وسى باعىتتا ەكولوگيالىق جانە ەكونوميكالىق تۇرعىدان ءتيىمدى ينتەللەكتۋالدى جۇيەلەردى قولدانىسقا ەنگىزۋدىڭ الەۋەتى زور. جاڭا تەحنولوگيالار نەگىزىندە جاسالعان جارىق بەرەتىن قوندىرعىلار تەحنيكالىق قىزمەت تۇرلەرىنىڭ, جوندەۋ جۇمىستارىنىڭ ازايۋىنا, جارىقشامداردىڭ ۇزاق ۋاقىت قىزمەت ەتۋىنە مۇمكىندىك بەرۋىمەن قاتار قالا ءۇشىن قاۋىپسىز.
زاماناۋي جارىقشامدارمەن قامتاماسىز ەتۋ قالا كوركىنە ءار بەرىپ قانا قويماي, ەنەرگيا ۇنەمدەۋگە دە مۇمكىندىك بەرەدى. الماتى قالاسى ەنەرگەتيكا جانە كوممۋنالدى شارۋاشىلىق باسقارماسىنىڭ باسشىسى ماقسۇت يساحوۆتىڭ ايتۋىنشا, قازىرگى كەزدە قالا بويىنشا جارىقشامداردىڭ سانى 80 مىڭعا جۋىقتايدى. جىل سوڭىنا دەيىن قالا كوشەلەرىن جارقىراتىپ تۇراتىن شىراعدانداردىڭ 31,5 پايىزى نەمەسە 24 مىڭى ەنەرگيا ۇنەمدەيتىن جانە جارىقديودتى تۇرلەرىنە الماستىرىلادى.
بۇگىندە بوستاندىق اۋدانىنا قاراستى باعاناشىل, الاتاۋ, ەرمەنساي جانە نۇرلىتاۋ شاعىن اۋداندارىندا 35,3 شاقىرىمعا (1333 جارىقشام) جارىقديودتى شامدار قوندىرىلسا, اۋەجايدان باستاپ مايلين, بۇقتىرما كوشەلەرى مەن قۇلجا داڭعىلى, ءال-فارابيدەن ساين, تورايعىروۆ كوشەسىنە (4314 جارىقشام) دەيىنگى شىعىس اينالما جولىنداعى جارىقشامدار جارىقديودتى تۇرلەرىنە الماستىرىلعان. «الاتاۋ جارىق كومپانياسىنىڭ» ەلەكتر جۇيەلەرىن قايتا قالپىنا كەلتىرۋى ناتيجەسىندە قالانىڭ 8 ىقشاماۋدانىنداعى 186 كوشەدە 3807 جارىقشام جاڭاسىمەن اۋىستىرىلدى. قازىرگى كەزدە جاروكوۆ كوشەسىندە, وتەپوۆ كوشەسىنەن تولە بيگە دەيىنگى ارالىقتا 720 شىراعدان زاماناۋي كورىك بەرىپ تۇر. الداعى جوسپارعا سايكەس جىلدىڭ سوڭىنا دەيىن الاتاۋ اۋدانىندا 24 شاقىرىمداعى 730 جارىقشام قوندىرىلاتىن بولادى. ال اۋەزوۆ اۋدانىنداعى دۋبوك 1-2, دوستىق, شكولنىي, مامىر ىقشاماۋداندارىندا 49,5 شاقىرىم جۇيەلەردەگى 1612 جارىقشام جاڭالانباق.
الماتى قالاسى ەنەرگەتيكا جانە كوممۋنالدى شارۋاشىلىق باسقارماسى «الماتى قالاسىنىڭ سىرتقى جارىق كوزدەرىن جاڭارتۋ» مەملەكەتتىك-جەكەشەلىك ارىپتەستىك اياسىندا 2019-2026 جىلداردا 1375 شاقىرىم سىرتقى جارىق جۇيەسى مەن 45829 جارىقشامدى جانە دە 42052 تىرەكتەردى جاڭارتۋدى جوسپارلاپ وتىر. جارىق بەرگىش قوندىرعىلاردى الماستىرۋدا وتاندىق وندىرۋشىلەردىڭ ونىمدەرى پايدالانىلۋدا. قايتا جاڭارتىلعاننان كەيىن الماتى قالاسى ەنەرگيا ۇنەمدى LED جارىقشامدارىمەن تولىق قامتاماسىز ەتىلمەك.
ەلۆيرا سەرىكقىزى,
«ەگەمەن قازاقستان»
الماتى
