ناعىز كوركەم تۋىندى ۋاقىت ولشەمىنە باعىنبايدى. وسىدان جارتى عاسىر بۇرىن ايشا عالىمباەۆانىڭ قالامىنان تامعان «قازاقستان اندەرى» اتتى وسى ءبىر وتتى كارتينا ءوز كەزىندە قالاي جوعارى باعالانسا, قازىر دە مۋزەي قابىرعالارىنداعى جانىمىزعا جىلى ۇشىرايتىن بىرەگەي تۋىندىلاردىڭ كوش باسىندا تۇر. قولتاڭبادان سۋرەتشى ۇلتتىق كوركەمدىك مانەردى العاشقى ورىنعا قويعانىن انىق اڭعارامىز.
الىستان بولىمسىزداۋ عانا كورىنگەن اقار-شاقار شىڭدار دالانىڭ كەڭدىگىن ايگىلەسە, اينالانى كومكەرگەن جاسىل بارقىت بەلدەر تابيعات انانىڭ كورپەسىندەي كوركەم كورىنىس بەرەدى. زاۋ بيىككە مويىن سوزعان بالاپان شىرشالار قىزعالداق قىزداردىڭ قىرمىزى ۇنىنە تامسانا قۇلاق تۇرگەندەي. ارۋلارعا سايا بولعان الىپ الما اعاشىنان توگىلگەن اق ۇلپا گۇلدەر انمەن بىرگە ارمان قاناتىنا ىلەسىپ الىسقا ۇشادى. قىزداردىڭ ۇستىندەگى اپپاق بۇرمەلى كويلەك اق ايدىن سەكىلدەنىپ, ارۋلار سول ايدىندا اق قاناتىن كەرگەن اققۋ قۇسقا ۇقسايدى. ايدىندا قالىقتاعان اققۋ ءان اق ساۋلەگە ۇلاسىپ, دومبىرا شاناعىنان توگىلگەن سالقار سەزىم سايىن دالانى سالقىن لەبىمەن ايالايدى. بويجەتكەندەردىڭ بىلەكتەي بۇرىمى ەركىندىكتى, كەڭدىكتى ەلەستەتەدى.
«ايشا اپامىزدىڭ ەڭ ءبىر ىرگەلى شىعارماسىنا بالاناتىن بۇل تۋىندى ءارتۇرلى تۇستەرگە باي. شىعارمانىڭ كومپوزيتسيالىق شەشىمى اسپاننان نۇر بوپ قۇيىلىپ ءتۇسىپ جاتقانداي كورىنەدى. جايباراقات, جايماشۋاق كوڭىل كۇي ىرعاعى قازاق قىزدارىنىڭ ونەرگە باي ەكەنىن, كوڭىلى كەڭ ەكەنىن بارىنشا اشىپ كورسەتكەن. ادەتتە اق تۇسپەن جۇمىس ىستەۋدىڭ قانشالىقتى قيىن ەكەنىن كەز كەلگەن سۋرەتشى بىلۋگە ءتيىس. ايشا عالىمباەۆا اق ءتۇستى ءساتتى پايدالانۋ ارقىلى كارتينانىڭ اجارىن اشقانى ناعىز شەبەرگە ءتان قايتالانباس قولتاڭبا دەپ ايتا الامىز. كارتينانىڭ ءمان-مازمۇنى قازاق حالقىمەن بىرگە جاساي بەرمەك», دەيدى قازاقستان سۋرەتشىلەر وداعىنىڭ مۇشەسى شاتتىق باتان.
ارمان وكتيابر,
«ەگەمەن قازاقستان»
الماتى
