبىردىڭ اينالاسىندا ورناتىلعان ارنايى ساقينا قۇبىرجولدار مەن ىلەسپە جابدىقتاردان قاق, توت جانە باكتەريالاردى الىپ تاستايتىن مولەكۋلالىق تەربەلىستەر تۇزەدى. بۇل بولشەكتەر قۇبىردان جۋىلىپ, جۇيەنىڭ باستاپقى جوعارى ونىمدىلىك سيپاتتامالارىن قالپىنا كەلتىرەدى جانە ەكولوگيالىق قاۋىپسىزدىكتى قامتاماسىز ەتەدى. مۇنداي تەحنولوگيا ۇيلەر مەن عيماراتتاردى جىلىتۋ جانە تەحنيكالىق قىزمەت كورسەتۋ شىعىندارىن ايتارلىقتاي تومەندەتۋگە مۇمكىندىك بەرەدى.
«استانا مەن قىزىلوردادا تاجىريبەلىك پايدالانۋ 5 ايعا سوزىلادى. وسى كەزەڭ ىشىندە مامانداندىرىلعان زەرتحانالار زەرتتەۋلەر جۇرگىزەتىن بولادى. پيلوتتىق جوبانىڭ وڭ ناتيجەلەرى ارقىلى جوبانى قر باسقا وڭىرلەرىندە ىسكە اسىرۋ ءۇشىن ودان ءارى ىنتىماقتاستىق مۇمكىندىگى قارالاتىن بولادى. سونىمەن قاتار ءبىز باسقا دا شەتەلدىك تەحنولوگيالاردى قازاقستاننىڭ تۇرعىن ءۇي-كوممۋنالدىق سەكتورىندا سىناقتان وتكىزۋ ءۇشىن زەرتتەيمىز», – دەدى «تكش قازورتالىعى» اق باسقارما توراعاسى نۇرسۇلتان جيەنباەۆ.
«استانا-تەپلوترانزيت» اق باسقارما توراعاسىنىڭ ءبىرىنشى ورىنباسارى سەرگەي گولەۆتىڭ ايتۋىنشا, استانادا سوڭعى 2 جىلدا تەك ماگيسترالدى جىلۋ جەلىلەرىنىڭ 40 شاقىرىمنان استامى پايدالانۋعا بەرىلگەن.
«قۇبىرلاردىڭ ساپالىق سيپاتتامالارىن ساقتاپ, مۇمكىندىگىنشە ۇزاعىراق قىزمەت ەتۋى وتە ماڭىزدى. جىلۋمەن جابدىقتاۋ جۇيەلەرىنىڭ سەنىمدىلىگى مەن ۇنەمدىلىگىنىڭ تومەندەۋ سەبەپتەرىنىڭ ءبىرى قۇبىرلاردىڭ ىشكى توتىقتانۋى بولىپ تابىلاتىنى بەلگىلى. سوندىقتان دا ءبىز توتتانۋ جىلدامدىعىن باياۋلاتىپ, جىلۋ تاسىمالداعىشتىڭ ساپاسىنا وڭ اسەر ەتەتىن وزىق تەحنولوگيالاردى بايقاپ كورۋگە ءارى سىناۋعا دايىنبىز», – دەيدى سەرگەي گولەۆ.
ايتا كەتۋ كەرەك, استانا قالاسىندا Merus اسپاپتارىن ورناتۋ جانە سىناقتان وتكىزۋ جونىندەگى پيلوتتىق جوبا استانا اكىمدىگى, «استانا-تەپلوترانزيت» اق جانە «استانا سۋ ارناسى» مكك قولداۋىمەن جۇزەگە اسىرىلۋدا. تۇتاستاي العاندا تكش سەكتورىنا نەعۇرلىم وزىق جانە ءتيىمدى شەتەلدىك تەحنولوگيالاردى تارتۋ بويىنشا جۇمىستى قر ينۆەستيتسيالار جانە دامۋ مينيسترلىگىنىڭ سالانىڭ ەنەرگيا تيىمدىلىگىن ارتتىرۋ جانە ساۋلەت, قالا قۇرىلىسى جانە قۇرىلىس قىزمەتى سالاسىنداعى ۇلتتىق يننوۆاتسيالىق جۇيەنى دامىتۋ سالاسىنداعى 2017-2021 جىلدارعا ارنالعان ستراتەگيالىق جوسپارىن ىسكە اسىرۋ شەڭبەرىندە «تكش قازورتالىعى» جۇرگىزىپ جاتىر.
ايناش ەسالي,
«ەگەمەن قازاقستان»
الماتى
