«قازاقستاننىڭ اۆتوجول جەلىلەرىن دامىتۋ مەن جەتىلدىرۋ – باسىم مەملەكەتتىك مىندەتتەردىڭ ءبىرى. اۆتوموبيل جولدارىنىڭ زاماناۋي جەلىسىن قۇرۋ جانە ءتيىمدى پايدالانۋ, جول كەشەنىنىڭ ينفراقۇرىلىمى – مەملەكەت ەكونوميكاسىنىڭ سەرپىندى دامۋىنىڭ نەگىزگى تىرەگى. ۇستىمىزدەگى جىلى ەلىمىز بويىنشا 4,5 مىڭ شاقىرىمنان استام رەسپۋبليكالىق ماڭىزى بار كولىك جولدارى جوندەلدى», دەدى ينۆەستيتسيالار جانە دامۋ ۆيتسە-ءمينيسترى ر.سكليار.
بيىلعى كورمەدە ء«ىرى قالالار مەن جاقىن ماڭداعى ەلدى مەكەندەر اراسىندا كولىك قاتىناسىن دامىتۋ بويىنشا شارالار قابىلداۋ» جانە «وڭىرىشىلىك قاتىناستاردى جاقسارتۋ ءۇشىن جەرگىلىكتى جولداردى جوندەۋگە قارجى كولەمىن 150 ملرد تەڭگەگە دەيىن ۇلعايتۋ» ماسەلەلەرىنە باسىمدىق بەرىلىپ وتىر. بۇل شارالاردى جۇزەگە اسىرۋ پرەزيدەنت نۇرسۇلتان نازارباەۆتىڭ 2017 جىلدىڭ 31 قاڭتارداعى حالىققا جولداۋىندا تاپسىرىلعان.
كورمەدە قازاقستان, بەلارۋس, ۋكراينا, رەسەي, اقش, گەرمانيا, تۇركيا, قىتاي جانە باسقا ەلدەردىڭ 100-دەن اسا زاماناۋي عىلىمي جانە تەحنيكالىق ونىمدەرى مەن ماتەريالدارى ۇسىنىلدى.
ال «وڭىرارالىق جول ينفراقۇرىلىمىن دامىتۋدى شەشۋ جولدارى» اتتى عىلىمي-تاجىريبەلىك كونفەرەنتسيادا اقش, فرانتسيا, تۇركيا, رەسەي مەن قازاقستاننىڭ بەلگىلى كومپانيالارىنىڭ وكىلدەرى ءوز ەلدەرىندەگى جول قۇرىلىمىنا قاتىستى تاجىريبەمەن ءبولىستى.
«2015-2019 جىلدارعا ارنالعان «نۇرلى جول» مەملەكەتتىك باعدارلاماسى اياسىندا ءبىزدىڭ مينيسترلىك اۆتوجولدار, كولىك جانە ازاماتتىق اۆياتسيا سالالارىندا بىرقاتار جوبالاردى جۇزەگە اسىرۋدا. نەگىزىنەن اۆتوموبيل جولدارىن سالۋ مەن قايتا جوندەۋ جۇمىستارىنا ءمان بەرۋدەمىز. اتالعان مەملەكەتتىك باعدارلاما اياسىندا 2015-2017 جىلدارى رەسپۋبليكا بويىنشا ءى جəنە ءىى دەڭگەيدەگى تەحنيكالىق كاتەگوريالارعا جاتاتىن 5,9 مىڭ شاقىرىم جول سالىندى جانە جوندەۋدەن ءوتتى. سونىڭ ىشىندە ىسكە قوسىلعان باتىس ەۋروپا –باتىس قىتاي كولىك ءدالىزى دە بار», دەدى ينۆەستيتسيالار جانە دامۋ ۆيتسە-ءمينيسترى رومان سكليار.
ونىڭ ايتۋىنشا, قازىرگى ۋاقىتتا ەلىمىزدە جەرگىلىكتى ماڭىزى بار جولدارعا بولىنگەن قارجى كولەمى – 155,9 ملرد تەڭگە. ونىڭ 64,3 ملرد تەڭگەسى رەسپۋبليكالىق بيۋدجەتتەن قاراستىرىلعان. بۇل قاراجاتقا وڭىرلەردەگى جالپى ۇزىندىعى 4373 شاقىرىمدى قۇرايتىن اۆتوموبيل جولدارىنا جوندەۋ جۇمىستارى جۇرگىزىلەدى.
سۇڭعات ءالىپباي,
«ەگەمەن قازاقستان»
