كلۋبتىق كوماندالار اراسىنداعى ەڭ بەدەلدى جارىستىڭ فينالدىق سايىستارى بۇعان دەيىن بىرقاتار مەملەكەتتە وتكەن. ال قازاقستان ايتۋلى باسەكەنى ەكى مارتە قابىلدادى. 2011 جانە 2017 جىلدارى الماتىداعى دوپ دوداسى اسا جوعارىدا دەڭگەيدە ۇيىمداستىرىلىپ, ماماندار تاراپىنان «وتە جاقسى» دەگەن باعاعا يە بولدى. بۇل جولى «تورتتىك فينالىندا» «قايرات» (الماتى), «بارسەلونا» (بارسەلونا), «سپورتينگ» (ليسسابون) جانە «ينتەر موۆيستار» (مادريد) كلۋبتارى كۇش سىناسادى.
ەستەرىڭىزگە سالا كەتەيىك, «تورتتىك فينالىندا» ەڭ مول ولجاعا كەنەلگەن ەل – يسپانيا. پيرەنەي تۇبەگىنىڭ كوماندالارى 14 مارتە اقتىق سىنعا دەيىن القىنباي جەتىپ, 9 رەت توپ جاردى. رەسەيلىك كلۋبتار ءۇش جارىستا دارا شىقسا, الماتىنىڭ «قايراتىنا» ەكى باس جۇلدە بۇيىردى. سونداي-اق, يتاليا, بەلگيا جانە پورتۋگاليادا جاساقتالعان كوماندالار ءبىر-ءبىر رەتتەن جەڭىمپاز اتاندى.
عالىم سۇلەيمەن,
«ەگەمەن قازاقستان»
