كورمەگە مۋزەي قورىنداعى 185-تەن استام قۇندى جادىگەرلەر توپتاماسى جانە دە ەلباسىنىڭ «كونە تاراز» مۋزەيىنە كەلگەندەگى تاريحي فوتوسۋرەتتەرى قويىلدى. تارازدىقتار ايتۋلى مەرەكە قارساڭىندا مۋزەيدەگى ءتۇرلى قۇندى جادىگەرلەرمەن تانىسىپ, ەلباسىنىڭ اۋليەاتا وڭىرىنە كەلگەن ساپارىنداعى سۋرەتتەرىن تاماشالادى. بۇدان بولەك, ۇلتىمىزدىڭ ۇلى تاريحىنان سىر شەرتەتىن كونە جادىگەرلەر دە مۋزەي تورىنەن تابىلدى.
«مۇندا تۇرگەشتەر زامانىندا سوعىلعان كۇمىس, قولا تەڭگەلەر, قىتايمەن ساۋدا-ساتتىق بارىسىندا كەلگەن قىتايلىق تەڭگەلەر مەن بۇيىمدار, قارلۇق قاعاناتىنىڭ اشەكەي بۇيىمدارى مەن تۇرمىستىق زاتتارى, قاراحاندار ءداۋىرىنىڭ مادەنيەتىنەن سىر شەرتەتىن كۇمىس پەن قولادان جاسالعان باقىر تەڭگەلەر, بۇتىندەي كومبە كۇيىندە تابىلعان ايەل ادامنىڭ التىن, كۇمىس اشەكەيلەرى, بىلەزىكتەر, سىرعالار, مونشاقتار جانە سۇيىقتىق ساقتاۋعا ارنالعان سىناپكوزدەر, قولادان قۇيىلعان شىراعداندار جانە ءۇيسىن داۋىرىنە جاتاتىن قولا اينا مەن شاش تۇيرەگىش بار. بۇلاردىڭ بارلىعى دا ءبىزدىڭ مادەنيەتىمىزدىڭ وتە جوعارى دارەجەدە دامىعانىن كورسەتەدى», دەيدى «ەجەلگى تاراز ەسكەرتكىشتەرى» تاريحي-مادەني قورىق-مۋزەيى ديرەكتورىنىڭ ورىنباسارى قۋانىش داۋرەنبەكوۆ.
كورمەنىڭ باستى ماقساتى ەكى مىڭ جىلدان استام تاريحى بار «ەجەلگى تاراز» قالاشىعىنان تابىلعان باعا جەتپەس قۇندى جادىگەرلەردى قالا تۇرعىندارى مەن قوناقتارىنا تاماشالاتۋ بولدى. سونىمەن قاتار, مۋزەي قىزمەتكەرلەرى كوزدىڭ قاراشىعىنداي ساقتاپ, بولاشاق ۇرپاققا قالدىرعان ۇلت مۇرالارىن ناسيحاتتاۋ جانە ۇرپاق كادەسىنە جاراتۋ دا ءبىرىنشى ورىندا. بۇل رەتتە كەلۋشىلەر كورمەنىڭ باستى ماقساتى جاس ۇرپاقتى ۇلتتىق رۋحتا تاربيەلەۋ جانە قالامىزدىڭ تاريحىنىڭ زور ءمانى بار ەكەنىن تۇسىندىرۋگە شاقىرعانىن دا ۇمىت قالدىرمادى. اتالعان كورمە اعىمداعى جىلدىڭ جەلتوقسان ايىنىڭ ءۇشىنشى ونكۇندىگىنە دەيىن جالعاساتىن بولادى.
حاميت ەسامان,
«ەگەمەن قازاقستان»
جامبىل وبلىسى
