ەلباسى تاپسىرماسى بويىنشا قىزىلوردا وبلىسىنىڭ اكىمى قىرىمبەك كوشەرباەۆ ايماقتا كوپ بالالى وتباسىلاردان شىققان تالانتتى اۋىل جاستارى ءۇشىن جىل سايىن 100 گرانت بولەدى. قازىر جەكەمەنشىك وقۋ ورىندارىنىڭ كوبەيگەندىگى بەلگىلى. بىراق كوبىنىڭ وقۋ بازاسى, ماتەريالدىق جاعدايى, وقىتۋشىلار قۇرامى, ءبىلىم دەڭگەيى بۇگىنگى ءبىلىم ستاندارتتارىنا ساي كەلمەيدى.
كەيبىرەۋلەردە ەكى ديپلومى بولسا دا, بوس جۇمىس ورىندارى جارمەڭكەسىندە ءتيىستى ماماندىقتار بويىنشا تالاپ سۇزگىسىنەن وتپەي جۇرگەندەرى سوندىقتان. ەلىمىزدەگى كەيبىر جوعارى وقۋ ورىندارىنىڭ مۇمكىندىگىنە سەنبەگەن جاستاردىڭ شەتەلدىك وقۋ ورىندارىن تاڭداپ جاتقاندىعىنا ەلباسى دا كەيىستىك بىلدىرگەن. مۇندايدا تىعىرىقتان قالاي شىعۋعا بولادى؟!
قىزىلوردا وبلىسىندا «كاسىپتىك ءبىلىم بەرۋ جانە بيزنەس: ارىپتەستەر سۇحباتى» اتتى ەڭبەك فورۋمىندا وبلىس اكىمى ق.كوشەرباەۆ نارىق جاعدايىندا جوعارى بىلىكتى ماماندار دايارلاۋداعى تالاپتار جايىندا ايتقاندا مىنا وزەكتى ماسەلەنى ەسكە سالدى.
– ساراپشىلاردىڭ باعالاۋى بويىنشا, باتىس ەۋروپا مەملەكەتتەرىندە ىشكى جالپى ءونىمدى قالىپتاستىرۋدا ادام كاپيتالىنىڭ ۇلەسى – 30%, اقش-تا – 40%, ال تمد ەلدەرىندە بار بولعانى 10-15%-دى قۇرايدى. سوندىقتان ەكونوميكالىق ءوسىم مەن بارلىق يگىلىكتەردىڭ نەگىزگى درايۆەرى – ادام, ونىڭ ءبىلىمى مەن داعدىسى بولۋى قاجەت. ادام جەتەكشى كۇشكە اينالۋى كەرەك. ونىڭ ءبىلىمى, شەبەرلىگى, تاجىريبەسى – كوپ جاعدايدا تابىستى ءىستىڭ كەپىلى. ناتيجەسىندە جوعارى ساپا مەن ەكونوميكالىق ءوسۋ قامتاماسىز ەتىلەدى, – دەدى ول.
ادام كاپيتالى ءبىلىم ارقىلى قالىپتاسادى. سوندىقتان جوعارى وقۋ ورنىن بىتىرگەنىمەن نارىق جاعدايىنا جارامايتىن جاستاردىڭ قاتارىن كوبەيتە بەرمەۋ ءۇشىن بۇگىنگە كەرەك ماماندىقتارعا وقىتۋ كەرەك. مەملەكەتكە سالعان ادام ينۆەستيتسياسى دەگەن سول.
– ءبىز 2014 جىلدان باستاپ مەكتەپ بىتىرگەن تۇلەكتەردى ماسكەۋ مەن سانكت-پەتەربۋرگتىڭ ەڭ ۇزدىك تەحنيكالىق جوعارى وقۋ ورىندارىنا جىبەرۋدەمىز. رەسەي فەدەراتسياسى ۇكىمەتىنىڭ گرانتى نەگىزىندە وقىپ جاتقان 452 ءبىلىم الۋشىنىڭ ماسكەۋ بولات جانە قورىتپا ينستيتۋتى مەن سانكت-پەتەربۋرگتىڭ مەملەكەتتىك وسىمدىك پوليمەرى تەحنولوگيالىق ۋنيۆەرسيتەتىن بىتىرگەن العاشقى 32 ستۋدەنتى وقۋىن اياقتاپ ەلگە ورالسا, 42 تۇلەك ماگيستراتۋرادا بىلىمدەرىن جالعاستىرىپ جاتىر. رەسەي جوعارى وقۋ ورىندارىمەن ارىپتەستىك بايلانىس ناتيجەسىندە بيىلعى وقۋ جىلى تاعى دا 58 بالا وقۋعا ءتۇستى, – دەيدى ايماق باسشىسى.
سونىمەن قاتار جىل سايىن از قامتىلعان جانە كوپ بالالى وتباسىلاردان شىققان 100-گە جۋىق دارىندى بالا وبلىس اكىمىنىڭ ءبىلىم بەرۋ گرانتى بويىنشا ەلىمىزدىڭ جەتەكشى جوعارى وقۋ ورىندارىنا وقۋعا تۇسەدى. بيىل گرانتتار سانى 2 ەسەگە – 100-دەن 205-كە دەيىن ارتتى. بۇل رەتتە گرانتتاردىڭ 70%-ى IT-ماماندىقتارعا بولىنگەن. قىزىلوردالىق مەكتەپ بىتىرۋشىلەردىڭ 97%-ى وسىمەن ەكى جىل قاتارىنان جوعارى جانە ورتا ارناۋلى وقۋ ورىندارىنا ءتۇسىپ وتىر. ولاردىڭ 57%-ى مەملەكەتتىك ءبىلىم گرانتىنىڭ يەگەرلەرى اتاندى. بۇل وتكەن جىلمەن سالىستىرعاندا 509-عا ارتقان. وبلىستا تالاپتى جاستارعا وسىنداي كومەك كورسەتىلىپ وتىر.
باقتيار تايجان,
«ەگەمەن قازاقستان»
قىزىلوردا وبلىسى
