تۇڭعىش پرەزيدەنت كۇنى مەرەكەسى شىعىس قازاقستاندا ءارتۇرلى شارالارمەن جوعارى دەڭگەيدە اتاپ ءوتىلدى. وبلىس ورتالىعىنداعى مەرەكەلىك شارالار لەگى 28 قاراشا كۇنى ايماق باسشىسى دانيال احمەتوۆتىڭ ءوڭىر مەكتەپتەرىنىڭ وقۋشىلارىنا ارناپ ەلباسىنىڭ تاۋەلسىز قازاقستاننىڭ قۇرىلۋى مەن دامۋىنداعى ءرولى تۋرالى وقىعان دارىسىنەن باستالدى. وبلىس اكىمى وسكەمەندەگى №46 ورتا مەكتەپتە قالا مەكتەپتەرىنىڭ 10-11 سىنىپتاعى 350 وقۋشىسىنا جانە ونلاين رەجىمدە اۋدان-قالالارداعى 1800 وقۋشىعا ءدارىس وقىپ, جاس بۋىنعا نازارباەۆ فەنومەنى تۋرالى ويىمەن ءبولىستى. «ەسىمدە ەرەكشە ساقتالعانى – قىتايعا ساپار. شەكارانى دەليميتاتسيالاۋ قۇجاتتارىنا قول قويۋ كەرەك بولدى. ءبىزدىڭ دەلەگاتسيانى قىتاي باسشىسى تسزيان تسزەمين قابىلدادى. سول كەزدە قىتايلىق كوشباسشىنىڭ ايتقانى ءالى ەسىمدە. ول: «قىتاي ەلى تاريحتا ەشبىر ەلمەن شەكاراسىن شەگەندەگەن ەمەس, بۇل – ءبىزدىڭ ۇستانعان ىشكى-سىرتقى ساياساتىمىزعا قايشى ارەكەت. بىراق مەن قالىپتاسقان ءداستۇردى بۇزا وتىرىپ, ءسىزدىڭ جەكە باسىڭىزعا دەگەن زور قۇرمەت پەن ءىلتيپاتتىڭ بەلگىسى رەتىندە ەكى ەل اراسىنداعى شەكارانى بەلگىلەيتىن وسى قۇجاتقا قول قويامىن. قىتاي تارابىنىڭ قازاقستانعا قاتىستى ەشقانداي جەر تالابى جوق!» دەپ كەلتە قايىردى. بۇل قازاق ەلى ءۇشىن ۇلكەن جەڭىس بولاتىن! ەلباسىنىڭ كەمەڭگەرلىگى – بارلىق جاۋاپكەرشىلىكتى ءوز موينىنا الا بىلۋىندە», دەدى د.احمەتوۆ.
سونداي-اق وسى كۇنى وبلىستا بىرقاتار الەۋمەتتىك نىسان ەل يگىلىگىنە بەرىلدى جانە وڭىردەگى اتىمتاي ازاماتتار ماراپاتتالدى.
ازامات قاسىم,
«ەگەمەن قازاقستان»
شىعىس قازاقستان وبلىسى
